اللهم صل وسلم وبارك على سيدنا محمد.
.
عبير: قلتلك يا هبه..
هبه شافت ل مرت عمها..
عبير: الناس يسألوا فيا على الفيلو متاعك وعلى الإكسسوارات .. وانا قلتلهم منعرفش من وين .. من وين أجرتيه فيلوك انتي؟؟
هي هبه كانت تاكل في بسبوسه وفي جنبها طاسة قهوه ..
استغربت .. كيف مرت عمها عبير متعرفش ان الفيلو والطاقم ايمن جابهم من قطر..
معقوله بناتها مقالولهاش؟؟
مسمعتش من خالاتها من اي حد ..
هبه: أيمن جابه من قطر ..
عبير شهقت: الفيلو؟؟؟ .. وعلاش مقلتوووليش..
هبه: نحسابك تعرفي..
عبير: والطاقم؟؟ .. راك تقوليلي حتى هو من غاديكا.
هبه: مرت عمي اول مره نحسك مغيبه عن الواقع .. اي جابه هو والدبله والطاقم من غادي... ماهو معجبنيش شيء اهني
عبير لوت شاربها وقعدت ساكته ..
اول مره في حياتها تستغفل هكي كرهت فرح اللي كذبت عليها وقالتلها آجار ..
سلوى: تبوا عصير وشكلاطه؟؟ .. نحس بطني بتنفجر .. وانتي يا حناي طلعوا جيبوا حطوا ياسر ماكله ..
هي سلوى انفجرت .. وهبه قالتلها نوضي نطلعوا برا ..
طلعت هي وياها ومعاهم تسنيم ..
هي هبه وقفت تشوف ل جدها اللي واقف ول ايمن اللي راكب على الصور ويغير في لامبا..
سلوى: جدي راهو يركح.. واكيده خليل وحسام هربوا ولصقوا ايمن فيها ..
تسنيم: بالله خليه يغيرها وهي الجردينه مظلمه...
هما قعمزوا على الطاوله والكراسي ..
وشوي وخش حسام وفي ايده كيس ..
حسام: مخلين سيدنا المهندس يغير لامبات؟؟ لاه لاه ..
خليل خش وراه: مش ديما يقول نعرف ندير كل شيء؟ ..
هو خليل سكت لما جت اللامبا اللي في ايد أيمن في نص راسه ..
ايمن: نعرف ندير كل شيء يا كلب الكلاب اي .. موت بقهرك..
هو ايمن مشافش هبه..
هبه وقفت وقربت من خوها اللي شاد راسه .. وحسام كان ميت ضحك..
