يحس بالنار بجوفه مو مستوعب كلامها ، حاول يلقط انفاسه وعضت شفايفها تحاول تقسى ونزلت دموعها بتعب تقرب منه ترفع وجهه لها: لا تسوي بنفسك كذا الله يخليك
طالعها بعدم تصديق وكملت: عشانك مو عشاني وترتاح فهد متأكده بتقدر تنسى وتكمل حياتك
مسك يدها برجفه و مسك معصمها بهدوء: عورتك؟ ما كان ودي اعورك
شهقت تنزل دموعها وشال كفه عنها يهمس: ليان؟ اذا زعلانه هذا مو حل
صدت تغطي وجهها بكفوفها تبكي وقرب منها يبعد كفوفها عن وجهها يحاوط وجهها بكفوفه ونطق بخوف: ليان قولي شيء
ماقدرت تقول كلام مفهوم من غصتها وصيحتها ونطقت بصوت مبحوح: عشانك
هز راسه بالنفي برجاء ، عضت شفتها تستوعب مكانها وانها بتضعف زياده اخذت شنطتها بتطلع و مسكها يرجعها لورا وبعدت يده عنها تصرخ: ابعد عني
هز راسه بالنفي ونطق بغصه: ماتقدرين ليان ماتقدرين كيف تروحين وتخليني كيف فهميني
مسحت دموعها بعشوائيه: هذا اللي لازم يصير
تنفس بسرعه بخوف:عشان صارخت عليك؟ والله ما كنت اقصد احرجك قدامهم خفت عليك ما اتحمل تنضرين ويصير فيك شيء لاني بروح من بعدك
همست برجاء: فهد
فهد: تعبانه انتي الحين نامي ، اذا قمتي كلشيء بيتغير متأكد
شدت على شعرها ومشت بتروح ووقف قدامها يمنعها ، حاولت تبعده عنها وحضنها بقوته متجاهل ضرباتها: اذا رحتي انا انتهي
بكت بقهر بعلو صوتها تضربه بصدره تحاول تبعده: ابعد عني ابعد
شد على حضنها زياده: اضربيني زي ما ودك بس لا تروحين وتخليني ، والله انتهي من بعدك
شدت على كفوفه: الله يخليك يكفي والله يكفي
هز راسه بالنفي: ما اخليك علميني شفيك؟ ايش صاير معاك؟
صارخت وهي تحاول تبعد عنه، تنتهي طاقتها ونار جوفها يزيد جلست على الارض بتعب نزل معاها وهو لازال حاضنها وهمس بغصه: ليش ليان علميني ليش تغيرتي بلحظه
همست:محروقه لا تزيدني الله يخليك
فهد: ليش؟ صعبه عليك تقولين لي؟
رفعت راسها وحطت كفها على عنقها تحس انها مخنوقه مو قادره تتحمل كلامه ولا المكان اللي هي فيه
تنهد يحط راسها على كتفه يحضنها ترجع تنهار على كتفه تحس بحنيته عليها رغم حالته ما تقدر تمنع نفسها ما تحضنه، تحتاجه وتحتاج حنيته عليها ، تنفست بسرعه تستوعب انها بتضعف وبعدت عنه تقوم: تعبت خلاص مافيني طاقه اتحمل زياده والله ، ارحمني فهد انت مو حاس فيني!
يتأكد من شيء واحد اللحظه ذي وقام يمسك ذراعها بقوته يشد عليها ، تاوهت بألم تمسك كفه بخوف: فهد تعورني!
شد عليها اكثر تتغير نبره صوته: عطيني سبب واحد وبعدها يصير اللي تبينه
طالعت فيه بخوف ولأول مره يصير الموقف ذا بينهم تشوفه بمنظر ما تعرفه منه ولا قد شافته ما تعودته كذا تعرفه هادي ينفعل لكن ما يتغير قبل شافت فيه الحنيه والحين تشوف جموده وقسوته وثبات نظراته لعيونها اللي كلها خوف ودموع ، شد عليها وبكت من قهرها ومن الموقف ومن ألم ذراعها حست انها ترجف من لوعه كل شعور تحسه من كلشيء قعد يصير بسببها تشوف انهياره وعدم استيعابه لشيء غمضت عيونها تصد بوجهها عنه وحطت كفها على كفه تحاول تبعد يده عنها، ووسعت عيونها من دفها تطيح بالأرض تطالعه ينزل لمستواها وطالعته بخوف تمسك ذراعها بألم ورجعت لورا ونطق: شيء واحد
بلعت ريقها بخوف وكمل: سكوتك عندي معناه شيء واحد
نزل عيونه لجسمها يشوفها ترجف وفزت من مسك ذراعينها بقوه يقومها ورفع كفه يمسك فكها: لك اللي تبينه ، معد يربطنا شيء
ينربط لسانها ما تفهم كلامه " معد يربطنا شيء"ما تدري معنى الجمله وقصده منها ، تنسى الكلام كله ما عندها اي رده فعل لكلامه تطالعه بصدمه من عصبيته ، شاف الخوف فيها وصدمتها منه وانها ما توقعت هالشيء ابدا واخذ نفس يصد: اطلعي
كانت ترمش بصدمه تشوفه معطيها ظهره تحس بناره اللي تطلع منه ، ورجع ينطق بحده: اطلعي
تستوعب انه هو اللي قال لها كذا ما اصر تقعد و تنفست بسرعه وبرعب ، ورجعت تبكي بهدوء تنتظره يغير رايه ويصر انها تبقى ما تطلع من الباب ومستعده تقول له لكن كانت تنتظره يلف لها وياخذ بكفها يقعد معاها وتلاشت كل افكارها من لف للكنبه ياخذ شنطتها يرميها لها ، بلعت ريقها تشد على الشنطه وقرب منها يمسك تكتفها يلفها ويمشيها للباب ، رمشت بتكرار تحاول تستوعب حركته ومسكت مقبض الباب تفتحه من حست انه كان بيفتحه لأجل تطلع ، ما بتقدر تشوفه يطردها طلعت بدون ما تقفل الباب تمسك قلبها تشد عليه بقهر ما تدري كيف نزلت ووقفت عند سيارتها ، قعدت بالسياره دقايق تطالع الفراغ ما تستوعب كل اللي صار ، بدأت تستوعب وعضت شفتها تهز راسها بالنفي تدخل بحاله هستيريه من الصياح لين ما حست انها انكتمت مسكت صدرها ترجع لورا ما تقدر تتمالك نفسها وتمسك نفسها ورجعت تحط وجهها على الدركسون تبكي وتصارخ بصوتها ، ما يهون عليه اللي سواه ويدري بأثره عليها واخذ نفس يروح للشباك يشهد على كلشيء سوته يشوف ضربها لأي شيء قدامها يشوف رجفتها ويحس ان صراخها واصله من قهره من منظرها شافها تحاول تتنفس يشهد على انهياراتها كلها لساعات وهي بنفس المكان ونفس الانهيار.
