اللهم صل وسلم وبارك على سيدنا محمد وعلى آله وصحبه أجمعين.
استغفر الله العظيم وأتوب إليه
.
هما في اليوم هاده قرروا يصوروا البحر من فوق ويجروا ب موطوات البحر ..
صوت ضحكهم كان عالي ...
الوحيد اللي مزال مخشش خليل اللي انشغل يعدل في المنظومه متع محل المواد الغدائيه..
هو لما نزل ومشي جيهة وين ما حاطين الموطوات طلع مفتاح الموطو متاعه وقرب منه ..
خليل: خشوا بدوني الخونه ..
هو قالها وهو يشوفلهم من بعيد ..
هما اللي كانوا على موطوات البحر امجد وحسن و وائل ..
وحتى ايهم و زيد اللي كانوا يصوروا ..
اما حسين وفارس واسعد ف كانوا على الشط برا يتفرجوا وخلاص..
هو خليل جي بحداهم يجري ونطر الميه عليهم مخليهم يسبوه كلهم ..
زيد: خفف السرعه يا حمار تحسابه سباق تو اطيح تنكسر رقبتك..
ايهم: للأسف ميعرفش يسوقه الا طياره هاده ..
زيد هز راسه بأسى لأن بجديات ثواني وخليل باعد هلبا ..
ايمن قرب قعمز جنب حسين..
ايمن: المريض هاده من قاله يخش معاهم؟؟
حسين: من راسه ..اصلا من حطله موطوه اهني اتفقنا ان ميجيبوشي احني ..
اسعد: اشبحوا كيف يطير .. ايهم المفروض طلع برا مدامه يستخدم في الكاميرا اللي اطير..
فارس: خليل لما يركب في موطو البحر عقله تجيه طقه والله .. اشبحوا كيف يدور عليهم زي المهبول..
ايمن ضحك: مش صافي الولد ..
هو خليل كان يستفز فيهم ومبتسم بمكر حتى لما حسن قاله وقف نطر عليه اميه ومشي من بحداهم
حسن لحقه وزيد قعد يعارك فيهم باش يبطلوا لعب فروخ لأنه شوي وبيطلع ويطربق الترويج متعهم ...
خليل نط بالموطو فوقهم وحسن قريب مات ..
المهم حسن معش وقف سب في خليل اللي كان ميت ضحك حتى أنه نزل من موطوه وشد خليل طيحه في الميه وقعد يغرق فيه ..
وائل فك حسن بقوه: يا حماار يضحك هاا شرق ..
امجد قعد يخبط في ظهر خليل اللي كان يكح والميه تطلع من فمه وخشمه ومزال يضحك..
