مُنقذي سبايا داعش

"البارت التاسع عشر"

رواية مُنقذي سبايا داعش
للكاتبة وردة الشيخ محمد

"البارت التاسع عشر"

""""""""""""""""""""""""""""

رجلي كُل دقايق يصير بيها خدر لدرجة اعض شكو شي كدامي و ابجي بصياح من الوجع و لا اكو حبوب تهديني و لا اكو ابرة تخفف عني ألمها و وجعها و مرات تعرگ بسبب الشاش تفرفحني و تحركني و مشي ما اكدر امشي عليها باقية اطفر على رجل وحدة من احتاج حمام بقيت وحدي اصوات بعيدة كُلش صوت رمي بس خفييييف بالتركيز يـلّا ينسمع حسيت احتاج اسبح و ما عندي ملابس ألبس بقيت متقيدة صارلي هواي مسابحة استحي اسبح و هوَّ موجود و اخاف يفوت و اني دااسبح بقيت محتارة و اكثر شي اسوي اغسل وجهي و اذب على راسي مي و على جسمي مرات ينزل مي وصخ و مرات تضخ و ما اعرف شنو السبب و ما اعرف أصلاً اني وين و وين مكاني اني من ذاك اليوم ركبتي خرزت من الصريخ وضلت توجعني بيومها تأخر ابو الحُر هواي استغليت الفُرصة حسيت الوصخ اكلني اكل جان ينگل بالعلاليك و يضمهُم بالغُرفة هوَّ اصلا كرفان جان مو بيت مبني و صغير جان قافلها حاولت افتحها مقفولة رحت للغُرفة ألي بصفها ام البردة هيَّ صغيرة كُلش و بيها علاليك شفت دشداشة معلكة سحبتها و بالكاع بالزاوية محطوط شامبو و ٣ شفرات حلاقة و عطر صغير زيتي ريحتو قوية خربت ضحك

ريام: عود هوَّ نضيف الدويعشي

اخذتهُم و رحت للحمام لفيت رجلي بعلاكة و سبحت و نظفت نفسي و غسلت ملابسي من يوم ألي طلعت بي من بيت الحجية لـهذا اليوم اني مسابحة حسيت هَم و انزاح مني شفت جسمي ضال بس عظام حتى عظام القفص الصدري طالعة.. ارتاحيت و المي بيه برودة ريحت جسمي و ريحة الشامبو هدأتني لبست دشداشتو و طلعت ما اعرف نحنُ وين و بيا منطقة فتت للغُرفة ألي بيها بردة اخذت من العطر و خليت ورة اذني دحكت على الزاوية جوة العطر ماشة سودة شفتها و رجعتها لـ مكانها و اشيل بالدشداشة و اعرج و اطفر چني هَبلة..

رحت للسرير و افتر و احسب ٦٠ دقيقة اكمل و ارجع احسب ٦٠ وراها
و اغفة و ارجع احسب لا اني ميتة و لا اني عايشة عيشة البشر.. كمت اضرب بملابسي بالكاع لحتى تنشف و ألبسها قبل ميجي اخر شي ذبيتها على الصندوك صار عندي فضول افتحو دحكت بيه هماتين مقفول الكنتور هَم مقفول كعدت على الصندوك و ادحك المكان خنكة كعدت ابجي لزمت راسي شعر ماكو ايدية و جسمي كُلها اثار بنفسجية و بُنية و حَمرة و اثار حروق متطشرة بجيت اكثر 

مروحة ماكو شباك ماكو صوت الماي ينگط بالحمام خنكني اكثر صارت بية حالة نفسية و اريد اركع راسي بالحايط صحت

ريام: كاااااااافيييييي

رحت للحمام اريد اسد الصوت ماكو تخبلت كمت اضرب بي و ابجي

ريام: عفية كافي عدمووووووت

كعدت بالكاع لميت نفسي و بجيت