سبحانك اللهم وبحمدك سبحان الله العظيم
اشهد ان لا إله إلا الله وحده لا شريك له له الملك وله الحمد وهو على كل شيء قدير.
اللهم صل وسلم على سيدنا محمد .
.
ايمن طلع من شاليه عيلته ومشي جيهة الحيط اللي شاغله ..
هو حط هبه من العصر بحداهم لأنها قعدت تنق تبي تجي .. وطبعا هو مش متحجر زي احمد اللي تقوى قالتله بنطلق منك كان مترفعنيش...
وطبعا ايمن بكل رقه وب ابتسامه كبيره طلب من مرته واخته انهم كان يقربوا جيهة البحر بيقلعلهم روسهم .. بكل هدوء راه!
وطبعا عرفوا ان عوامه مفيش .. هو علاش اصلا دار حوض سباحه داخلي في الشاليهات الخاصه؟؟
باش النساوين يعوموا غادي ..
في عاملات متخصصات يجوا كل يوم ينظفوا في الأحواض الداخليه ..
افكار ايمن مصدمتش محمد بس .. صدمة حتى خالد ورياض رغم ان رياض قاري الحاجات هادم .. بس هو يعترف انه الإبداع اللي عند ايمن معنداش ولا ذره منه ..
رياض يرسملك مبنى مؤكد ميه في الميه انه مهما كانت قوة الزلزال مش حايطيح .. بس انه يرسملك مبنى عرضه عشره امتار ينفتح فيه مول لا! .. ايمن يديرها بطريقه او بأخرى ..
هما ليهم اربعه سنين مشاركين في المنتجع والفكره متاعه ..
خدي من ايمن سنه كامله تخطيط لأن مساحته كبيره .. وثلاثه سنين بناء .. لا حتى لما صارت مشكله بينه وبين ولاد عمه خلا رياض حلقة الوصل ..
جده لما خش وتدهور فيه حس بفخر ان حفيده هو اللي مخطط وواقف ل شيء زي هاده ..
وحس بندم انه ضغط على باقي احفاده ومشاهم على كيفه
ايمن وقف لما شاف زيد اللي شاد الكاميرا اللي مركبلها مسند ويصور في وائل اللي يجري ب السكوتر..
كان يشوفلهم من بعيد كيف يتصرفوا .. وكأنهم مراهقين مش كل واحد فيهم عمره يضرب في الثلاثين ..
كانوا يجروا ويلعبوا وايهم يصور من جيهه وزيد من جيهه وحتى خليل كان شاد كاميرا بس يصور في حاجات فيهم النفع .. يصور في المطاعم والمقاهي من بعيد ..
ايمن فهم ان في فكرة فيديو في راس خليل ..
يلهوا في التصوير خير من انهم يديروا مشكله ولا؟؟
هو ايمن منتبهش للشاب وخبط فيه بقوه..
ايمن وخر خطوه
الولد: أعمى خونا؟؟ .. متشبحش قدامك ولا كيف؟
ايمن شافله: معليشي مشبحتكش متواخدنيش..
