سبحان الله وبحمده سبحان الله العظيم ..
لا حول ولا قوه إلا بالله العلي العظيم ..
.
الروايه لا تعبر عن ذاتي الشخصيه ..
اي تصرف للشخصيات هو خاص ب الشخصيات وليست شخصيتي الخاصه.
إذ لم تتفهم هذا غادر بهدوء.
انت لا تعرفني شخصياً لا تضع شيء عني بعقلك وتصدقه ولا تستمع لتبريراتي التي طالبت بها ..
إذ لم يعجبك اي تصرف لأي شخصيه هذا أمر جيد .. لأن ما انشره هو واقع مجتمعنا .. ولا أحب الخيال وتلوين الواقع ..
وشكراً.
.
اللي مر بيه ايمن مكانش ساهل ..
مش اي انسان بيقدر يقعد طبيعي لما بيمر ب نفس ما مر بيه أيمن..
ايمن في عطلته قبل عشره سنين من توا روح وقعد مع جده وحناه ..
في يوم ناض على صوت عياط حناه .. ولقي جده طايح ومتشنج ..
تصرف بسرعه رغم انه كان راعش حتى هو ..
ورفع جده للمستشفى وطول ل تونس لأنه حالته كانت حرجه ..
قعد مع جده هو وسكينه وعانوه ...
ممكن ايمن عرف حقيقة خواله من هديك اللحظه.. او هذاك الموقف..
لما كلهم هربوا وسيبوا بوهم ... خلوا واحد عمره في بداية العشرينات يشد مسؤوليه كبيره هلبا عليه ويعاني جده المريض..
اكبر شيء يحطم نفسية المريض هو انه يقعد بروحه .. ينفروا منه احبابه ..
وأيمن قلبه تقطع لما جده قعد يبكيله مره لما عرف ان ولاده سيبوه في اكثر وقت هو محتاجلهم فيه
عرف ايمن ان جده حتى ولو صح من برا .. من داخله عمره ما بيصح من الصدمه هادي ..
وعرف جده حايموت من قهره ..
عرف جده مش حايطول .. لأن جده هاده كان أطيب شخص شافه طول حياته .. كان حنون .. وهادي .. والناس كلهم يحبوه.. لا كذب.. الناس يحبوه وولاده لا!
كلهم يقولوا صغار حواء ل من طالعين؟؟
صغار حواء تربوا عند جدهم الحنون .. وقعدوا زيه بالضبط ..
ايمن لما رد الزمان بيه في مرضة جده محمد .. وكيف انه حصل نفس الرعشه مره اخرى ومستسلمش ل صدمته .. كان شيء قاسي هاده بس مدوراش .. صح انغمر في الحزن وبذات لما عمه صالح مباش يرافق بوه !
ايمن مباش جده محمد يحس ب أن ولاده ميبوشي .. حتى ولو كان ولد واحد .. مكانش يبي جده هاده يجرب شعور جده هذاك
