"بساتين الضياع"
الكاتبه:امواج
بسم الله الرحمن الرحيم
__________________________
بقيت ارجف من منظر اختي منظرها يقطع الگلب تقربت منه على كيف وانا ادعي بداخلي انو هاي مو ملاك لحد ماوصلت يمه وشفته هي ملاك انصدمت من منظرها وما حسيت بشي بعد.
رقيه..
فزيت مرعوبه من كابوس بس مو اي كابوس هذا الكابوس كان مصور حادث اهلي بأدق التفاصيل كعدت الهث ومتعرقه صفنت بالفراغ لفتره
وانتبهت على راما ماكو
_وينهة؟
كمت بسرعه ادور عليهة وطلعت من الغرفه مديت راسي منا ومنا ماكو اي احد الممر الي احنه بي ولا طير موجود بي
رجعت شفت ضحى نايمه تراجعت انو اكعدهة بس قلقت كلش وكعدتهة
_ضحى اكعدي راما ماكوو
_لجج ضحى اكعدييي
هزيتهة حيل يلا كعدت
_شبييج شكو؟
_راما ماكوو
تباوعت على السديه مفتحه عين ومغمضه عين بس شافت راما ماموجوده فزت
_يممه وينهةةة
_مادريي امشي نسأل انا كلشي ما اندل هنا
بسرعه كامت عدلت حجابهة وطلعنه قلقين
الممرات مضائه ضوء خفيف الى ان شفنه ممرضه طلعت من غرفه
ركضنالهة وكلتلهة
_اكو بنيه جانت بذيج الغرفه ماشفتيهة طلعت منهة او تعرفين الممرضه الي اليوم اهتمت بيهة
ضلت صافه ثواني يلا ستوعبت
الممرضه: لا والله ماشفت احد طلع من الغرفه بس خلي اسألج الممرضه
هزينه راسنه وهي مشت واحنه وراهة لحد ما شفناها وكفت وي وحده زميلته بالعمل واجت صديقتهة بأتجاهنه وهي راحت
مشينالهة بسرعه وهي وكفت وكالت
_شنو اسم المريضه الي تدورن عليهة
رقيه: راما علي
الممرضه: اي عرفتهة قبل شوي طلبت مني انو اخذهة تشوف اختهة بس ماقبلت اصرت عليه واتفقت وياهة تشوفهة من بعيد بس ماتحملت وانغمى عليهة
دكيت على صدري
_يممممه
ضحى مصدومه
_وين هي هسه، خو مابيهة شي
الممرضه: نقلوهة لغرفه خاصه وماعرف عن وضعهة اذا تحبون اخذكم لدكتور
ضحى: اي اي اكيد
