نجاة : رمزي خلاص وليدي راهو جا يعطيك الصحة
رمزي : بلا مزية خالتي
حكيمة : شحال وليدي هكا
رمزي : حاشا ماني كيفاش نشد عليك دراهم مدرت والو
نجاة : هادي هدرة خالتي رمزي وليدي تقدر تروح
حكيمة : الله يعطيك و يرضيك
قاعدة تدعيلو و هو خرج
حكيمة : اقعدي نجاة بنتي ..... يعطيك صحة سلكتيني تعرفي عندي لمسلسل لازم نشوفو لبارح مشفتوش مزية بنتي بيلسان دارتلي نتفرجو فتليفونها يعني ملقيتش شكون يجي يسقملي تليفيزيون
نجاة : كي تسحقي اي حاجة قوليلي ولادي و مام صحابهم راهم هنا حتى كي تسحقو تقضيو قولولهم يطلعوهولكم كي يجي زياد راني نوصيه يقول للدراري
حكيمة : ربي يخليك .... زياد شكون
نجاة : وليدي
حكيمة : اههه ماشي عندك ثلاثة
نجاة : لالا كاين زياد هو وليدي لكبير موراه يجي وسيم منبعد التوام جود و ليان ، زياد راح برك لدار بابا ربي يرحمو مديتلو لمفاتح تاع الدار يروح يفاقدها و كان كاين واحد الخدمة فالدار تما لازم يكملها بارسكو هدرت مع خويا حبينا نكريوها لواحد
حكيمة : ايه الله يبارك .... مديريهاش مني قلة صواب بصح باباهم وين راه
نجاة : ..... طلقنا .... هادي 15 سنة ..... كان مع وحدة كي كنا مزوجين ...
حكيمة : اللطف يا ربي
نجاة : كان عندي واحد ربع سنين زواج هكاك كي عرفها هي كانت مطلقة و عندها بيبية وقتها عرفها طليقي و رفدت منو وليدهم دوكا يكون ف 26 سنة و كي عرف روحو غلط معاها فتح عليها و قعد مخبي علينا موراها تفضحت حكايتهم و انا كرامتي مخلاتنيش نقعد معاه هو كان حاب يقعد مزوج بزوج بصح انا طلقت منو
حكيمة : و ولادو ميحوسش عليهم
نجاة : مالغري واش دارلي بصح منقدرش نكذب عليه كان و مزال يحب ولادو دايمن يحوس عليهم اصلا كي طلقنا حب يديهم بصح هوما كانو متعلقين بيا و جود و ليان كانوا صغار بزاف لازم يقعدو معايا مرات كان يديهم بصح هوما مولاوش يحبو يروحو عندهم سورتو كي مرت باباهم تما .... الثلاثة الصغار علاقتهم بباباهم صح ماشي مليحة بزاف بصح اوموان يتلاقاوه كي يجي يخرجو عندو يسلمو عليه نهار دخل للسبيطار دار عملية راحو عندو بصح زياد مفهمتش كيفاش حتى حقد على باباه بلاك كي هو لكبير و شهد على كامل واش صرا
حكيمة : ربي يلم شملهم لكبار يغلطو و الصغار يخلصو و نتي بنتي نستعرف بيك قدرتي تربي ربعة و تكبريهم فاهمة حالتك مليح شفتها فبنتي مريم مسكينة تعذبت بزاف مور ما مات راجلها باش ربات زوج بنات
نجاة : مايا موالفة نتلاقى بيها برا تلعب مع البنات عسل هديك الطفلة
حكيمة : ايه و لسانها طويل عليها
نجاة : ههه متبانش
حكيمة : هي و ختها تقولي مجابتهمش كرش وحدة لكبيرة كالم و لخرى طير وحدها
نجاة : لكبيرة بيلسان هكا
حكيمة : ايه جامي تلاقيتو سبحان الله شهرين و حنا نعرفوك و لليوم مزال مشفتيها حتى هي من الخدمة للدار و من الدار للخدمة
نجاة : اهه تخدم حطيتها صغيرة
حكيمة : راهي تخدم ف 23 سنة معندهاش بزاف ملي كملت قرايتها منبعد لقات خدمة فواحد ريسطورون دخلت خير ما تقعد فدار و زيد مريم و فريال راهم يلحقو مصروف الدار غير بسيف
نجاة : صح و زيد لمعيشة غالية و نتوما عندكم لكرا بزايد و زيد مصروف البنات ماشي كيما دراري حوايجهم و شعرهم و ريحتهم ايماجين ليان دوكا ولات تحوسلي على لمكياج هي و جود كل يوم دبزة و دماغ كي دير لغيسيل
حكيمة : ههه هذا هو لجيل تاع دوكا وعلاش اما عام راهي تقرا
نجاة : هي راهي 2eme فليسي دايرة علوم و جود اداب بصح عاود لعام رانا نطبعو فيه غير بسيف
حكيمة: خليها وقتها هداك هو ماشي مليح تزيريها بزاف
