အပိုင်း (၂၆)
" ဒီအဖွဲ့က ပန်းပြာတစ်ပွင့် ရုပ်ရှင်အတွက် promote လုပ်ပေးမယ့် promotion team ပါ.. သူတို့က ရိုက်ကူးရေးက behind the scenes တွေ လိုက်ရိုက်မယ်.. ရုပ်ရှင်အတွက် သီးသန့်ထောင်ထားတဲ့ page မှာ ကာရိုက်တာနဲ့ ပတ်သတ်တာတွေ၊ ခုနက bts တွေ ပြန်တင်မယ်.. ပြီးရင် cast တွေနဲ့ interview လေးတွေ ရံဖန်ရံခါ လုပ်ဖို့ရှိတယ်.. နောက်ပိုင်း ဒီရုပ်ရှင်ကားကြီး ရုံပေါ်ရောက်တဲ့အထိ promotion အပိုင်းကို တာဝန်ယူသွားမှာဖြစ်လို့ သက်ဆိုင်ရာ မန်နေဂျာတွေကလည်း အတူပူးပေါင်းပေးပါ.."
ထုတ်လုပ်ရေးတာဝန်ခံဆိုသည့် ပိန်ပိန်ပါးပါး အမျိုးသား ခပ်ချောချောလေးက မိန်းကလေး ၂ ယောက်၊ ယောကျာ်းလေး ၃ ယောက်ပါဝင်သော ထို production team အား ထွဋ်မြတ်တို့ အပါအဝင် ကျန်သရုပ်ဆောင်များနှင့် မိတ်ဆက်ပေးလာသည်။
အကုန်လုံးက ထွက်သစ်စ နေမင်းကဲ့သို့ နွေးထွေးတက်ကြွနေကြပြီး အကြည့်များက ထွဋ်မြတ်နှင့် ရွှေပြည်တန်ဆီသို့ အပြန်အလှန် ကူးလူးနေကြ၏။
" တလောက ဇာတ်ကားမိတ်ဆက်ပွဲလည်း လုပ်ထားတာဆိုတော့ ပရိသတ်ရဲ့ စိတ်ဝင်စားမှုနှုန်းက မြင့်တက်နေတယ်ဆိုပါတော့.. ရိုက်ကူးရေးဆက်တင်မှာ အင်တာဗျူးလုပ်တာလေးနဲ့ စကြမယ်နော်.. ကျန်တဲ့ အချိန်စာရင်းကို မန်နေဂျာတွေဆီ ပို့ပေးထားပါ့မယ်.."
" ကိုယ် တခုလောက် အကြံပေးချင်တယ် ရမလား.."
ခြေတံရှည်များအား ချိတ်ထားရင်း ခုံအနောက်ကို ခပ်လျော့လျော့ အနေအထားဖြင့် မှီကာ ထိုင်နေသည့် ထွဋ်မြတ်က ကျောင်းသားလေးတစ်ယောက်လို လက်တစ်ဖက်ထောင်ပြရင်း ခွင့်တောင်းလာသည်။
အစည်းအဝေးခန်းအတွင်းမှ နာမည်အကြီးဆုံး မင်းသား၏ ပေါ့ပေါ့ပါးပါး စနောက်ဟန်ကြောင့် အားလုံးမှာ ပြုံးကြရသေးသည်။
" ဟုတ်ကဲ့ ကိုထွဋ်မြတ် ပြောပါခင်ဗျ.."
" ဒီကညီလေး ပြောသွားတာတွေ ကိုယ် သဘောကျပါတယ်.. ဇာတ်ကားကို promote လုပ်ကြရမှာဆိုတော့ ကိုယ် စဉ်းစားမိတဲ့ idea လေး တခုရှိတယ်.. ဒီကားရဲ့ promotion ကာလအတွင်းမှာ ကုမ္ပဏီအနေနဲ့ ကြော်ငြာပဲဖြစ်ဖြစ် ပွဲတက်တာပဲဖြစ်ဖြစ် ကိုယ်နဲ့ ရွှေပြည်တန်ကို အတူတူတွဲပြီး အလုပ်လက်ခံတာမျိုးပဲ လုပ်စေချင်တယ်.."
