💓 បណ្តូលស្នេហ៍ បណ្តូលចិត្ត 💓

ភាគទី១១៖ចាស៎អូនជាអ្នកនិយាយដោយខ្លួនឯង

    រសៀល
    ថេយ៉ុង និង ជុងហ្គុក បានបបួលគ្នាមកផ្សារដើម្បីដើរជាវទំនិញរបស់របរខ្លះៗនិងមានគោលបំណងចម្បងពិសេសខ្លាំងនោះគឺមកកាត់សក់។ សក់របស់ ជុងហ្គុក វែងជាងមុនដូច្នេះហើយនៅក្នុងក្របខណ្ឌយោធាទាហានត្រូវតែកាត់សក់ឱ្យខ្លីទើបគេឆ្លៀតមានពេលវេលាទំនេរមកដើរផ្សារលេងជាមួយនិងភរិយាយ៉ាងហោចណាស់ក៏បានឈាងចូលកាត់សក់ខ្លះដែរ។ បន្ទាប់ពីបានកាត់សក់រួចអ្នកទាំងពីរបានដើរចូលទៅរកហាងថតរូបមួយកន្លែង។ ម្ចាស់ហាងនេះជាជនជាតិបារាំងដែលបានបើកអាជីវកម្មនៅក្នុងស្រុកនេះយ៉ាងទូលំទូលាយហើយក៏មានពោរពេញទៅដោយឧបករណ៍សម្ភារះទំនើបៗដែលអាចជម្រើសជ្រើសរើសសម្រាប់តម្រូវការរបស់ពួកគេដែរ។
    «សួស្តីអ្នកទាំងពីរអញ្ជើញមកថតរូបមែនទេ?» ជាធម្មតានៅក្នុងហាងពេញនិយមនិងទំនើបបែបនេះតែងតែមានជនជាតិកូរ៉េដែលជាអ្នកពូកែខាងភាសាបារាំងជាអ្នកឈរឈ្មោះបកប្រែកិច្ចសន្ទនារវាងពួកគេបន្ថែម។
    «ត្រូវហើយពួកយើងចង់ថតរូប!» ជុងហ្គុក ឆ្លើយតបរួចងាកមកញញិមដាក់ ថេយ៉ុង។
    «បើអ៊ីចឹងសូមអញ្ជើញលោកចូលទៅខាងក្នុង»
    «បាទ!» រាងក្រាស់ងក់ក្បាលផ្ងក់ៗប្រញាប់ប្រញាល់ចាប់អូសដៃភរិយាដើរចូលទៅខាងក្នុងអង្គុយនៅក្នុងបន្ទប់រង់ចាំ។ បន្ទាប់មកជាងថតដែលជាជនជាតិបារាំងក៏បានមកដល់ទីនេះនិងបានហៅពួកគេចូលទៅខាងក្នុងបន្ទប់ថតរូប។
     ជុងហ្គុក និង ថេយ៉ុង ថតរូបដាក់ក្នុងបន្តោងខ្សែកចាត់ទុកជារបស់អនុស្សាវរីយ៍ដ៏មានតម្លៃនិងមានអត្ថន័យជាទីបំផុតសម្រាប់ពួកគេទាំងពីរនាក់។ នៅពេលដែលថតរូបរួច ជុងហ្គុក ក៏បានសម្រេចចិត្តជាវនូវនាឡិកាបំពាក់ដៃគ្រឿងទៀតមួយទៅឱ្យ ថេយ៉ុង ជាកាដូពិសេស។
    ពួកគេក៏បន្តទៅមុខរហូតដល់ហាងកាហ្វេមួយកន្លែងនិងបានអង្គុយញ៉ាំកាហ្វេជាមួយនំប៉័ងដ៏ឈ្ងុយឆ្ងាញ់យ៉ាងរីករាយ។
    «អូនចង់ទៅណាបន្តទៀតទេ? ថ្ងៃនេះមានពេលវេលាទំនេរ បងចង់ជូនអូនទៅដើរលេងឱ្យបានសប្បាយចិត្ត!»
    «អូនចង់ទៅមាត់សមុទ្រ ទៅស្តាប់សំឡេងទឹករលក ហើយចង់ច្រៀងចម្រៀងឱ្យបងបានស្តាប់» ថេយ៉ុង បានលើកសំណើរឡើងរួចរាល់ ជុងហ្គុក ក៏បានយល់ព្រមដោយគ្មានចិត្តស្ទាក់ស្ទើរគេអាចធ្វើតាមចិត្តចង់របស់ភរិយាបានគ្រប់ជំហ៊ានធ្វើយ៉ាងណាក៏បានឱ្យតែភរិយាសប្បាយចិត្តមានក្តីសុខគេជម្នះធ្វើបានគ្រប់រឿងរ៉ាវទាំងអស់លើកលែងតែការឈោងចាប់ក្រសោបយកព្រះចន្ទដែលគេមិនអាចធ្វើបានតែប៉ុណ្ណោះ។
     ចាកចេញពីហាងកាហ្វេទៅ អ្នកទាំងពីរបានត្រៀមរថយន្តនិងរបស់ប្រើប្រាស់សម្ភារៈជំនួយជាច្រើនទៀត រៀបចំយ៉ាងរៀបរយយកទៅដើរលេងកម្សាន្តជាមួយគ្នា។
     នៅតាមផ្លូវដីលំសក្បុសហ៊ុយលម្អងធូលីដីឡើងទ្រលោម រថយន្តធុនតូចមួយគ្រឿងនេះចេះតែបន្តបរទៅមុខយ៉ាងលឿនស្លេវ។ ជំនោខ្យល់បក់រវីចៗនៃកំណើតធម្មជាតិបានរត់ប្រដេញក្រសោបរាងកាយអ្នកទាំងពីរដែលកំពុងតែធ្វើដំណើរ ស្ថិតក្នុងរថយន្តបង្កឱ្យមានបរិយាកាសកាន់តែស្រស់ស្រាយ។ មេឃក៏ប្រែទៅជាស្រទុំល្អណាស់ បរិយាកាសនៅពេលនេះសម្រាប់ពួកគេគឺល្អបំផុត។