بسم اللّٰه الرحمٰن الرحيم
اللهم صلِ على محمد وآل محمد
بقلمي الكاتبه حوراء
الرجاس
–———————————
ريم
من بعد ساعات نوم بديت احس بأصوات يمي
فتحت عيوني شويه شويه واركز بالمكان الـ اني بي
وجوه ملثمه ، مكان وسخ ، اناره خفيفه
بلعت ريگي اليابس وحاولت اركز بوجوهم چانوا مقابيلي گاعدين على شكل دائره يسولفون
كلهم ملثمين بس العيون طالعه غمضت عيوني اسمع لكلامهم ماريد يشوفوني گاعده
ـ نخليها اهنا ونضل نبتز بأخوانها الگواو*يد ونعلمهم اللعب ويانه شلون يصير
_ لا تنسى حتى هيَّ چانت مشاركه اخوانها
ـ اعرف اعرف هاي الضربه الي بوجهي هيَّ ضربتني اطلع حقها أطلعه
:– شلون تطلع حق الضرب
ضحك بصوت عالي مخيف ورد
ـ اضربها نفس الضرب وبنفس الأماكن
انتفض واحد رافض
::– عيب علينه نضربها تبقه بنيه واحنه زلم بعدين احنه نريد نأدب اخوانها هيَّ عوفوها
بقوا يسولفون بـ أشياء غامضه خلتني اخاف منو هذوله ؟ وشيردون منه ؟
رجعت فتحت عيوني اباوعلهم التفت واحد منهم باوعلي والباقي من شافوه يباوعلي كلهم باوعوا وراه
گعدت على حيلي بعد ما چنت متمدده بالگاع خازرتهم أبين قوية بس داخلي يرجف من كلامهم
تقدم أول واحد باوعلي واجه گعد مقابيلي قريب عليه لا رجعت لوره ولا سويت شي ماريد أبين ضعفي الهم بقيت خازرته
رفع حاجبه متفاجئ
ـ خاطفينچ وخازرتنه لا خايفه ولا شي شنو هل قوة
سكتت مارديت عافني وگام رجع يمهم مدري شحچه وياهم حطوا وطلعوا بعد ما قفلوا الباب
لزمت ايدي الترجف بأيدي الثانيه اهدء من رجفتها ثواني رفعتها امسح وجهي بعنف خايفه باوعت للمكان اتفحصه
مثل المخزن حيل چبير بس متروس غراض وأشياء قديمه مساحه قليله فارغه
گمت افتر بين الغراض اتفحص بالمكان بلعت ريگي جسمي كله يرجف
اني وين ؟ هذوله منو ؟
شنو يبتزون اخواني بيه ليش اخواني شـ لاعبين وياهم ؟!
اني شـ دخلني ؟ منو هذا الـ اني ضاربته ويريد يرجع الضرب إليه ؟
أنت تقرأ
الرجاس
Randomفي احد بيوتِ كربلاء عائلة تحاوطها الحنية من كُل مكان سراً ينكشف صدمةً للأولاد يفقدون امانهم ويعيشون المأساة حباً اصبحَ عذاب قلوب ذائبة بتفاصيل الحبيبات معاناة الحب تمر على كُل الحبيبان مشكلةً اجتمع بها عاشقان خطفٌ شجاعةٌ معاناةٌ دموعٌ تسيرُ ع...
