اللهم إني أسألك الجنه وأعوذ بك من النار.
اللهم اعفي عنا واغفر لنا وارحمنا برحمتك يا أرحم الراحمين.
.
وجدان كانت مقعمزه قرب الشط بروحها وفاتحه نت وتقلب فيه ..
هي قرنت حواجبها وخشت على الرساله اللي جتها ..
كانت من خليل مصور ايده وفيها الدبله ..
هي بعتتله علامات استفهام وهو رد عليها بكل براده
" نوري فيك أن الدبله قاعده في ايدي"
وجدان: علاش ننصدم يعني ؟؟ .. ماهو عندي نماذج زيه محاوطيني ..
هي فاتاته معش ردت عليه وركزت في الفيديو اللي كان والع تاتوريال مكياج ..
هي عيطت بقوه لما حد شد كثوفها وعيط بحداها ..
وجدان شافت للمصدر ومن بيكون يعني؟؟
حركات جيل الثمانينات متع كمال ولد خوها ..
كمال يضحك: خيرك بروحك؟
وجدان: نبي نقعد بروحي .. وبعدين شن الحركات هادم جبتلي السكر ..
كمال: قلت نراعشك ..
اسعد: الله على النسسسمه ..
وجبد كرسي وقعمز
كمال قعمز: وين كنت انت؟؟
اسعد: ياراجل اسكت خليل معش سيبني .. اربعه وعشرين ساعه خدمه ..
كمال: مش تبي تتزوج انت؟ .. ضروري تشد مسؤوليه وتكون روحك..
وجدان: دلع زايد..
اسعد: صكري فمك دلع امك.. تي الولد طول عمره ميخدمش شن حببه في الخدمه توا؟؟
كمال: طول عمره وهو يخدم خليل غر مدرق عليكم الموضوع ..
اسعد بهزوه: كانك تقصد مواضيع المنظومات و الجرد والحاجات هادم مياخدوش منه خدمة ساعه ويدير فيهم وكأنهم لعبه!
كمال: المهم يخدم ..
وجدان: باهي خيرك يا كمال حتى هما رياض خلاهم يخدموا.. واصلا انت علاش مسيب رزق جدك؟
اسعد: خلي البرانيه يستفادوا.. انا انسان قاري ومتعلم وعندي دماغ تجاري نبي نخدم بروحي وعلى حالي ...
وجدان: واو انا فخوره بيك ..
اسعد ضحك بصدمه: نراجي غر في فخرك ..
وجدان ابتسمت بخفه: تراجي فيه اي ..
