اللهم صل وسلم وبارك على سيدنا محمد
استغفر الله العظيم واتوب إليه.
.
خليل بعد ما صلى الفجر قرر يرد ل دار هبه ..
هو فتح الباب وخش .. لقاها هي راقده وايمن كان مقعمز ويشوفلها بس لما خليل خش قام راسه شافله..
خليل: كانك بتروح روح شوي وبنروح بيها ..
ايمن: لما بتروح بيها تو نروح ..
خليل: صليت الفجر؟؟
ايمن: اي صليته اهني .. مقدرتش نسيبها ..
خليل هز براسه وقعمز على الكرسي..
ايمن: كان... ديما هكي وضعها يا خليل؟؟
خليل صوت ايمن جاه غريب قام عيونه من اخته وشافله ...
خليل: اي .. أطول مده قعدت ممشتش فيها للمستشفى كانت شهرين بس.. وبعد الشهرين هادم رقدت يوم في المستشفى ...
ايمن عضلاته تشنجوا.. حتى ايديه اللي كان حاطهم على فخده انضغطوا..
خليل: مكانتش كويسه يا أيمن.. كانت منهاره متحملتش انك سيبتها ..
ايمن: علاش مقلتليش؟؟ .. علاش مواجهتنيش؟؟
خليل: انت سيبتها .. علاش بنقولك؟
ايمن: اي انا حقير وسيبتها.. انت تعرف مكانتها شن عندي .. المفروض قلتلي .. هي صح تقوى كانت تقولي .. بس مكانتش تقولي انها .. هكي يعني .. او انا متخيلتش هكي الوضع يكون ..
خليل: شن كنت بدير كان قلتلك؟؟ .. بتسيب حناك المريضه وبتجيها؟؟
ايمن كان منقهر وكان واضح فيه من صوته ونظرات عيونه ..
خليل علاش حاس ان ايمن بيبكي .. وبذات توا بعد جابله سيرة حناه ..
ايمن قعد يشوف ل خليل ومردش.. خليل يعرف .. خليل فهمه وهاده شيء كان متخوف منه .. وتهرب من خليل في قطر باش ميواجهاش.
خليل: لما ضربتك في قطر .. ضربتك لأنها قريب ماتت .. لأني قعدت اسبوع كامل نمشي بيها للمستشفى باش متموتش يا أيمن.. كرهتك وقتها .. وكرهت انك غبي وباعدت عليها لأنك تبي تحافظ عليها .. انت بتحافظ عليها .. وهي بتموت لأنك سيبتها ..
ايمن ايديه قعدوا يرعشوا .. ضغط على سنونه .. كان يبي خليل يسكت .. معش يبي خليل يتكلم اكثر..
خليل: تمثل في انك انسان طبيعي .. جبل ما تهزه ريح .. مهما صارله مش حايتأثر .. وانت كذاب .. ضميرك يقتل فيك ..
