مُنقذي سبايا داعش

" part 1 الجزء الثاني "

رواية مُنقذي سبايا داعش
للكاتبة وردة الشيخ محمد

" part 1 الجزء الثاني "

""""""""""""""""""""""""""""

بين طيات الزمن و بين فجواته التي تُخلق سحاباً مُمطراً في اضلعي..
و بين حُبي و عشقي و هيامي به
و بين لوعتي و آهاتي التي تقرحت منها حُنجرتي.. معكُم لأكمال باقي قُصتي..
عدتُ.. لعلكُم تأخذون العبر منها كما اخذت..

""""""""""""""""""""""""""""

بعد يومين عيد ميلاد رُمح و هوَّ بالدوام و كاعدة اجهز هذا اول عيد ميلاد الة وياية و أصلاً حتى ناسي و ما يعرف شوكت انولد و ميهتم بهالامور نهائياً و عندة شغلات تافهة و مَتسوة.. غريب هالرجال و اتوقع اغلب الرجال العراقيين ميهتمون بهيج اعياد الميلاد و المُناسبات
اكثر شي احنة البنات نخبص الدنيا، طلبت من خالتي تاخذني للسوك جنت حامل بنهاية الشهر الخامس و عندي بطن فرحانة بيها لان مبينة راسلتة علمود يكون عندة خبر و رحت بدلت و نزلت علما حنين تبدل لان تتأخر و تشلع الگلب و خالتي بس تصيح عليها..

_ لج يُمة حنين خرب لشتج رايحة عرس فضيهااااااا عاد

ريام: خالة ما عدنة شي خليها ههههههه

_ يُمة شنو خليها موتتني ما شايفة هلكد وحدة تتأخر هسة منو رايح يشوفج لج حنين راح اعوفج والله

حنين: اي اجيت يُمة شساااالفة غير دالف شالي

_ هاي شمسوية بروحج طايحة الحظ والله لو يدري اخوج يحش رجلج حش

حنين: يُمة هسة امشي والله ما اتوتس شبيج ليش هيج

_ حشة مو نسوان لو حجينة حرف يمدن لسانهن هالطولة والله بنات هالوكت

حنين: ها يُمة ترا اخابر علي عذاب و اخلي ياخذج لدار العجزة

_ امشي امشي شلون ادبسزز

يتناگرن و اضحك شلون تهددها بعلي عذاب و خالتي تضوج لان تشوفة بالنت شلون اكو عالم تذب اهلها و تنقهر عليهُم و تگابلة و تبچي و حنين تتشاقة وياها بيه.. خابرت خالتي للولد الي ياخذنة للسوك و يطلعنا على معرفتهُم بيه خوش ولد لا يباوع و لا الة علاقة بشي حجت حنين..

حنين: يُمة هسة ثبرتيني حتى حُمرتي صارت صفح و ما اجة محمد

_ وين مولية هوَّ رايحين للسوك نتسوك و نجي قابل نتونس

حنين: يُمة هوَّ اني اتونس من اطلع للسوك عبالك رايحة عرس

_ سدي حلكج ترة والله اكول لأخوج يلعب النعال على ظهرج لا تشلعين گلبي

حنين: اووووووف منج اووووف

ريام: كافي ولج هههههههه خطية