အပိုင်း ( ၂၄ )
မိုးဦးခေါ်ပွဲတော်၏ နတ်ဘုရားများ ပူဇော်ပသပွဲအပြီး နန်းတော်အတွင်းရှိ ပန်းဥယျာဉ်၌ မိဖုရားများ စုဝေးကြကာ နဂါးအရှင်ရှေ့မှောက်တွင် အကအလှများ၊ ကျွမ်းကျင်ရာ အနုပညာ အတတ်ပညာများဖြင့် ပွဲတော်သဖွယ် ဖျော်ဖြေတင်ဆက်ကြသည်။
နန်းတော်ဝင်းအတွင်းမှ သက်ရှိများသည် အပြင်လောကကြီးနဲ့ မသက်ဆိုင်သဖွယ် နေထိုင်ကြရသည် မဟုတ်လား။ နဂါးအရှင် ဘုရင်မင်းမြတ် ဖြစ်လင့်ကစား သက်ဆိုင်ရာ ပွဲတော်များ၊ ပျော်ပွဲရွှင်ပွဲများကို နန်းတော်အတွင်း၌သာ ဆင်နွှဲရသည်။ ဒဏ္ဍရာနန်းတော်တစ်ဝင်းလုံးရှိ အဆောင်များ၊ ဥယျာဉ်များမှာ ပုံမှန်ထက် လင်းထိန်လှပကြသော်လည်း နန်းတော်အပြင် ပွဲစျေးတန်းစျေးသည်များ ချိတ်ဆွဲထားသော လက်လုပ်မီးပုံးလေးများကသာ ပိုလှနေသယောင်ပင်။
ဒဏ္ဍရာအား ကောင်းကင်ထက်မှ ငုံ့ကြည့်လျှင် မိုးဦးခေါ်ပွဲတော်သည် ဒဏ္ဍရာနန်းတော်တံတိုင်း အပြင်ဘက်၌ လွတ်လပ်ပေါ့ပါးစွာ စည်ကားသိုက်မြိုက်နေမှာဖြစ်ပြီး တံတိုင်း အတွင်းဘက်မှာတော့ ပြိုးပြိုးပျက်ပျက် လက်နေသည့် ဝတ်ရုံများသည်သာ အသက်ဝင်နေ၏။
နဂါးအရှင်ဆီသို့ စားကောင်းသောက်ဖွယ်များ ဆက်သပြီးသည်နှင့် တချို့မိဖုရားများက စောင်း၊ ကြေးမောင်းတီးပြီး သီဆိုကြပြီး၊ တချို့မိဖုရားများက အချိုးအဆလှပစွာ ကခုန်ကြသည်။
ဖျော်ဖြေမှုတစ်မျိုးပြီးတိုင်း တင်ဆက်သူ မိဖုရားအား နဂါးအရှင်က လက်ရာမြောက် ကျောက်ရောင်စုံဆံထိုးလေးတွေ ချီးမြှင့်သေးသည်။ နှစ်စဉ်နှစ်တိုင်းမို့ အနှီမိဖုရားများ ရတနာသိမ်းဆည်းရာ အံဆွဲများ၌လည်း ဆံထိုးများ ပုံနေလျက်ရှိ၏။ မိဖုရားတို့သည် လက်ဆက်နှင့်ပြီးသား ရှင်ဘုရင် လင်ယောကျာ်းအား သူတို့အပေါ် စိတ်ယိုင်လာရန်အလို့ငှါ ထပ်ခါတလဲလဲ မြှူဆွယ်ဖျားယောင်းနေရခြင်းသာ ဖြစ်သည်။
နဂါးအရှင်လည်း နဂိုကတည်းကမှ တိုင်းရေးပြည်ရေးကိစ္စအဝဝများကြောင့် ကောင်းမွန်စွာ အနားယူရက် ရှားပါးလွန်းလှသည့်အထဲ မျက်စိရှေ့ ရှုပ်ရှုပ်ယှက်ယှက် ရောင်စုံအဝတ်များဖြင့် ခုန်ပေါက် ကခုန်နေခြင်းအားလည်းကောင်း၊ တီတီတျွာတျွာ တီးလုံးများနှင့် သီဆိုနေကြခြင်းအားလည်းကောင်း အလွန်မှ အောင့်အီးသည်းခံအားပေးနေရရှာသည်။
