لف سعود من حس بهدوءها وفز وهو يشوفها تفقد وعيها سعود وهو يحاول يوعيها: وجد وجد الوجد يابنت
اخذ مويه وهو يرشها عليها بردت اطرافه وهي م تستجيب له صرخ بكل صوته: ووجججددد
لف ابو صقر على بندر: تسمع صوت!
بندر: مدري كاني سمعت صياح
طلع عليهم صقر من الخيمه: سمعتوا!
ابو صقر: ايه
بندر: امشوا نروح من هنا الصوت جاي
اخذ صقر سلاحه ومشوا صغر عيونه ابو صقر: سيارة سعود!!
ركض صقر وطاح سلاحه من يده وهو يشوف سعود يهز الوجد بشكل مجننون ويحاول يصحيها تقدموا ابو صقر وبندر
بندر: سعود علامكك البنت وش بها؟؟
سعود بخوف: مدري مدري فجاه فقدت وعيها ومو راضيه تصحى
ابو صقر دفهم وتقدم يشيلها من حضن سعود ويطلعها برا السياره ويرفع راسها اخذ مويه وهو يمسح على وجهها بخفيف وينفخ عليها فتحت عيونها بثقل وهي تتمتم بكلمات متفرقه
ابو صقر: بسم الله عليس وجودي قومي قومي يا ابوي انتي
فزت وثبتها ابو صقر: سمي سمي
الوجد وهي تحاول تستوعب: وش فيني
ابو صقر: مافيس شي سمي بالله
سمت وتقدم لها صقر يحضنها ويقرا عليها وهي ساكنه في حضنه
ابو صقر: سعود رجع السياره قريب للمخيم
سعود: اركبوا
ركب سعود وابو صقر قدام وفي الخلف بندر وصقر في حضنه الوجد وباقي يقرا عليها وحاضنها له نامت في حضنه
وصلوا للمخيم ونزلوا
صقر: سعود البنت نامت خلك عندها
سعود: ابشر
فتح سعود الباب وهو يرمي نفسه جنبها ويقربها لحضنه ويغفو
الفجر/
ابو طلال: الصلاه ياعباد الله
صحوا الشباب والحريم وهم نايمين من بدري وتوجهوا يصلون
ابو طلال: عبيّد(ابو صقر) شفت الرجاجيل اللي وزعتهم رح جمعهم يصلون اعجل
ضحك ابو صقر وتوجه قريب من خيمة سلطان ونطق: سليطييين قم للصلاه
ونفس الشي عند خالد وفعلاً تجمعوا كلهم حتى البنات رجعوا للمخيم
توجه ابو صقر لسيارة سعود ودق القزازه
فتح عينه سعود وهو يلف ويرفع نفسه للامام وشاف ابو صقر اشر له ابو صقر بمعنى الصلاه وهز راسه سعود
رجع ناظر الوجد ونومتها في حضنه مد يده لراسها يسمي عليها وينزل
بعد الصلاه والشروق/
ابو صقر: مشينا يا رجال
فزوا كلهم يرتبون ويفكون الخيام ويركبونها مع غيث ورعد في الشاص ورجعوا يتوزعون لكن هالمره غير المتزوجات مع ازواجهم
على ابواب الديره/
محمد وهو يطلع راسه: يالبييه
ضحك ابو صقر: دق على غيث ورعد شف وش فيهم تاخروا
اتصل محمد ولا ردوا
ابو صقر: استودعتهم الله الذي لا تضيع ودائعه يارب اني في وجهك
وصل الكل لبيوتهم عدا غيث ورعد
في بيت سعود/
نزل وفتح بابها وهو يسندها له
الوجد: ليه جبتني؟
سعود: وش اسوي اجل!
الوجد: ودني عند امي
غمض عيونه بقل صبر وهو يمشيها معه يدخلها للبيت
نزلت عبايتها ورمت نفسها على الكنبه وهي تناظر السقف بشرود تام
قرب لها سعود: وجد اجلسي اكلمس
جلست الوجد ورفعت عينها له: ايوه
سعود بتردد: ليه كنتي تبكين البارح؟
الوجد: مابكيت
سعود قرب لها: شفت دموعس على خدس وانا احاول اصحيس
الوجد بجحده: ما بكيت
وقف سعود: قومي نامي ف السرير
طنشت وهي ترتمي على الكنبه وتنام طلع سعود من الحمام وهو يشوفها نايمه على الكنبه تقدم وهو يشيلها وينزلها على السرير ويعدل المفرش
