ابتسم بخفه من دقت عليه ورد عليها ما امداه يتكلم الا ينطق شخص: السلام عليكم
فهد: وعليكم السلام ، مين معاي؟
الشخص: تقرب لها؟
سكت ثواني بخوف: زوجها
الشخص: عظم الله اجرك ، صاحبه الجوال توفت
ما امداه يستوعب شيء ياخذ انفاسه ، يحاول يستوعب وتقفلت المكالمه ، ورجع بكفوف ترجف يدق عليها ما ترد بلع ريقه بخوف ويرسل لها بدون ما تستلم ورجع يدق عليها ومحد يرد عليه
عقدت حواجبها اماني: ايش صار؟ وجهك انخطف
كان ساكت ما يسمعها يطالع بجواله بذهول ، طالعو فيه مروان وفيصل يشوفون تغير حاله ، وفز يقوم يطلع غرفته،
شهقو من وصل لهم صوت تقفيل باب غرفته
فيصل: ايش صار؟
تنهدت اماني: اكيد خبر مو زين
قام مروان: بروح اشوفه
مسك يده فيصل: خلك اصبر لا ينفجر عليك خلينا نعرف ايش صار
دخل غرفته وهو ما زال يدق عليها وصدره يطلع وينزل من الرعب ، دق على وليد وما رد عليه ، مسك صدره يضربه بحرقه ، رمى نفسه على السرير يصرخ بقهر مسك راسه من حس بصداع نهش راسه فتح الدرج اللي جميه ياخذ كميه من حبوب يبلعها دفعه وحده ، وهمس: مستحيل ما تموت وتخليني ما اصدق ماتتركني اعرفها انا يكذبون يا فهد لا تصدق ، يارب تكون بخير يارب يكفيني والله يكفيني
دق جواله وفز يشوف مين ومسك راسه بضيق من شافه وليد ورد عليه بدون ما يتكلم واستغرب وليد: فهيدان وينك قلت بتجي
نطق فهد بصوت يرجف فيه الغصه: قالو لي توفت
وليد بخوف: مين اللي مات فهد!
بعد فهد الجوال من اذنه وشهق تنزل دموعه ما قدر ينطق اسمها ويقول انها ماتت عاجز يصدق ، جمد وليد مكانه من سمع فهد وهمس: فهد؟
مسح فهد على وجهه يمسك نفسه ورجع الجوال على اذنه: ليان يا وليد تحتاجني اعرف ما صار لها شيء
عض شفته وليد: نلاقيها فهد لا تشيل بفتح تحقيق
وقفل وطلع على طول يروح لفهد واخذ جواله يدق على مروان يقول لهم ، وضل يشهق لين حس بجوفه يتقطع وبكى بحرقه قلبه، بيضل ينفي الخبر للكل ويتحدى الكل انه كذب ، لكن خوفه اذا شافها بدون روح قدامه ومغطينها بالشرشف واذا لامس وجهها يكون زي الثلج بيشوفها لأخر مره بدون ما تشوفه يتأملها لأخر مره بحياته ، هز راسه بالنفي بتكرار ما وده يصدق وده يقوم من كابوسه ، دخل الحمام يمسح وجهه بمويا بارده
رجفت اماني من قال لهم مروان الخبر وغطت وجهها بكفوفها
جمد فيصل مكانه، ومروان غمض عيونه يرجع راسه لورا: فهد ايش بيصير عليه ، ايش بيصير فيه ما بيقدر يتحمل وما بيستوعب اصلا الخبر
همست اماني: نروح له؟
فيصل وهو ثابت مكانه:مايحب نتجمع عليه خلوه لوحده يجمع افكاره
دخلت روان وكانت مفجوعه من منظرهم وخافت احد صار فيه شيء: شفيكم؟
همس مروان: مو وقته ، وليد فهد قال لك شيء؟
وليد: ما قال شيء اللي اعرفه انه مو بخير
قعدت روان جمب اماني وهزت راسها بتعب تقول لها ، سكتو من دخل فهد ونطق بهدوء: جاك خبر؟
هز وليد راسه بالنفي ، وجلس فهد بهدوء بدون ما يتكلم كانو خايفين من هدوءه ومو قادرين يقولون شيء ، كانو بالمجلس لأجل خالد وزهره ما يحسون بشيء برغبه فهد ، فز وليد اول ما جاه اتصال يرد: بشر؟
جمد وجهه بخوف وحس بالرجفه ونزل جواله يطالعهم بخيبه حس بلسانه منربط مو قادر يقول لهم ، وقرب منه فهد يسحب جواله ينطق: دق الحين انا بكلمه ، شاف هدوء وليد وصرخ يكمل: دق!
نزل وليد راسه وبصوت خافت: يقولون لقيو جثه ما يدرون مين صاحبها
لف عليه فهد بوجه جامد وكمل وليد بدون ما يطالع بأحد: بيرسلون لي بأي مستشفى
مشى فهد يطلع البيت وقامو كلهم ولحقه وليد ولف عليهم: ما بيحب يشوفكم حوله بوضع كذا
مروان: ما اقدر اخليه بجي معاكم
هز راسه وليد بالنفي: مو صاير شيء خليكم
مشى وليد لبرا بسرعه ومسك فهد يلفه عليه: صحصح فهد لا تسوي بنفسك واهلك كذا
قرب فهد من اذن وليد يهمس: هي اهلي
اخذ نفس وليد من حال فهد: واللي داخل مين؟ مو اهلك؟ جاوبني فهد
صد فهد بعيونه: كلهم اهلي وما اقدر على فراق احد
وليد: مو صاير الا اللي ربي كاتبه
صد عنه فهد يركب السياره
وهز راسه بأسف وليد يكرب سيارته ويروح للمستشفى
نزل فهد المستشفى ونزل وراه وليد يكلمهم وراحو لثلاجه الموتى وحس فهد بالرجفه وشاف ممرضه وكلمها، طالعتهم الممرضه: طيب تفضل معاي
حس بخطواته ثقيله مو قادر يخطي خطوه خايف من اللي بيشوفه ما يقدر يواجه اخذ نفس يدخل وبلع ريقه يقرب من الممرضه وتنهد ينتظرها تشيل الشرشف ، رجف قلبه ومسك صدره يتنفس بسرعه ورفع كفه للممرضه ورجع خطواته لورا يطلع من الغرفه ورغم برودتها هو يشتعل مكانه فز وليد يمسكه: مو هي صح!
غمض عيونه فهد يحاول يلقط انفاسه ومسكه وليد من كتوفه يهزه وارتخت ملامح فهد بهدوء ونطق بدون صوت: مو هي
اخذ نفس وليد براحه وابتسم يطالع فهد: في أمل ما انتهى شيء تلاقيها ، صدقني يااخوي
غمض عيونه وهو ماسك رقبته ورفع راسه لفوق يحاول يتنفس ورجع يطالع بوليد: وينها؟ ليش اختفت
وليد: تعرف بس تشوفها لا تشيل هم ، الحين تعال نرجع
طلعو من المستشفى ودخل فهد البيت يشوفهم متجمعين وطلع لفوق بهدوء ودخل وليد وراه يهز راسه بأسف وطالع فيهم: مو هي لكن خلوه مو قادر يقول كلمه ما نطق بحرف ، انا بروح الحين وبجي اشوفه بكره
راح وليد وقعدو بحيره وخوف على فهد وليان مو قادرين يستوعبون اللي صار فجاءه ، ونطقت روان: بروح اشوفه ما اتحمل اقعد كذا انا مستحيل
قامت اماني: وانا بعد مستحيل نخليه كذا !
روان: واذا عصب عادي نتحمل بس يتكلم لا يسكت
تنهد مروان ونطق فيصل: معاكم اهم شيء يرتاح
