اللهم صل وسلم وبارك على سيدنا محمد
استغفر الله
الحمدلله
الله اكبر
لا إله إلا الله.
.
احفاد جمعه كانوا مقعمزين كلهم الا زيد اللي مبوش يقولوله اصلا انهم ملتمين .. قعمزوا في جنان حوش بدريه بعد نادوا وجدان اللي قعمزت وهي مستغربه..
وجدان: شن مدايرين من عمله؟؟ شن تبوا مني؟؟
حسن: خلاص انتي قعدتي من قروبنا للفساد .. لذلك بنادوك ل كل اجتماع خطير..
وجدان: شن صاير باهي؟
هي شافت جيهة اسعد اللي كان يشوفلها بحقد..
أمجد: امبكري سعدي وقف علي انا واسعد..
وجدان: معقوله؟؟ حاجه غريبه هادي هو جاكم؟
أمجد: اي .. بس القصه كلها ف اللي قاله ... اعطي بنته الكبيره ..
وجدان انصدمت: كيف يعني .. بنته الكبيره اللي بنخطبوها ل زيد؟؟
أمجد: اي ..
وجدان: خبرتوه؟ ..
حسين: منقدروش نخبروه واحني منعرفوش زيد كيف حايتصرف في موقف زي هكي..
وجدان: اي خير ما درتوا .. تو نكلم بوي يمشي يتفاهم معاه..
ايهم: كان نفع كلام جدي من قبل راهو وافق على الخطوبه ..
وجدان سكتت وباعدت عيونها من عليهم ..
سعدي معش يتحشم من بوها ... والراجل عنده حق .. يشوف في أحفاد جمعه الفساد بعنوانه... مش حايعطي بناته اللي كلهم يقولوا انه يقتل دونهم ل واحد عيونه يخوفوا واخر مجنون اربعه وعشرين ساعه وهو يرقص ...
وجدان: علاش الإنسان يشرب؟
هي قالتها بعد صمت نص ساعه مخليتهم كلهم يشوفولها ب إستغراب ..
هما فهموها ... فهموها كلهم..
اللي ميشربوش كانوا زيد.. وامجد .. ايهم وايوب لأن امهم عطتهم قلة السماح .. باقيهم يشربوا .. لأنهم كبروا في وسط الشرب فيه مباح ..
وهاده شيء كان قاهر رياض... وقاهر وجدان حتى هي ..
وجدان: شن ناقصكم؟ .. نعرف اللي يشربوا يشربوا باش ينسوا همهم .. او لأنهم يحسوا ب النقص .. ولا في شيء تاني منعرفاش؟؟
