ဝသုန်ကျော်
ကင်မရာကြိုးကိုလည်ပင်းမှာသိုင်းပြီး မြင်သမျှတွေ့သမျှဓာတ်ပုံရိုက်နေတဲ့ပြေ့နောက်ကနေ ဖုန်းကိုင်ပြီးလိုက်ရိုက်နေသူကဝသုန်။
မနက် ၉ နာရီကျော်မှ Night Duty ကထွက်လာရတဲ့ဝသုန့်ကို ပြေကတစ်မနက်လုံးနားစေပြီးမှ နေ့လယ် ၃ နာရီတွင်စိုက်ပျိုးရေးခြံထဲထွက်လာကြခြင်းဖြစ်၏။
ဆတ္တားရွာကိုတော့နားရက်တစ်ရက်မှသာသွားမယ်လို့ ပြေကဆိုလေ၏။ သူ့အတွက်ကဟားခါးမြို့တွင်းနဲ့ ဟိုနားဒီနားသွားနေရခြင်းမျိုးကလုံလောက်တယ်တဲ့။
ဝသုန် Night Duty ကျတဲ့နှစ်ပတ်အတွင်းမှာ ပြေက ၃ ရက်သာလိုက်အိပ်၏။ အကြောင်းက ညဆင်းရတဲ့ဝသုန့်အတွက်အစားအသောက်တွေကို အဟာရရှိရှိချက်ကျွေးချင်လို့ပါဆိုလာချိန် ဝသုန့်မှာပိတိတွေဖြစ်လိုက်ရပုံများ အရေးပေါ်လူနာတွေကြောင့်တစ်ညလုံးမအိပ်ခဲ့ရတာတောင် အပြုံးမပျက်ပြုံးလျှက်နဲ့ပေါ့။
ပြောတဲ့အတိုင်း ညဆိုင်းဆင်းပြီးပြန်လာချိန်ကနေ ည ၇ နာရီထိ ကောင်းကောင်းစားကောင်းကောင်းနားခွင့်ရခဲ့သလို အခုလိုညနေစောင်းအချိန်လေးတွေမှာ ပြေနဲ့အတူကုန်ဆုံးခွင့်ရခဲ့ပြန်သည်။
ခရီးဝေးမဟုတ်တဲ့အနီးအနားကနေရာလေးတွေနဲ့ မိတ်ဆွေတွေအိမ်ကိုလျှောက်လည်ကြတာမျိုး၊ Tea Shop ဆိုင်သွားထိုင်တာမျိုးနဲ့ ချင်းတောင်တန်းဟိုတယ်သွားပြီးညစာစားတာမျိုးတွေကအခါပေါင်းများစွာ။
နှစ်ဦးသားဆက်ဆံရေးကတော့ ချစ်သူရည်းစားမက အိမ်ထောင်သည်လည်းမကျတဲ့အနေအထားမျိုးနဲ့ပေါ့။ နောက်ဆုံးလို့သတ်မှတ်ထားတဲ့စည်းလေးကိုကျော်ဖြတ်လိုက်ဖို့မခက်ခဲသော်လည်း နှစ်ဦးလုံးကဖြတ်ကျော်ဖို့ခက်ခဲနေကြခြင်းက ကိုယ်စီအတွေးများစွာကြောင့်သာ။
ဝသုန်မသိလိုက်တဲ့အကြောင်းအရာတစ်ခုက မသိချင်လည်းဘယ်လိုပြောပြောမသိတဲ့ပြေက သိချင်ရင်လည်းအကြောင်းအရာတစ်ခုကို စေ့စေ့စပ်စပ်ရှာဖွေတတ်သူဆိုတာကိုပေါ့။
********************
ပြွတ်ခဲနေအောင်သီးနေတဲ့ပန်းသီးပင်လေးကို ကျေနပ်အောင်ရိုက်ပြီးချိန်မှာမှမုန်းမာန်အနောက်ကိုလှည့်ကြည့်လိုက်မိ၏။ သစ်တော်ပင်ကြီးတစ်ပင်အောက်မှာ ဖုန်းထိုင်ကြည့်နေတဲ့ဝသုန်။
