الرجاس

البارت الثاني

بسم الله الرحمن الرحيم
اللهم صلِ على محمد وآل محمد
بقلمي الكاتبه حوراء
الرجاس
_________17/6/2024_______
ريم

يوم جديد
بدايه جديده

واكفه بالمطبخ أرتب بالكيك والحلويات
اليوم عازمه صديقاتي من بعد الامتحانات ما شفتهن
فقررنه ننجمع واني عزمتهن بـبيتنه
حولت نظري على الساعه بـ 4 العصر

تأفأفت بـملل واني أردد بداخلي
وين هذني يمته يجن

دخلت ترتيل وتقدمت يمي وهيَّ تسمع تأفأفي گالت
_ شبيچ تأفأفين

ريم: مو چنهن البنات تأخراً شوفي الساعه صارت بـَ 4 وهنَّ بعدهن

دارت وجها تباوعلي بعد ما چانت نظراتها على الساعه الي بيدها وردت
_ اي يا عيني انتظري بعد وكت شوفي الشمس عاليه والجو حار وين اكو واحد هسه يطلع

اريد ارد عليهَ
وسمعت رنت الجرس صفگت بيدي بحماس ركضت افتح الباب واني ارد
_ وصلن وصلن
ضحكت بفرح واني اشوف صديقتي هُدى صديقة الطفوله
اول البنات واصله حضنتهَ واني اگوللها
_ وين صرتي تأخرتي لا انتي اجيتي ولا اي وحدة من البنات شسالفتچن

ردت عليه وهيَّ تهفي على وجهَ

_ ولج ريموو شوفي الحر بربچ اني طلعت من بيتنه عبرت بس بيتين واحس روحي ذابت من الحر
اخر لحضه ردت ارجع للبيت بس كملت واجيت

_ ديلا ذابت شنو جكليته وذبتي
ضربتني على كتفي وهيَّ تمشي لداخل البيت وتحجي
_ خايبه لازمتني بالباب بـ هل حر ودك اسأله اكلچ ذبت من الحر وانتي ولا يمج بعدج مكمله اسئله وتصنيف هسه على الأقل دخليني لجوه واسئلي

ضحكت واني امشي وراها دخلنه صارت بوجهنه امي وترتيل طالعات من المطبخ
ابتسمت امي وهيَّ ترحب بيهَ

_يا هلا بـ الي جانه

ضحكت هُدى وهيَّ تتقدم تحضن امي وتبوسه وترد عليهَ
_ هلاوو خالتوو شلونج

_ هلا يبعد خالتچ الحمدلله على الله  امچ شلونهَ

فرت أيدها هُدى وبشقه كالت وهيَّ توجه الكلام اليَّ
_ شفتي ريمه امچ شفتيها حتى شلونج ما كالتلي رأسن سألت على حبيبت الگلب

ضحكت وامي هم ضحكت وهيَّ تضرب هدى على رأسهَ بـخفه
_ عابت مو لسان غير اسأل على صاحبتي انتي شنو هياتچ گدامي عليمن اسأل على صحتچ

زاد صوت ضحكتي واني اشوف هُدى تخلي أيدها على عيونهَ وسوت روحها تبچي وهيَّ تصيح
_ لا لا خاله جرحتيني لا اني رايحه زعلت ابد ماريد لا تحاولين زعلت ابد حتى العزيمه مرفوضه ماريدها