ဝသုန်ကျော်
ပြောခဲ့တဲ့အတိုင်းပြေ့ Facebook account လေးက Post များများစားစားမရှိပါ။ မိသားစုပုံလေးတွေတစ်ချို့နဲ့ ငြိမ်းချမ်းဆိုတဲ့သူငယ်ချင်းတစ်ယောက်နဲ့တွဲရိုက်ထားတဲ့ပုံအနည်းငယ်သာတွေ့ရသည်။
ခရီးသွားရင်တော့ရှုခင်းပုံလေးတွေ၊ တည်းတဲ့ဟိုတယ်တွေကနေရာလေးတွေကို ဘယ်ရောက်တယ်ဆိုတဲ့အမှတ်တရစာလေးတွေရေးကာတင်ထားတတ်၏။
တစ်ရက်ခြားလောက်ဖုန်းအပြန်အလှန်ဆက်ပြီးချိန်မှာ နှစ်ဦးသားပိုပြီးရင်းနှီးလာခြင်းကထူးခြားခြင်းလို့မဆိုသာ။ ပြေ့ကိုချစ်တယ်လို့မကြာမကြာပြောခဲ့ပေမဲ့ တုန့်ပြန်မှုကမလာ။ စဉ်းစားပေးနော်ပြောလိုက်တော့ အင်းပါပြောပြီးရယ်နေတတ်သည်။
ယောက်ျားချင်းဖြစ်နေတော့ ဒီထက်ပိုပြီးဝသုန်အီစီကလီမလုပ်တတ်ခဲ့ပါ။ ဝသုန့်အပေါ်မှာမချစ်ရင်တောင် သံယောဇဉ်တော့ရှိမှာပဲလို့ယုံကြည်နေ၏။
ဒီလိုနဲ့မပူမအေးဆက်ဆံရေးကြားမှာလည်ပတ်နေရင်း အချိန်ကတစ်လကျော်ကြာလာခဲ့၏။ မတ်လလယ်လောက်မှာပြေလိုက်လာတော့မယ်လို့သိထားတဲ့နောက်ပိုင်း စီစဉ်ထားစရာရှိတာတွေကိုပြင်ဆင်ထားရသည်။
ငှားထားတဲ့အိမ်က တောင်စောင်းလေးမှာမေးတင်ဆောက်ထားတဲ့နှစ်ထပ်တိုက်အိမ်လေး။ နှစ်ယောက်နေဖို့ဆိုအနည်းငယ်ကျယ်ဝန်းတဲ့အိမ်လေးက မီးလင်းဖိုလေးပါနေတော့ထင်းကအစဝသုန်စီစဉ်ထား၏။
အိပ်ရာထိုင်ခင်းကအစ အိမ်အပြင်အဆင်အဆုံးသေချာပြင်ဆင်ထားရတာတော်တော်ကုန်သွားခဲ့၏။ မေမေကအစစအရာရာအဆင်ပြေအောင်လုပ်ပေးထားဆိုကာ ငွေတွေပို့ပေးထားလို့သာတော်သေး။
ဝသုန်ရှယ်ယာဝင်ထားတဲ့အလုပ်က ၃ လကျော်မှအကျိုးအမြတ်စရမှာဆိုတော့မတတ်နိုင်ဘူးပေါ့။ သားမက်အကောင်းစားလေးအတွက်ပူပန်နေတဲ့မေမေက အိမ်ပုံကအစအပြင်အဆင်အဆုံးဓာတ်ပုံရိုက်ပို့ပေးရ၏။
ထမင်းချက်နဲ့တောက်တိုမယ်ရခိုင်းဖို့လူပါငှားခိုင်းနေလို့ တားနေရသေး။ အဲလောက်တောင်အဖြစ်သည်းတဲ့မေမေပါ။ ဒီတစ်လအတွင်းမှာမေမေနဲ့ပြေကမကြာခဏတွေ့ဖြစ်ကြသလို ပြေကအိမ်ကိုလည်းဝင်ထွက်တတ်ခြင်းကမေမေမှာသားတစ်ယောက်ရလိုက်သလိုဖြစ်နေခဲ့တာကိုး။
