اليامات لي جازوا بالخف نهار يجيب نهار و شهر يجيب شهر ، الشهور لي جازوا برمشة عين كل يوم حكاية و كل يوم احداث مرات روتينية مرات جديدة و هذا الحال عند ليلى لي كانت فوق الحصان و صوت قهقهاتها يتسمع من بعيد
ليلى : هههه سامي راني خايفة يرميني
سامي : مدامك مريحة عاقلة ميرميكش
هو لي كان شاد الحصان يمشي فيه و هي فوقو
سامي : هدرتي مع ختك
ليلى : ..... امممم هدرت معاها لبارح ، بصح مراهي حابة تسمع من حتى واحد ...... وقت عرفت علبالك تشوكيت شغل مقدرتش تدخل لراسي الحكاية فمابالك هي .... لوكان غير كي عرفت قتلي مزالني زعفانة منك كي خبيت عليا
سامي : حاجة متخصنيش عيشوش هي كي حكاتلي مكانت حابة حتى واحد يعرف بيها سما معنديش لحق نحكي
ليلى : بصح متخبيش عليا سامي ، و انا لي قلت انا و نتا .....
سامي : واش
ليلى : والو هبطني
رمات رجليها راح تهبط حتى شدها و هبطها
سامي : مكملتيش هدرتك
ليلى : كنت راح نقول قراب بصح غلطت apparemment
سامي : مدخليش شعبان فرمضان
قاطعهم صوت تليفونها راحو وين كاننا حاطين دوزانهم رفدت تليفون
ليلى : واش معتصم .... بيانسور نجي .... عشية ان شاءالله مالا
هي لي كوبات و رجعت تليفونها مع دارت لقاتو واقف قدامها
ليلى : خير كنت تتصنت عليا
سامي : جيت ندي تليفوني
ليلى : اممم اروااح نديرو سيلفي مع الحصان
راحت تصورت معاه و حطتها ستوري و فالوقت هداك هو نطق
سامي : شكون معتصم هذا
ليلى : ami
سامي : راكو خارجين مالا
ليلى : امممم
سامي : لوين
ليلى : .... هههه ماماك تمتم ريبوندات على ستوري
سامي : ...... خلينا نروحو
ليلى : اهههه وعلاش
هو لي راح رفد son sac à dos و هي لحقتو تجري
ليلى : وعلاش نروحو انا عجبني الحال هنا سامي
سامي : حاب نروح
ليلى : واش صرا
سامي : والو برك واحد العيباد كي يكون يهدر معاهم الواحد يحطوه فالثقيل
ليلى : كيفاش ..... انا .... انا مقصدتش كنت برك لاتية مع السطوري سمحلي مركزتش مع هدرتك
سامي : ايه كملي السطوري تاعك مالا
راح للطونوبيل و حركت راسها بلا حول و لحقتو بحكم هي طونوبيل تاعها قاراتها قدام تاعو برا
ليلى : سااامي
دار ليها هو لي حط يدو على الباب تاع طونوبيل راح يفتحها ، هي لي دنات عندو
