لا تخافي عزيزتي(مكتملة)

مناقشة مهمة للنهاية

السلام عليكم

عاملين ايه وحشتوني.... كنت حابة اني اتناقش معاكم شوية في النهاية بخصوص الاسئلة الكتير منكم بعد ما خلصتوها ولانها اتكررت فقولت هوضحها شوية ليكم 🫶🏻

عقاب دعاء

كتير منكم شايف انها متعاقبتش كفاية؟!!

هو بس كنت عايزة اعرف العقاب بالنسبة ليكم بيكون عامل ازاي قبل اما ابدأ؟

____

خلينا واضحين سوا..... كل واحد فينا بيغلط
بس فيه نوعين مننا
نوع غلط وتاب وربنا حط عليها غطاء ستره
ونوع تاني غلط ومتابش ولا اعترف بغلطته ولا حاول حتى انه يصلحها فالطبيعي ان حجاب الستر دا يتشال من عليه 🤷🏻‍♀️

زي مصطفى *

ربنا ستر عليه اول مرة لما موت اخوه الصغير وتاني مرة لما موت جدته وتالت مره لما موت شهاب

ولسه ربنا مديله فرصة انه يتوب... اداله تلت فرص هو مستغلهاش.... وقام جيه وقاتل الرابع اللي هو علي وهنا كان رصيد الستر خلص عند ربنا وكشفه...

_____

نرجع لدعاء اللي فاكرين انها متعاقبتش بس هي عقابها كان صعب اوي.

اولًا ربنا خلالها عيالها الاتنين بيتخانقوا على البنت اللي بتكرهها وبتكره عيلتها ووالدتها وبتإذيها كمان بالسحر و عرض بنتها للخطر وكان ممكن في لحظة تخسر شرفها.
دا أول عقاب

التاني اكتشفت ان ابنها بيتعاطى وانه ماشي في سكة مش كويسة... وانه اغت صب يارا اللي هي بتعملها السحر!!
ودا تاني عقاب وكان اسوأ من اللي قبله وكل مرة العقاب بيزيد بشاعة لو انت متوبتش ولا اعترفت بغلطتك

والتالت والأخير
ان علي فضحها عند عمر وحكاله اللي بتعمله وان ابنها مات موتة بشعة بشعة جدًا ياريته مات طبيعي دا اتقت ل!!

عشان بس انتو بتقرأوا قصة ففاكرين ان الموضوع مش عقاب وانه عادي.. لكن لا يا جماعة لو تخيلناها في الواقع هنحس بوجع كبير اوي وصعوبة تخيله في اي ام.

شايفين بقا المصايب اللي نازلة بهطول على دعاء عشان بس التفتت للاعمال واحنا عارفين انها حرام جدا وربنا مانعنا عنها وانه ذنب كبير على أي مسلم.

عاقبها تلت مرات على اللي بتعمله وهي حست ان دا انتقام ربنا منها عشان اللي عملته في يارا وقررت انها تتوب وافتكروا ان كلمة تتوب دي كلمة كبيرة عند ربنا

رواه ابن حبان في صحيحه، وصح أن النبي صلى الله عليه وسلم قال: التائب من الذنب كمن لا ذنب له.

ولما فقدت ابنها وتابت عن اللي عملته وحست بالذنب فعلًا قررت بنفسها تحكي لجوزها عن اللي عملته لانها شايفة ان هي تستاهل انها تتعاقب مع ان ربها ستر عليها وعمر محكاش اي حاجة عن اللي عرفه ومكانش ممكن هي تحكي وتفضح نفسها بس خوفها على يارا وان عدلي يكون كارهها دا حسسها بالذنب وخلاها تحكيله ان يارا المظلومة من البداية عشان كنت بعمل كذا كذا كذا.

حد غيرها كان استغل لطف الله بيه وستره عليه بس ضميرها مقدرش يسكت عن الحق.

وهنا كان الجزاء الحسن

ربنا خلى ابنها وجوزها يستروا عليها وميفضحوهاش وقدرت حياتها بعد معاناة انها تستقر لانها لجئت لربها مغير الاحوال والستير❤

قد تكون ليكم قصة عادية بس الاغلب منكم هيتعلم منها درس مهم وهو الستر 💕

الستر يا جماعة موجود في حياتنا كلنا وكلنا بنعمل اخطاء ولكن بتفرق ان كل واحد فينا ليه رصيد من ستره ولو خلص يبقى هيتكشف قدام انظار كل الناس لانه كان مستهين بانه مكشوف امام رب العالمين فقط فربنا عرض ذنبه امام الناس كعقاب لتماديه فيها.

تماديه**

ركزوا في الكلمة دي كويس انك تتمادى في الغلط و تكمل فيه وانت حاسب انك ذكي جدًا ومحدش هيكشفك دا ابشع.

______

حابه اعرفكم ان رأيكم كلكم فوق راسي وهحترمه مهما كان حتى لو نقد انا بتقبل اي انتقاد بس يكون بأدب✨ وانا مبسوطة ان الرواية عجبتكم وبتمنى كل رواياتي تنال اعجابكم واتبسط برحلة لا تخافي عزيزتي وانا معاكم 🫶🏻

وفقرة المناقشة لسه مخلصتش
فيه اسئلة كتير انا محتاجة ارد عليها بس محتاجة وقت لاني بكتب رواية تانية ومش فاضية فهتلاقوني كل فترة كده نزلت توضيح لمناقشة معاكم عن شيء انتو سألتوني عليه وكنتم مستنين اجابة انا عمري ما هنفض لاسئلتكم وهرد عليكم كلكم واللي لسه عندو اسئلة تانية يقول في الكومنتات عشان اجاوبوا عليها بس لو السؤال اتكرر هينزلكم علعام عشان يبان للكل زي عقاب دعاء اللي اتسألت عليه كتير والمرة الجاية هتكلم عن عقاب رحاب وعايزاكم تفكروا في نفس التفكير بتاع دعاء وتحاولوا تجاوبوا على نفسكم قبل ما انزل بالجواب ❤

وفي النهاية حابه اشكركم على ارآئكم الجميلة على الرواية وكون ان الرواية عجبتكم وأثرت في قلوبكم فدا بيسعدني اكتر وبيدفعني خطوة لقدام اني اوصل لحلمي وهيسعدني اكتر انكم تقرأوا روايتي الجديدة "موعدنا في زمن آخر"  اللي بإذن الله تنال اعجابكم ❤

دمتم سالمين
ومتنسوش تصلوا علنبي

مريم الشهاوي
رواية لا تخافي عزيزتي