اللهم صل وسلم وبارك على سيدنا محمد.
.
هو خليل صكر نقاله لما كثروا عليه نق ب انه يطلع معاهم وماشين للبحر وبيشوا غادي وابصر شن ..
بس هو فضل يعتزل مدام الحوش فاضي ويخدم خدمته اللي تراكمت شوي ..
من قصة البرنامج .. ل تنسيق المبيعات ل محلات معينه ..
وهلبا حاجات ..
قطع استجمامه صوت الزغاريط ..
خليل بهمس ل روحه: حناجر ذهبيه واقسم بالله ..
هو مباش ينوض ولا يتحرك.. ميبيش يقابل حد .. تو كان خالاته روحوا على حوشهم؟ مصيبه ندم انه مطلعش وتحمل دراه كبد صحابه ..
هو قعد في داره هلبا لين فتح باب داره واللي خشت موده ..
خليل شافلها..
موده قربت حظناته وهي تبكي: كبرت وبتتزوج يا حيوان..
خليل ضحك بصدمه: تو شن هاده!..
موده: اسكت يا قرد مش حاتفهم ..
هي فرح خشت وهي تزغرط وجبدت موده وهي حظنت خوها..
فرح باستله خدوده: مبروووك يا غالي عقبال العرس ..
خليل: تو تجيبي من التزغريط انتي..
فرح شافتله بصدمه: حقا؟؟
خليل هز براسه: اي .. قاري عليها..
موده: راهي جابت في عرس هبه .. حتى وهي راقده تزغرط.. وبعدين خلاص هي ممكن يومين ثلاثه تجيب واضحه ..
هي فرح ضربت خليل على كثفه لما ابتسملها وعرفاته يكذب..
هو مكملش الوضع هنا لأن حتى ابرار خشت وهي ترقص..
خليل قرن حواجبه..
فرح: حي عليك حي شكلها بتصالحك..
ابرار شدت في رجلين خليل: محلى عيونها يا خلو .. تهبل زي الباربي.. احلى من الباربي.. امتى العرس بنعيش معاكم في حوشكم اقعدوا امي وبوي..
هما فرح وموده كانوا يشوفولها بصدمه وانفجروا يضحكوا لما خليل قامها وقاللها موافق وقعد يبوسلها في خدودها بقوه ....
هي من لما عرفاته خطب وهي مخاصماته ..
اول ما تشوفه تعطيه بوسه وحده على خده اليمين بس .. وتقعد ساكته متتكلمش معاه .. هكي مشت اسبوعين كاملات ..
