في المستشفى/
واقفين عند باب غرفة العمليات وصقر جالس فالارض بصدمه يتذكر مشهد ابوه وهو يطيح لانه دخل على سقوطه
بندر ومحمد يمترون الممر رايح جاي والباقين رايحين يشوفون وش فيه الفهد ويتاكدون اذا هو بخير ولالا ووش صار فيه
طلع الدكتور ووجه منقلب وقربوا له كلهم عدا صقر اللي مو قادر يتحرك من مكانه
نطق الدكتور: انا اسف لكن المريض دخل غيبوبه
صرخ محمد في الدكتور بقوه: وش تقول وش غيبوبته ماهو من صعوبة العمليه كيف غيبوبه وش تقول انت!
بندر: محمد اصبر اصبر فيه خطأ خلني اتأكد
صقر جاثي في الارض على اقدامه ولا تكلم ولا رد من الصدمات
دخل بندر مع الدكتور بالغصب وغمض عيونه بقوه وهو يطلع لاخوانه
فز محمد: بندر تكفى يابندر لا تقولها
لف بندر لصقر اللي ما تحرك من يوم وصلوا وقف ف الوسط وهو يناظر عيون محمد ونطق: ماهوب ابوي
صرخ محمد وهو يحضن بندر بكل قوته ويبكي ويحمد ربي اما صقر نزلت دموعه وحنى راسه بين اقدامه يشد شعره بكل قوته وهو يتمتم بالحمد والشكر لربي ودموعه تتسابق على خده
دخلوا باقي ال صقر بسرعه يركضون يدورون ابو صقر وعياله
شافهم ابو طلال وصرخ فيهم: وين اخوي!
تقدم له بندر : سم بالله ياعمي ابوي باقي ف العمليات وبخير ماعليك
تنفس ابو طلال بهدوء: الله يخارجه الله يخارجه
بندر: امين امين ماعليك لا تشيل هم بخير هو
رفع راسه صقر وتقدم لغيث: الفهد وش فيه؟
غيث ابتسم: ماعليك بس حادث وهو بخير
صقر عقد حجاجه: وهو وينه فيه؟
غيث: في القسم الثاني
قرب لهم بندر وهو سمع الحديث من اول: وش الاضرار اللي جته!
غيث: يده انكسرت ورجله كذلك اما السياره راحت تالف
بندر: في ستين داهيه السياره اهم شي هو بخير
غيث بهدوء: هم قالوا لابوي ان صاحب السياره مسوي حادث ولا عنده نفس وينتظرون الاسعاف حسبي على من كلمه في هذا اليوم
صقر زفر بقوه: بندر ليه ما علمت لنا انه مريض!
بندر لف يبتعد: حلف ما اعلمكم
مشى خلفه صقر وضلوا ينتظرون العمليه تنتهي وبعد وقت طويل خرج الدكتور وابتسم في وجه بندر: دكتور بندر الحمد لله على سلامة الوالد
ابتسم له بندر: الله يسلمك بشر!
الدكتور: الحمد لله انتهت العمليه على خير والحين ينقلونه للتنويم تقدرون تدخلون له لكن بيضل عندنا مايقارب الثلاث اربع ايام
بندر: تمام يعطيك العافيه
الدكتور: الله يعافيك حق وواجب وتراني نقلته لجناحك الخاص هنا
ابتسم له بندر: جعلك والله تسلم يا ابو عامر
ابتسم له ومشى
صقر بتسرع: وينه فيه جناح اخلص علي بشوف ابوي
دخل الفيصل وامه معاه: اعجل امي بيوقف قلبها
لف عليه صقر بحده: وررععع
الفيصل انخرش: بسم الله عليها بس قصدي يعجل
طلعوا للجناح ودخل عليه اخوه والشباب كلهم رفع عينه لهم ابو صقر وابتسم: يالله حيهم
ابتسم ابو طلال: الله يحييك يرحب في المستشفى الحمد لله على السلامه يا عبيّد اخر الاوجاع وانا اخوك والله ان اصلك حتى وشوف الخشخشه
ضحك ابو صقر بهدوء: ما خشيت شيء والله يسلمك يا اخوي
طلع ابو طلال وعياله ودخلت فاطمه ومنال
رفع عينه ابو صقر وهو يشوف عيون منال الراجفه تناظر له وهي تتلألأ ابتسم بهدوء: تعالي تعالي لا تبكين
تقدمت لابوها بهدوء وانحنت عليه تحضنه رفع يده على ظهرها وسرعان ما اجهشت تبكي في حضنه: ليه ليه تسوي كذا ما تعلمنا ليه تخبي علينا وتخوفنا عليك
مسح على ظهرها ابو صقر: ماهو زين لس تبكين وهذا انا بخير قدامس
ارتفعت عنه منال: الحمد لله على سلامتك
ابو صقر : الله يسلمس لف لعياله: الفهد وين؟
تقدم غيث وهو يشرح له كل شي ويبوس راسها وكتفه وماسك يده يشد عليها: الحمد لله على سلامتك يا ابوي
ابو صقر: الله يسلمك يا غيث
تقدموا كلهم يتجمدون له بالسلامه وفاطمه وصقر واقفين ما قربوا له
ابو صقر ناظرهم ونطق: مافيه الحمد لله على السلامه؟
تقدم صقر بهدوء لابوه وهو يبوس راسه وكتفه ويده ونزلت دمعته على صدر ابوه : الله يخليك لي لا عاد تتعب نفسك تكفى
ابو صقر رفع راس صقر: امسح دمعتك يا صقيران امسحها
بلع غصته صقر وهو يمسح دموعه لكنه خلا كل اللي ف الغرفه يبكون اللي بصمت واللي اجهش بكي وفاطمه تبكي بصمت وتقرب لزوجها مسكت يده: الحمد لله على السلامه ياعبيّد ولا عاد تخبي عني شي
ابتسم ابو صقر: ابشري
رفع شماغه رعد يمسح دموعه بلا فائده حضنه غيث وهو يسمي عليه ولفوا كلهم بسرعه من الباب اللي انفتح وضحك بندر بكل صوته وهو يشوف الفهد مكسر وجايهم: وش جايبكم؟
بكى الفهد بقل صبر وخوف ورعب ونطوا له اخوانه يسندونه ويقدمونه لابوهم ابو صقر خاف من منظر الفهد ومن بكائه عدل السرير وهو يجلس ويحتضن الفهد: علامك يا ابوك ليه تبكي؟
الفهد رفع راسه لابوه ودموعه تنزل بسرعه: خفت خفت يا ابوي لا تروح تكفى تكفى لا تخليني والله اني بدونك ولا شيء والله اني يوم شفت الموت بعيوني مافكرت غير فيك لا تروح وتكسرني لا تخليني
عقد حواجبه ابو صقر وهو يقرب الفهد من حضنه ويحاول يهديه وهو اول مره يشوفه يبكي لان الفهد دايم فرفوش وونيس ولا قد بكى غير في صغره قرب لهم صقر وهو يسحب الفهد ويجلسه جنبه ويمسح وجهه المويه: قول بسم الله هذا ابوي بخير قدامك كان من البكبكه
محمد اللي يحاول يغير الموضوع: انت اول من بكا وبكانا كلنا اسكت وسكته اشوف وسكتهم كلهم
ابتسم الفهد بهدوء: حسيبكم ربي ما خليت ممرض ولا ممرضه ما تعاركت معه عشان اجي وانا بذي الحاله
ابتسم ابو صقر: الحمد لله على سلامتك
الفهد: الله يسلمك
قربت منه فاطمه وهي تمسح دموعه وتمسح على شعره بخفه وتناظره نطقت: الحمد لله على السلامه يا الدجاجه
ضحكوا الشباب على امهم وضحك الفهد وهو يبوس يدها: جعلني فدوه
ابو صقر: امشوا ارجعوا للبيت كلكم
صقر: والله ان ارافقك
ابو صقر: رح لبيتك
صقر برفض تام: والله ما اروح واني م اطلع للبيت الا معك
ابو صقر: زين الباقين يله كلكم على البيت
فاطمه: قوموا وانا امكم هيا
طلعوا الشباب بعد مهاوشه من ابوهم واتجهوا للبيت
