سبحانك اللهم وبحمدك سبحان الله العظيم.
.
خليل صكر على وائل وهو متنكد وقارن حواجبه ..
قعد مقعمز جنب فارس فتره لين رن نقاله ..
كان حسين..
باهي تو يرد عليه ..لأنه اعقل واحد فيهم ومش حايدرهله كبده بالكلام ..
حسين: اما مستشفى يا خليل؟
خليل: اللي قريب منكم ..
حسين: باهي كويس .. إن شاء الله مكسرتاش بس..
خليل سكت ..
حسين: مدورش انتم صحاب مش مشكله يصيروا الحاجات هادم .. شوي وجاين احني ..
وصكر ...
فارس فتح عيونه وقعد فتره باش استوعب..
شاف جيهة خليل لقاه يشوف للنقال ويكتب في شيء ..
فارس: شن صار .. تسمم؟؟
خليل شافله: لا ..
فارس قام حاجبه..
خليل رد عيونه في النقال: حصوه في المراره وبعد الفجر عندك عمليه باش يحولوهالك.
فارس رعش: شن تقول! ..
خليل: بسيطه هي .. كان تزيد تخليها بتنفجرلك مرارتك ... وبعدين الكارثه ..
فارس: شن عمليه .. مش مداير .. هات مفتاح سيارتي بنروح ..
خليل: خايف مال؟
فارس: يا راجل كان نموت؟ .. مزلت نبي نمشي للعمره والحج ..
خليل ابتسم: لا متخافش قلتلك عمليه بسيطه والدكتور هاده كويس بكل ومعروف وسألت عليه .. مضمون يعني مش حاتموت ..
فارس تأفف: مش وقتها... تي عرس فوفو و ميمو توا
خليل: شن مال تحسابها عملية ولاده هي؟؟ .. بيطلعولك الحصوه وتمت .. وعرس خواتك مزال متكبرش الموضوع
فارس رمي عليه شيشة الميه: تي نوض اقلب نوض..
خليل قام شيشة الميه وشرب منها وفارس قعد يستغفر وهو متنرفز ..
خليل: انت نوض صحيح من العمليه .. واحضر عرس خواتك وتهنى عليهم .. وبعدين باش نديروا خطبتك ..
فارس شافله بصدمه: خطبتي؟
خليل: اي .. برا شوفلك وحده مناسبه بنت اصل تتحملك..
