دخلو فيصل وميعاد وراحت ميعاد مع فيصل غرفته تحضنه ، شد عليها تنزل دموعه ونطق، فهد يا ميعاد فهد
ميعاد بغصه: الله بيشفيه بس انتو لا تضعفون قوو نفسكم عشان هو يقوى
فيصل: بروح لها ما اقدر اقعد بمكاني ما اقدر
ميعاد: فيصل تعوذ من الشيطان بتروح شتسوي
فيصل بحده: اذبحها، فهد خط احمر هذا اخوي ميعاد
تنهدت ميعاد: بيصير زين وطيب لا توصخ نفسك بدمها فيصل: هي اللي سوته تقدر تفكه
ميعاد: بيروحون شيخ فيصل
فيصل: وتفكه هي تقدر بهددها بخوفها عشان تفكه ولا يتعب فهد ميعاد
فكرت بأبوها تكلمه عنه تنسيه شوي لانه كان متضايق وخايف خافت عليه ونطقت، رحت لبابا؟
فيصل: همني فهد ميعاد
ميعاد: ادري بس جاوبني
سكت فيصل وما رد يطالع الفراغ ، قامت ميعاد تسحبه: تعال بنام عندك اليوم
فيصل: بدق على فهد ، خايف عليه
ميعاد: خله فيصل بكره بنروح لهم لا تشيل هم ما بيصير الا الخير صدقني
فيصل: كيف ما اذبحها علميني كيف
ميعاد: فيصل! فهد ما بيعجبه انك تضيع نفسك!
عند ليان وفهد ، دخلت ليان تتروش وكان فهد قاعد بالصاله ماسك راسه يفكر يحس بجمره وسط صدره بعد كلام ليان يدري انه مو بيدها لكن كان كفيل انه يكويه ويلهب صدره ، راح للحمام الثاني يغسل وجهه يحاول يهدي نفسه ما وده تحس بضيقته يحس ان اللي فيها كافيها ما وده يزيد عليها،
طلعت ليان تلبس لها توب وبنطلون وتركت شعرها مبلول وتعطرت وطلعت الصاله تشوف فهد واقف يطالع الفراغ ،قربت منه تحضنه بهدوء تاخذ نفس تشد على حضنه غمضت عيونها من حست فيه يبادلها الحضن ونطقت، زعلان مني؟
بعد فهد عنها يمسك كتوفها: مو زعلان منك زعلان عليك ، بس تعبتك معاي كثير
هزت راسها بالنفي: ما تعبتني فهد ،ما تعبت وانت تقول لي كذا؟ انا ما اتعب منك
ليان: عيونك ما تقول نفس الشيء
فهد: ما عليك من عيوني، كأن جمالك زاد؟
ضحكت بخجل: فهد!
ضحك فهد: ما كذبت ، بدون اي تكلف حلوه وريحتك حلوه
ليان: العطر اللي تحبه
هز راسه بالنفي: ريحتك انتي مو العطر
حمر وجهها وضحك بصوته من شاف وجهها ونطق ميكب طبيعي
ليان: ازعل ترا فهد والله
فهد وهو يرجع خصله شعرها ورا اذنها ويتأمل وجهها اللي بدون ذره ميكب واخذت عقله بذا الجمال اللي ما تعود كثير يشوفها كذا بدون شيء ونطق: تعذبيني كذا
وقرب يبوس خدها بكل هدوء ، تحس بحنينه ورقته ببوسته من ثغره جاء عليها وتحس بمشاعرها تنتشر بجسمها كله بكل مره تشوف وتحس الحب منه ونطق: بشرتك حلوه
ليان بتوتر: شجاك اليوم فهد
فهد: اقول اللي اشوفه غلط؟
هزت راسها بالنفي وابتسمت: مو غلط بالعكس حلو احب اسمعك دايم
فهد: تحبين؟
ليان بأبتسامه: احب وكثير بعد
سكت يتأملها ، وقامت تروح المطبخ وكانت عينه ما طاحت من عليها يتأملها يطالع تفاصيلها اللي حافظها ، طلعت من المطبخ مبتسمه شايله صحنين ، طالع فيها بتمعن وميل راسه يشوف جزء من بطنها طالع وابتسم بخفه ، جلست جمبه تمد له الصحن وعقدت حواجبها تنطق، شعندك تطالع شيل عينك
فهد بأبتسامه: ما اقاومك للآسف
ليان ضحكت: مو منجدك فهد
فهد: قلبي ما يتحمل اشوف الجمال ذا كله والله ما اتحمل
ليان ابتسامه: احبك والله
قعد يتأملها ويتأمل ابتسامها وقرب من عنقها يبوسه بقوته ومسكت كتوفه تشد عليه ، وبعد عنها ووزع قبلاته عليها وبعد عنها يطالعها بأبتسامه تحبها وتسعد قلبها ، تحس بفرط مشاعره ومشاعرها اللي بتطلع منها ومن عيونها وصدت بعيونها بتوتر لصحنها ، حلوه الفراوله ذقتها؟
ابتسم فهد: اكيد بتكون حلوه
ميلت راسها على كتفه: خلص صحنك طيب
فهد: تامرين امر اخلصه
ليان: حبيبي فهودي شاطر
ضحك فهد: حلو حلو والله
ليان: دوم الضحكه ذي يا يروحي
ابتسم فهد: ويديمك لي
ليان: نرجع؟ اخاف يفقدوني واتوهق
فهد: مع انه ما ودي بس نرجع
ليان: خمس دقايق بجيب اغراضي واجي
دخلت الغرفه مبتسمه تطالع نفسها بالمرايا وفرحتها واضحه وابتسمت من شافت اثاره برقبتها وعضت شفتها بخجل ، وسهت بنفسها تشوف نفسها ما زادها حلا الا هو وحبه لها وقعدت تتأمل واخذت قلوس تحطه ولفت على شنطتها تحط اغراضها، وشيكت على جوالها ورجعته بالشنطه ولبست عبايتها وطلعت لفهد وابتسم ينطق، يا زين وجمال حرم فهد
ضحكت ليان تمسك يده يطلعون
بعد ما ركبو السياره نطقت ليان، بكره نخلص؟
فهد: اي بخلص من اهلي واجيكم
ليان تنهدت: متوتره
فهد: لا تعلمينهم بشيء بجيكم انا فجاءه وبقعد معاهم
ليان: خايفه فهد والله خايفه
فهد: مافيه الا العافيه بتعدي وبنرجع احسن من قبل
ليان بتوتر: وهي؟
فهد: التفت لها
ليان: بتدخل بمشاكل
فهد: هي اللي بدت ، اللي صار ما ينسكت عنه ابدأ
سكتت ترفع راسها ، التفت عليها فهد ورجع يطالع الطريق يوقف بدرايف ثرو ونطق ، تبين؟
ليان: مالي نفس
طنش فهد وطلب قهوتين ، ومن استلم القهوه نطقت، قلت مالي نفس
ابتسم بخفه: مصدع جايبهم لي
مسكت اعصابها لا تضربه ونطقت بهدوء، بالعافيه
ضحك فهد: جايبه لك مو عادتك تقولين مالي نفس
ليان: وانت بدل ما تسألني تطلب لي بعدين تقول انها لك!
قرب فهد يبوس خدها، اسفين
ليان: خذ قهوتك لك ما ابغاها
فهد: ترديني؟
طالعت فيه بنص عين: اي
فهد: اجل نرجع بيتنا ما برجعك البيت
ليان: عقاب يعني؟
فهد: تشوفينه عقاب؟
ليان: خلاص باخذ القهوه
فهد: ما جاوبتي؟
ابتسمت بهدوء، تعرف اجابتي
ضحك فهد وكملت، بكره اذا بتجي عطني خبر
فهد: عاد الحين انا اذا رجعت ينتظروني مروان مستعجل
ليان: زعلان؟
فهد: للأسف بس بيرضى
ليان تنهدت: خايفه من اهلي
مسك يدها فهد: مو صاير الا الخير لا تشيلين هم
بعد مده وصل فهد بيت ليان وقبل تنزل قرب منها يبوس خدها ونطق ، انتبهي لنفسك
ليان بأبتسامه: وانتبه لك
مشت ليان تدخل داخل ، ووقفت من نادها سيف
ليان: فجعتني شفيك ، غريبه ما نمت
قرب منها سيف: تأخرتي
ليان: كنت مع لين ، وما جاوبتني ليش ما نمت
سيف: كنت انتظرك
ليان: تنتظرني؟ غريبه ليش
سيف: ليان مر اسبوع وفهد ماله حس!
ليان: تكلمني اذا قمت؟ دايخه بروح انام
سيف: تعبانه تعبانه لمتى! ابغا اتكلم معاك
ليان: سيف مو وقته ما تعرف شفيني انت
سيف: شفيك علميني طيب
طنشته ليان تطلع غرفتها تنسدح وغمضت عيونها تفكر بالجاي ، فهد ايش بيقول لهم كيف يستوعبون اللي بيقوله ،دمعت عيونها تحس بحراره دموعها عليها
