အပိုင်း ( ၂၂ )
ရွှေပြည်တန် အိပ်မပျော်နိုင်ပါ။
ရုပ်ရှင်မိတ်ဆက်ပွဲမှာ သူ ပြောခဲ့တဲ့စကားတွေကို ပြန်တွေးရင်း တခုခုများ အမှားပြောလိုက်မိသေးလား၊ သူ့အဖြေစကားတွေကို လူအများက သဘောမှကျပါ့မလားဆိုတဲ့ အတွေးတွေက ပလုံစီလို့နေတယ်။
...အေးလေ ငါလို နောက်ခံမရှိ နာမည်မရှိ ပရိသတ်မရှိတဲ့ လူကို မကြိုက်ကြရင်လည်း လက်ခံရမှာပါပဲလေ.. တော်သေးတယ် ကိုထွဋ်မြတ် ဘေးကနေ လိုက်ထိန်းပြောပေးနေလို့ ငါ တလွဲတွေ မလုပ်မိတာ...
ကင်မရာမီးတဖြတ်ဖြတ်နဲ့ ကင်မရာသံတချက်ချက်ကို ကြားရတိုင်း နှလုံးခုန်နှုန်းတွေမြန်လာခဲ့ပြီး နောက်ကျောထဲထိ ဇောချွေးတွေ စိမ့်ထွက်လာခဲ့တယ် မဟုတ်လား။ ဒီအနုပညာလောကထဲ တရားဝင် စလှမ်းတဲ့ခြေလှမ်းမှာကတည်းက အကောင်းဆုံးတွေ ဖြစ်ခဲ့ရင် ကောင်းမယ် ဆိုပေမယ့် အကောင်းဆုံးမဖြစ်ခဲ့ဘူးဆိုတာ သူ့ကိုယ်သူပဲ သိတယ်။
...မြင်နေကျ နာမည်ကြီးသရုပ်ဆောင်တွေရဲ့ အင်တာဗျူးတွေ မိတ်ဆက်ပွဲတွေဆိုတာ ဒီလိုပါ့လား.. မအောင်မြင်ရင်လည်း အနည်းဆုံးတော့ ငါလည်း ဒီလိုပွဲလေး လုပ်ဖူးခဲ့တာပေါ့လေ..
ကိုယ့်ဘာသာကို အားတင်းလိုက် ဖြေသိမ့်လိုက်နဲ့ ကုတင်ပေါ် လူးကာ လိမ့်ကာ အိပ်မရနေဘူး။ သူ့အတွက်တော့ ဒါဟာ ပထမဆုံးအကြိမ်အဖြစ် မီဒီယာတွေရှေ့ လူတွေရှေ့မှာ စကားပြောရတာ ဖြစ်တဲ့အတွက် အတွေ့အကြုံအသစ်ကြောင့် ရင်တုန်ရခြင်းတွေဟာ အခုထိ အရှိန်မသေသေးဘူးပေါ့။
ကံကြမ္မာကလည်း သိပ်ကိုထူးဆန်းလေရဲ့။ သူဟာ သူ့အရင်ဘဝက အဖြစ်အပျက်များကို သူကိုယ်တိုင် သူနဲ့ တူအောင် ပါဝင်သရုပ်ဆောင်နေရပြီး ဒီလုပ်ရပ်အတွက် ရင်ခုန်စိတ်လှုပ်ရှားနေရပြန်တာက ဒါ ဘယ်လို နောက်ပြောင်ကျီစယ်မှုကြီးပါလိမ့်ဟု တွေးမိပြန်တယ်။
တကယ်ပါ.. ဒီအဖြစ်အပျက်တွေဟာ ကံကြမ္မာစေရာအတိုင်း မဟုတ်ပဲ တစ်ယောက်ယောက် တမင်တကာ အကွက်ချထားတာများလားဟု စဉ်းစားစရာ။
ဒါပေမယ့်လည်း ပန်းပြာတပွင့်ကို ရုပ်ရှင်စရိုက်မယ်ဆိုတော့ casting ဝင်ဖြေဖို့ ဆုံးဖြတ်လိုက်တာက သူကိုယ်တိုင် ဖြစ်သလို ပန်းပွင့်ပြာဇာတ်ကောင်အတွက် သီးသန့် casting လျှောက်ခဲ့တာလည်း သူကိုယ်တိုင်ပဲလေ။ အဲ့အချိန်မတိုင်ခင်တုန်းက အရင်ဘဝကို လုံးလုံးမမှတ်မိတော့တဲ့ ကိုထွဋ်မြတ်ဆိုတာ ရွှေပြည်တန်တို့အဖို့ မြင်ချင်တိုင်း မြင်လို့မရတဲ့ မင်းသားတစ်လက်မို့ တခါလေးမှတောင် မဆုံဖူးခဲ့။
