الرجاس

البارت الثالث

بسم الله الرحمن الرحيم
اللهم صلِ على محمد وآل محمد
بقلمي الكاتبه حوراء
الرجاس
____________________________

ريم

كُلنه صفنه على ابوي وهوَّ يگول
_ حضروا نفسكم باچر طالعين للبصرة

تقربت امي يمه وهيَّ تباوع بعيونه
_ شنو تحچي للبصرة للبصرة متأكد

هز رأسه ابوي ورد عليهه بتأكيد
_ اي للبصرة

ريم : شعدنه رايحين للبصرة

سكت ابوي لثواني تنهد وكمل كلامه
_ نروح لاجدادكم

عم الهدوء بالمكان فزينه على شهكت اريج وهيَّ تگول
_ أجدادنا ليش منين النه اجداد غير ميتين شنو دافينهم بالبصرة

رد ابوي عليهه وگال
_ لا ما ميتين اهلي عايشين وبالبصرة
الما تعرفونه انتم عدكم اجداد وعمام وعمات

شهكت وحچيت بصدمه
_ عندي عمام واجداد وعمات

هز رأسه ابوي وكمل كلامه
_ اي عندكم
   اني اهلي بالبصره
ابوي وامي واخواني وخواتي

تقرب حسن يم ابوي وسأله
_ ليش ما كتلنه عندك أهل ؟ سولفلنه ليش ضميت عنه هذا الشي؟

مد ابوي أيده للماء أخذه شرب شويه ورجعه وبده يسولف بدون انقطاع
_ عندي ثلاث اخوان واربع خوات
ابوي شيخ العشيرة
لمن تزوجت امكم وصار عدنه محمد بيوم صارت عركه بيني وبين ابوي على شغله
وطردني ابوي من المنطقه اجيت سكنت كربلاء لأن قبل چنت دائماً اجي لهنا اشتغل واعرف أكثر مناطق كربلاء

انقطعت اخبار اهلي ومابعد رحتلهم لمن انولدت ترتيل اخذت امكم ومحمد وترتيل ورحت للبصرة اصالح ابوي

بس للأسف ابوي مارضه يصالحني ورجع طردني كدام الكل
طلعت منهم ووكفت بالباب درت على ابوي وگتله
   وجهي بعد ما تشوفه ولا تسمع خبر عني بس خبر واحد اخليك تسمعه عني وهوَّ خبر موتي

رجعت لكربلاء وبالفعل بعد ما رحت ولا وصلت للبصرة حتى اخواني مايندلون بيتي ولا مكان عملي ضيعت نفسي وخليتهم ما يندلوني

سكت وغمض عيونه بألم انطيته ماي شربه حمحم ورجع يكمل واحنه على نفس الهدوء محد حچه كلمه

_ بس هسه اختلف الوضع لازم تروحون وتعرفون اصلكم اجدادكم اعمامكم
لأن اني ..

أخذ نفس وكمل
_ لأن اني مريض بمرض سرطان

شهكنه كلنه مصدومين شنو شهل كلام
لزمته امي من أيده وهيَّ تبچي وتصيح
_ شنو هل كلام شنو مريض من يمتى مريض احچي لا تسكت

حضنهه ابوي يطمنهه
_ لا تخافين اريدچ قوية كلشي يصير الاولاد
بـ امانتچ ماريدچ ضعيفه