الرجاس

البارت السادس

بسم اللّٰه الرحمٰن الرحيم
اللهم صلِ على محمد وآل محمد
بقلمي الكاتبه حوراء
الرجاس
_________________________

ريم

كربلاء / الفجر

غسلت وجهي غيرت ملابسي ونزلت للصاله
صبحت عليهم وگعدنه ناكل
اليوم مشية احمد وقررنه نروح كلنه للبصرة

بعد ما خلصنا اخذنه جنطنه صعدنه سياراتنه وانطلقنه للبصرة

وهل مره ما نمت الطريق كله اباوع للطريق
لحد ما وصلنا نزلت متكسره رجليه خدرانه

تلگونه جدي وعمامي والولد
تقدم جدي وهوَّ يحضن ابوي
:– هلا بوية شلونك شلون صرت تأخذ علاجك شلون صحتك متأذي بيك شي بوية

_ سلامتك بوية الحمدلله على اللّٰه أنته شلونك

هز رأسه جدي وهوَّ يرد
:– الحمدلله

تقدم جدي النه وأبوي راح على عمامي يسلم
:– هلا بيچن بوية شلونچن تعالن بعد جدچن هلا بالبنيات

وحده وره الثاني مشينه نبوسه برأسه هاي من عاداتهم
بعدها رحنه على عمامي كذلك سلمنه عليهم

وأخيراً دخلنا لجوه اتلگنه البنات حضنتهن وأسلم عليهن حيل تعلقت بيهن بالرغم ما صارلنه هواي من تعرفنه بس حيل حبيتهن وهنَّ كذلك يسلمن علينه بأشتياق

رحنه على بيبيتي هم وحده وره الثانية تسلم عليها
وهيَّ تحضن بينه حيل وتردد
:– يمه هلا بيچن بنات الغالي نورتن البيت

خلصنا صعدنه غراضنه وهل مره الغرف منظفه وجاهزه

دخلت طلعت تراك على السريع سبحت وبدلت لفيت حجابي ونزلت

البنات منتضراتنه اول ما نزلت گعدنه كلنه بالصاله نسولف وحور تقلدلنه على احمد وعلي من تعاركوا

للظهر صبينه الغده تغدينه وخلصنه بدن البنات يحضرن الچاي لأن اغلب الشيوخ بدت تجي

الولد كلهم صعدوا يبدلون واحنه ضلينه وي البنات بالمطبخ نحضر وياهن

صاحني محمد اروح اكوي دشداشته
صعدت لغرفته وضليت اكوي بيهَ

ريم : شعجب لح تلبس دشداشه

:– مو الولد من أمس گالولي كلهم لح  يلبسون دشداشه وكت المشيه بس العريس يلبس رسمي
فـ اني استحيت البس لبس رسمي جبت دشداشه

_ اها حلو 

سكتت وهوَّ ضل يطلع غراضه من الجنطه
خلصت كوي وطلعت افتريت على باقي اخواني هم كويتلهم