أحرار مير قلوبنا مُستحلة / للكاتبة : سَحــاب

16

الجزء السادس عشر
ربما هي بداية النهاية

مجلس آل صارم النسائي

في عز المعمة بسبب اغماء هبه المفاجئ وصل اتصال لمشاعر وكان من راجح طنشت الاتصال وهي تشوف الكل مجتمع على هبه اللي بدت تسترد وعيها شوي شوي وبعد ما مرت دقيقه وصلها اتصال طلعت جوالها بإحراج وأول ما شافت رقم رعود المميز طلعت من عندهم مستغله انشغالهم عنها اخذت عباتها وهي تلبسها باستعجال واستقبلت الاتصال بحذر
مشاعر بهمس : صاير شيء ؟
رعود بروقان : وش فيك تهمسين ما طلعتوا من عند ال صارم
مشاعر تناظر ساعتها : لا بدري أتوقع حتى الملكة ما خلصت
رعود باستسفسار: كلمك ابوي ؟
مشاعر بريبة : ايه اتصل بس كنت مشغولة وما رديت
رعود ببرود : بيتصل وبيقول لك جسّار بيخطبك قولي له موافقة
مشاعر بصدمة : نعم !! والبارق ؟
رعود ببرود رايق : قولي موافقة بس ما تكون الملكة الحين
مشاعر بقهر : رعود انت تقوله صادق
رعود بجدية : تثقين فيني ولا يا مشاعر
مشاعر اللي زفرت بعدم اقتناع : طيب طيب ببلعها هالمره بس بتعلمني كل شيء وبالتفصيل بعد
رعود بابتسامة : على هالخشم يا بنت سعود يلا اتركك الحين
مشاعر اللي سكرت الجوال غافلة كليًا عن اللي سمع كامل المكالمة
رمّاح بخبث : وقفي يا بنت سعود انتي تدرين باللي سمعته اقدر اوديك ورى الشمس انتي ورعود؟
مشاعر بصدمة : من تكون انت
رمّاح بابتسامة : رمّاح اللي بتسعين بزواجه من روح
مشاعر بابتسامة: تبطي
رمّاح اللي كان مبتعد عن الرجال بعد ما اشعلوا اعصابه لقى الفرصة على طبق من ذهب : تبيني اسكت ؟ تسعين بزواجي من روح
مشاعر :......
ودخلت لداخل وهي تشوف هبه اللي رجعت على حيلها شوي
في مجلس الرجال
كايد اللي وصلته رسالة محتواها " عمرك ما كنت اختياري لو كنت تحبني مثل ما تقول تراجع عن زواجك مني أجواد بنت عمك سيّاف"
كايد اللي حاول يسترجع نفسه وهو يشوف الكل ينتظرونه نزل يأخذ القلم اللي طاح منه وقع مكان اسمه وهو يبتسم ابتسامة متصنعة بعد اللي قراه لكن لا مو هو اللي يهدم أحلامه سلم الكتاب لعمه سيّاف وهو محتفظ بابتسامته
اخذ منه الدفتر وتوجه للقسم النسائي من بيته وهو يدق الجرس ينتظر اوراد تفتح له واللي كان عندها علم بجيته
أوراد بابتسامة : هذا ابوي جايب الدفتر تغطوا
توجهت للباب فتحته بحماس وبابتسامة : تفضل يبه روح لأجواد فوق
سيّاف وفرحته ما تكتمل لين يشوف توقيعها جنب توقيع كايد : جهزت هي ؟
أوراد بابتسامة : طالعه قمر يا يبه تعال نصعد وشوفها بعينك
صعد فوق وهو يشوف أجواد مبتسمة من شافت رسالتها تمت قراءتتها كانت بكامل زينها ماسكه جوالها ولكن ما كملت فرحتها وهي تسمع صوت أبوها
سيّاف بابتسامة : ايه هذا جودي العاقلة اللي تسمع كلام أبوها وقعي الكتاب يبه
أجواد اللي تملكتها الصدمة كيف قرأ الرسالة ورضا على نفسه وفي نفس الوقت وصلتها رسالة " انا وقعت باختياري اذا انا مانيب اختيارك انتي اللي وقفي الزواج ان كنتي تقدرين طبعًا " نطقت بقهر وكل اليأس تملكها : جايب لي الدفتر بعد ليه وانت اللي اخترت وانت اللي نفذت كان وقعت بعد
سيّاف بأسى : يا يبه يا أجواد وقعي ولا تقهريني فيك
أجواد اللي اعتلاها القهر وهي تتحلف بكايد والحياة السوداء اللي بيشوفها معها سحبت الدفتر وهي توقع بقهر ولو كان الدفتر انسان كان نطق وقال اعتقيني
اعتلت زغاريط أم أوراد اللي كانت توها توصل وبنتها توقع وابتسم سيّاف وهو يبوس رأسها : عساه خير لك ويسعدك بدنياك وتنسين اني اجبرتك عليه
أجواد بعدت بغضب
أجواد بعدت بغضب : تقدر الحين تنزل وتبشرهم انك أجبرت بنتك
صدت عنه وهي تشوفه خارج من الغرفة ومعه الدفتر نزلت دموعها وهي تسمع التبريكات تحت

مجلس الرجال

جسّار بهمس لراجح : يلا يا جدي كلمها
راجح بهمس : رايح لها الحين تنتظرني هي لا تستعجل انت
ابتسم جسّار : تمام انتظرك انا
خرج راجح من المجلس وهو متوجه لمشاعر
مشاعر بتمثيل لعدم الفهم : امر يا جدي صاير شيء
راجح بابتسامة مريحة حاول يخفي توتره لو رفضت مشاعر وتأزمت علاقته مع جسّار من جديد : لا ما صار الا الخير يبه يا مشاعر انا ادري انه تجربتك بالزواج كانت فاشلة لكن فشل المرة الأولى ما يعني فشل نهائي وانتي تدرين
مشاعر ببرود : ما احب المقدمات يا جدي
راجح بابتسامة : جسّار ولد عمتك خطبك مني وش رأيك
مشاعر ببرود : موافقة
راجح باستغراب : موافقة اكيد يبه ؟ تراه يبي يملك الحين دام الشيخ موجود
مشاعر برفض : لا يبه انا موافقة بس لا ما ابي املك الحين اصلًا زوجته تعبانة طاحت عليهم داخل يصبر شوي
راجح بشك : مشاعر انتي تدرين انه متزوج وعنده بنت وموافقة ؟
مشاعر بتمثيل : اذا هو متزوج ما يعيبه لأني انا اصلًا مطلقة موافقة يبه
راجح براحة : والطلاق ما يعيبك يبه يعيب شبيه الرجال اللي خذاك
مشاعر بابتسامة : اكيد ما يعيبني ولا يوقف حياتي مثل ما زواج جسّار ما يعيبه وبيقربك من النور بنتك
راجح بلهفة : شفتيها يا مشاعر ؟
مشاعر بابتسامة : شفتها يبه تهبل رحبت فينا ما كأنها اول مره تشوفنا
التفت اول ما سمعت صوت نجد : جدي شوف هذي نجد حفيدتك تجنن يبه
راجح بلهفة لف وهو يشوف نجد لكن عجز يناديها مين يكون لها عشان يناديها ولكن سمع صوت اغلى عليه من كل شيء ولو تغيب سنين بيبقى صوتها وصداه مرتكز بقلبه صوت النور وهي تنادي نجد تدخل داخل
راجح بلهفة : صوت نوري صوتها والله
مشاعر ابتسمت وبتهور رفعت صوتها : عمتي نوره تعالي هينا

في بيت أول مره نزوره

دخل بكامل روقانه ببيته المعزول والبعيد عن مكان شغله ولكنه اكثر مكان مريح بالنسبة له ابتسم اول ما شاف ولده بالحوش يسوي تمارينه الخاصة

رعود بابتسامة : بارق رعود وش يسوي
بارق اللي فز باحترام وسرعة تناسب عمله بالقوات الخاصة : هلا بأبو البارق مشرفنا اليوم
رعود بابتسامة مريحة : احتاجك معي الفترة هذي يا بارق
بارق بحمية : اطلبني وتلقاني يمينك يبه
رعود ببرود : جاء الوقت اللي تظهر فيه قدام جسّار وانت بارق بن رعود حفيد راجح جاء الوقت يبه
بارق بابتسامة حماسية : ألف طلب مثل هالطلب يالغالي
رعود براحة طبطب على كتفه : هذا العشم يبه
بارق اللي نوى يبتسم لولا رجل رعود اللي ضربت ركبته وتركته يركع على الأرض انصدم وهو يلف على رعود
رعود بابتسامة : جندي القوات الخاصة يكون متهيب دايم وما يضمن احد خلك دايم حريص لا يغدرون فيك ترى اعداءي كثار وانت غالي ولد غالية

- انتهى
يُرجى التصويت للبارت💕