A/N
Part 6 က Warning အခန်းမို့ကျော်တင်ထားတာပါ။
မုန်းမာန်ပြေ
တောက်ပသောနေရောင်ခြည်ကအပြင်လောကတွင်ထိန်ထိန်လင်းနေသော်လည်း အေးစိမ့်ကာတိတ်ဆိတ်ငြိနေသောအခန်းထဲအထိ တည့်တည့်လင်းလင်းထိုးမဖောက်နိုင်ရှာ။
စိမ်းပြာဖျော့ဖျော့မီးရောင်နှင့်ဝါလဲ့လဲ့နေရောင်ခြည်အနည်းငယ်ခြုံလွှမ်းထားသောအခန်းကျယ်ကြီးထဲတွင် နှစ်ခြိုက်စွာအိပ်စက်နေသောလူသားနှစ်ဦးမှာမူ ကမ္ဘာလောကကြီးကိုလျှစ်လျူရှုနေကြဆဲ။
ကျယ်ဝန်းသောအခန်းကျယ်ထဲတွင်တည်ရှိနေသော အရာဝတ္ထုနှင့်အသုံးအဆောင်များမှာ သူ့နေရာနှင့်သူစနစ်တကျရှိနေပါသော်လည်း ရှင်းလင်းလှသည့်အခန်းကြမ်းပြင်ပေါ်တွင်ဖရိုဖရဲဆန်စွာပြန့်ကျဲနေတဲ့အဝတ်အစားများ။
ထိုမှတစ်ဆင့်ကြည့်မယ်ဆိုလျှင် ဖွေးလွှနေသောအိပ်ယာအပြင်အဆင်နှင့် ကျယ်ပြန့်ကြီးမားလှသောကုတင်ကျယ်ကြီးပေါ်တွင် ပုခုံးသားတွေသာမြင်နေရတဲ့အမျိုးသားနှစ်ဦး။
အသားခပ်ညိုညိုနဲ့လူမှာ ဖြူဖွေးဝင်းမွတ်နေသောအသားရောင်ရှိသည့်ကျန်တစ်ဦးကို အနောက်ကနေသိုင်းဖက်ထားပုံနှင့်ရှိနေသလို ကျန်တစ်ဦးမှာမူသိုင်းဖက်ထားသောလက်နှစ်ဖက်ကြားတွင် ခေါင်းနှင့်လက်ကလေးတစ်ဖက်သာစောင်အပြင်ဘက်တွင်ပေါ်နေရှာ၏။
ပထမဆုံးလှုပ်ရှားလာသူကအသားဖြူဖွေးနေသောလူ။ အိပ်ချင်စိတ်မပြယ်သေးသလိုမှုန်ဝါးဝါးဖြစ်နေပြီးမှ ပွေ့ဖက်ထားတဲ့လူရဲ့လက်ကိုငုံ့ကြည့်၏။
ညင်သာသောလှုပ်ရှားမှုတွေနဲ့အိပ်ရာထဲကနေထွက်လာပြီးမှ ကုတင်စွန်းတွင်အသာထိုင်ကာဘေးဘီဝဲယာကိုလှည့်ပတ်ကြည့်သည်။ ထို့နောက်မျက်နှာပြင်ကိုလက်နှစ်ဖက်နှင့်တဖျပ်ဖျပ်ရိုက်ကာ အနောက်ကလူကိုအသာလှည့်ကြည့်ပြန်၏။
ပေါ်နေသောပုခုံးနှင့်လက်မောင်းတစ်ဖက်တွင်ရှိနေသော ကိုက်ရာကုတ်ခြစ်ရာများကယမန်နေ့ညကသူတို့ဘယ်လောက်သောင်းကျန်းထားမိကြောင်း သက်သေထူနေသလိုလို။
