صباح لي جا و شمس جديدة شرقت عالنة بداية يوم جديد ...... عند بيلسان لي نشفت وجهها و راحت للشمبرة لقات مروة مزالها مكسلة
مروة : صباحووو
بيلسان:.... صباح الخير
بيلسان لي تقعدت قدام مروة و تكات راسها للور
بيلسان: لوكان رحتي للخدمة
مروة : معليش قلت خلي ندي هاد اليامات منها نريح معاك و منها نريح شوية
بيلسان: اذا عليا انا راني مليحة
مروة : مراكيش مليحة
بيلسان: ....... سمانة مروة و النعاس حالف ما يجيني ، كلما نتفكر الصوالح لي لقاوهم فالدار نحب نهبل
مروة : خلاص جازت بيسو و دوكا مع الرقية وليتو خير و هداك السحر لي تلقى ياك فتحوه
بيلسان: علبالي و الحمدلله راني تحس روحي خير دوكا مع الرقية ، بصح كي نتفكر بلي دخلت المراة هديك لداري و امنتها ....
مروة : زعما صح حنان منكونوش دينا ذنوبها
بيلسان : مكان حتى براني دخل للدار مروة من غيرها ..... كان لازم نعرف بلي متتمنالناش الخير ..... كي مقبلتش بوليدها دارت لي دارتو
مروة : الله يهديهم مفهمتش وعلاش يروحو للسحور واش راح يربحو و حنا كلش راهو مقدر من عند ربي بصح هوما يروحو للحاجات لي ماشي ملاح
بيلسان: ... تعلمت مراح نزيد ندير ثقة فحتى واحد و مراح نزيد نخلي حتى واحد يقرب على حاجات تخصني
مروة : صح .... المهم هاد الحكاية جازت ...... دوكا .... نتي و زياد لازم تهدرو و تحلو لي بيناتكم
بيلسان: الحكاية متحبسش فالسحور برك مروة .... هو راهو شاد فخاطرو من حكاية خليل .... و الحاجة لعيانة فيه زعافو لي سامط ، راح يقعد زعفان و مراحش يجوزها و انا مرانيش حابة نراضيه هاد المرة هو لي راح يجي يحوس عليا
مروة : بيلسان ما جيبيش مشاكلكم تاع قبل الزواج لتاع دوكا مجياش تقعدي فداركم غضبانة و واحد ما يهدر مع واحد
بيلسان: ميهمنيش فيه يتهاارد هو لي يحوس على مرتو
مروة : بيلسان وليتي دراري صغار
طلعت كتافها و هبطتهم و ناضت
بيلسان: نروح ناكل
دخلت للكوزينة لقات حكيمة تشرب فالقهوة و مريم توجد فدوزانها رايحة للخدمة
بيلسان : مكاين والو للقهوة
مريم : سخنو الخبز بالزبدة
بيلسان: منحبووش ، مكانش كرواصون
مريم : دوك نهبط نشريلك و نولي
بيلسان: لالا دوك نهبط وحدي متشقيش روحك
حكيمة : فبلاصة متروحي تحوسي على دارك لي تخربت نتي اقعدي داوري فالحومة تحوسي على الكرواصون
بيلسان: ماني وشبيك محرشة عليا هادي لي زعما كنتي تحبيني و تحامي عليا
حكيمة : كي جيت نحبك لي راني نخمم عليك مخلية راجلك لتحت متلاوح و نتي هنا مزعفة
بيلسان: وعلاش ميحوسش عليا هو
حكيمة : اذا هو هبل نتي زيدي هبلي
بيلسان: انا نهبط نشري
مريم : هاكي باش تشري
بيلسان: شفتي راجلي لي حبسلي الخدمة و خلاني بحتى دورو ملقيتش ممبا باش نشري
مريم : بيلسان روحي بنتي
