الرجاس

البارت الخامس

بسم اللّٰه الرحمٰن الرحيم
اللهم صلِ على محمد وآل محمد
بقلمي الكاتبه حوراء
الرجاس
________________________
ريم

تمر الايام بهدوء
نفس الروتين ينعاد كل يوم
اكل نوم شغل تلفون والخ....

گاعده بالحديقة على المرجوحه اشتاقيت لـهُدى
وكعداتنه
ضليت افكر شصار انخطبت اتزوجت مرتاحه وي ابن خالها
معقوله گدرت تلعب علينه
لو اكو سر مخفي
عقلي ما راضي يستوعب هُدى چانت تلعب على محمد وعلينه كلنه

چنت منزله راسي اباوع للزرع حسيت أحد گعد يمي رفعت راسي اريج مكتفه اديهَ وعابسه وجهه
ضحكت على تعابير وجهه

_ شبيچ عابسه الوجه

باوعتلي بطرف عينهَ وردت من ورى خشمهه
:– ضايجه اروح لأمي اگوللهه يمه ضايجه تگلي نضفي البيت اگللهه اريد اطلع تگلي روحي للحديقة افتري بيهه

ضحگت من كل گلبي على گلام امي هاي دائماً هيچ تگوللنه
رديت عليهه واني هلكانه من الضحك
:– وانتي خذيتي گلامهه واجيتي للحديقة

كملت كلامي ورجعت اضحك غمتني بثنين اديه واني أزيد بالضحك يمكن من الضوجه ما اصدگ اسمع شي واضحك عليه

اريج :– هسه دكافي شبيچ ترى الضوجه واصله لراسي انطيني حل اريد اطلع

سكتت أخذت نفس ورديت
:– ترحين وياي لهُدى

دارت وجهه تباوعلي بصدمه
:– هُدى صديقتنه ما غيرهه

هزيت راسي ورديت
:– اي هُدى صديقتنه

عگدت حواجبهَ بغضب وردت
:– وشتسوين ترحين الهه

_ ماعرف بس اريد افهم منهه ليش هيچ سوت بينه ليش كسرت اخونه لهسه مجاي اصدك هُدى يطلع منها هيچ شي اكو شي احنه ما نعرفه
لچ اني وياچ أكثر اثنين نعرفهه من الطفوله هيَّ صديقتنه تتصورين هُدى يطلع منها كل هذا
ماعرف ليش گلبي ماراضي يصدك

رفعت اكتافهه بمعنى ماعرف وهيَّ تگول
اريج :– ماعرف حتى اني مجاي اصدك يعني حسب كلام محمد بيوم التخربط سمعتي شحچه
يصيح مساع الظهر اني اخابرهه وگتلهه على الخطوبة ما گالت مخطوبة لابن خالي

يعني بكلامه هذا شي مؤكد محمد عنده علاقه وياهه بس المحيرني ليش چذبت عليه وسوت نفسهه تحبه واذا هيَّ بالفعل تحبه ليش رضت تتزوج ابن خالها ليش ما گالت لمحمد هيَّ انخطبت لابن خالها شنو الشي الي يخليهه ترضى تتزوج ابن خالها وتعوف محمد حيره والله حيره