မမြင်တာကြာပြီဖြစ်တဲ့ စောဟန်က ရှိရင်းစွဲထက်ပင်ချောလာတယ်လို့ ထင်မိသည်။ တပြေးတန်းနေတဲ့ မျက်ခုံးထူထူ၊ဝဠာ့လောက် မျက်အိမ်မသေးဘဲ ခပ်ကျယ်ကျယ်ဖြစ်နေတဲ့ မျက်ဝန်းတွေက နှာတံရှည်တွေ ထက်မှာ လိုက်ဖက်လွန်းနေသည်။ ဒီအရွယ်မှာ မိခင်အရင်းက သူစိမ်းတစ်ယောက်ရှေ့မှာ ရိုက်နှက်တာကိုတော့ ကျွန်တော်ရှက်မိသည်။ မေမေကတော့ အိန္ဒြေပင်မပျက်။ ခြေချိတ်ထိုင်ကာ စောဟန်ကို ခေါ်သည်။
"လာလေ စောဟန်။ မလာတာကြာပြီ။ ဘာကိစ္စရှိလို့လဲသား"
ကိုကြီးစောဟန်က ကျွန်တော့်ကိုတစ်လှည့် မေမေ့ကိုတစ်လှည့်ကြည့်နေတဲ့ မျက်ဝန်းတွေမှာ သနားရိပ်တွေပါနေတာ ကျွန်တော်သိသည်။ မသနားကြနဲ့။ ကျွန်တော်က ဒီလိုသနားခံရမယ့်လူ မဟုတ်ဘူး။ ရှေ့တည့်တည့်ကိုသာ ကြည့်ရင်း ကိုကြီးစောဟန်ကိုလဲ စကားစမပြောဖြစ်ခဲ့။ စိမ်းသက်သွားခဲ့တာ ဘယ်လောက်ကြာနေပြီလဲတောင် မရေတွက်နိုင်တော့။
"ကျွန်တော် ငှက်ခါးဆီကိုပဲ လာတာအန်တီ။ သူနဲ့မတွေ့တာလဲ ကြာလို့လေ။ ငှက်ခါး ကိုယ်တို့ စကားခနပြောရအောင်လေနော်"
"ကျွန်တော် မအားဘူး။ လယ်ထဲသွားဖို့ရှိနေလို့လေ "
"နင့်လယ်က ဘယ်လောက်အရေးကြီးနေလို့လဲ။ တစ်ခါတစ်လေ ကိုယ့်အကို လာတာ စကားကောင်းကောင်းပြောပါတော့လား။ သွားစမ်း နင့်အခန်းထဲကို။"
မေမေက သူစိမ်းတွေရှေ့မှာလဲ စကားသံမလျှော့ခဲ့ပါ။
"စောဟန် ခနနေခဲ့။ အန်တီ စားစရာတစ်ခုခုစီစဉ်ပေးမယ်"
အချင်းမများချင်တော့တာကြောင့် ကျွန်တော်အသာတကြည်လက်ခံခဲ့ပါတယ်။ အခန်းထဲက ကုတင်ပေါ်မှာထိုင်ရင်း အစီအရီရှိနေတဲ့စာအုပ်တွေကို ခပ်ဖွဖွပွတ်မိသည်။ ဝဠာလက်ဆောင်ပေးခဲ့တဲ့ စာအုပ်လေးတွေ၊ခက်ခက်ခဲခဲ ဝှက်ပြီးယူခဲ့ရတဲ့ ဝဠာလုပ်ပေးတဲ့ သစ်သားစာအုပ်စဉ်သေးသေးလေး။ စာအုပ်အများကြီးတင်လို့မရတာကြောင့် အကြိုက်ဆုံးစာအုပ်(၃)အုပ်ကိုသာ ထောင်ထားရင်း အရုပ်သေးသေးလေးတွေ တင်ထားဖြစ်တယ်။ ကလေးအရွယ်က ပေးခဲ့တဲ့ တန်ဖိုးနည်းလက်ဆောင်လေးက အမြဲအသုံးဝင်နေတော့မှာ ကျွန်တော်သိသည်။
YOU ARE READING
ငှက်ကလေးကိုချစ်မိရင်(ငွက္ကေလးကိုခ်စ္မိရင္)
Fantasyကောင်လေးတစ်ယောက်ကို ချစ်မိတာကလွဲရင် ကျွန်တော်က ယောက်ျားတစ်ယောက်ပါပဲ။ ဝဋ္ဌာတိမ်ငွေ့ ...... ယောက်ျားလေးဖြစ်နေလို့ မိန်းကလေးကို ကာကွယ်ရမယ်ဆိုတာ သဘာဝသိပ်မကျပါဘူး။ဘယ်သူမဆို ကိုယ်ချစ်တဲ့သူကို ကာကွယ်တတ်ကြတာအဆန်းမှမဟုတ်ပဲ ထားထားငယ် ..... ေကာင္ေလးတစ္ေယာက္ကို...
