မုန်းမာန်ပြေ
အထပ်ထပ်ဆင့်ကာ မြင့်မားစိမ်းညို့နေတဲ့တောင်တန်းတွေကိုနောက်ခံထားသော မြက်ခင်းစိမ်းစိမ်းတွေကိုမျက်စိတစ်ဆုံးမြင်နေရသည်။
မြက်ခင်းစိမ်းစိမ်းတွေကြားတွင် အမြင့်အနိမ့်မညီသောတောင်ကုန်းငယ်လေးတွေကဟိုတစ်နေရာ ဒီတစ်နေရာမှာရှိနေကြသလို ထင်းရှူးပင်တန်းအုပ်အုပ်လေးတွေကလည်း ဟိုတစ်စုဒီတစ်စုရှိနေခြင်းက သဘာဝတရားရဲ့လက်ကျန်လေး။
ဟားခါးမြို့စွန်နေရာလေးမှာရှိနေတဲ့ ဂေါက်ကွင်းလေးကို မုန်းမာန်တို့ရောက်ရှိလာချိန်က နေ့လယ် ၃ နာရီဝန်းကျင်တွင်ဖြစ်၏။ ကျောက်ခင်းလမ်းလေးအတိုင်း ဘာဂီကားလေးကိုဝသုန်ကိုယ်တိုင်မောင်းလာတဲ့ဘေးမှာ မုန်းမာန်ကဟိုဒီကြည့်ရင်းပျော်နေပုံလေးနှင့်ပါလာ၏။
"ဝသုန်ကဒီကိုခဏခဏရောက်လား"
"မရောက်ပါဘူး၊ ကျွန်တော်က Golf ကစားရတာကိုဝါသနာမပါဘူး"
"ဒါဖြင့်အားချိန်တွေမှာဘာလုပ်လဲ"
"ဟိုနားဒီနားလျှောက်သွားတယ်လေ၊ ငြိမ်ငြိမ်နေတတ်တဲ့အချိန်က စာဖတ်တဲ့တစ်ချိန်ပဲရှိတယ်"
"ဟုတ်သား၊ ဝသုန့်ဆီမှာစာအုပ်တွေအများကြီးပဲနော်"
"အင်း...Horror ဝတ္တုတွေများပါတယ်။ ဆရာမခင်ခင်ထူးစာအုပ်တွေကတော့ ထွက်တာနဲ့ဝယ်တယ်။ ပြီးတော့ ရွှေဥဒေါင်းဝတ္ထုတွေလည်းကြိုက်တယ်။ ကျွန်တော်ကစာအုပ်သိပ်မရွေးဘူး။ အရေးအသားကောင်းရင်ဇာတ်အိမ်ကောင်းရင်ဖတ်လိုက်တာပဲ"
"စာဖတ်တာကောင်းတာပေါ့"
"ဟုတ်သား၊ ပြေဖတ်ချင်တာရှိရင်ယူဖတ်လေ၊ အပြန်ဝင်ယူကြမယ်"
"ရပါတယ်၊ မနက်ဖြန်ညလိုက်အိပ်မှာပဲကို၊ အဲကျမှယူမယ်"
"ပြေအဆင်ပြေသလိုလုပ်"
"အခုကဘယ်ကိုသွားနေတာလဲ"
"သာယာတဲ့နေရာလေးပေါ့၊ ရောက်တော့မှာပါ"
ဝသုန်ပြောတဲ့နေရာလေးက တကယ်ပဲသာယာလှ၏။ တောင်ကုန်းပြေပြေလေးအောက်ဘက်မှာ ရေအိုင်ငယ်လေးတစ်ခုရှိနေပြီးမဝေးလှတဲ့နေရာလေးလေးမှာ ထင်ရှူးပင်တန်းအုပ်အုပ်လေးနဲ့။
