Ilang minuto nang naghihintay
Sa tabi ng isang kilalang kainan sa bayan
Napakainit ng araw na iyon
Sa pagkainip ay lumingon lingon sa paligid
Wari'y nagmamasid sa mga sasakyang batid ang kanilang destinasyon
Ng paglingon sa kaliwa ay biglang natagpuan
Ang magpapatunay na nangyayari nga pala sa totoong buhay
Ang noo'y akala na kathang isip lamang
Akala ay sa imahinasyon lamang ng mga magagaling na manunulat
Pero sa puntong iyon ay napatunayan nga
May mga taong magpapatigil nga ng saglit ng ating paghinga
Wari'y sinasabi na maniwala ka sa tadhana
Wari'y sinasampal sayo ang katotohanan
Katotohanang posible nga palang bumagal ang takbo ng oras
Posible nga palang tumigil ng bahagya ang pagtibok ng puso
Posible nga palang nasa kanya lamang ang iyong buong atensyon
Posible nga palang matulala ng dahil lang sa isang ngiti
Posible nga pala ang mga bagay na akala ay hindi totoo
Mga posibilidad na hinding hindi makakalimutan
Kailanman may hindi mabubura sa isipan
Ang unang ngiti na nagpakislap sa mga mata
Ang pakiramdam ng mahawakan ng saglit ang nanlalamig na kamay
Ang pagkakatabi sa upuan sa tricycle
Ang mga mumunting paguusap habang nasa byahe
Ang mga matang kay sarap titigan
Ang ngiting nakakahawa at nakakatulala
Ang mga munting bagay na napapansin habang nagnanakaw ng sulyap
Mga maliliit na bagay ngunit sobrang nakakaapekto
Nakakaapekto sa pusong waring gustong kumawala
Noong kaarawan ay biglang bumisita
Kaunaunahan na naman sa listahan
Kaunaunahang lalaki na nagpunta sa tahanan
Kaunaunahang lalaki na humiga sa mga hita
Kaunaunahang tinitigan mata sa mata
Kaunaunahang hinaplos ng may paghanga ang buhok na kailangan ng pagupitan
Kaunaunahan sa mga listahan
Listahan ng mga bagay na sana'y una at huling maranasan sa taong mamahalin
Listahan na nagbigay ng munting pagasa
Pagasang pagkalipas ng mga panahon ay sikretong itinanim sa puso
Sa katunayan ay patuloy na bumibilis ang pintig ng puso
Sa bawat minutong nakaw na sandali ay naipon sa isang kahon
Kahon ng mga alaala at pagasa na pilit itinatago
Kaya't hindi nawala sa puso at isipan makalipas ang anim na taon
Patuloy na humahanga
Patuloy na itinatangi
Patuloy na inililihim ang malakas na pagtibok ng puso
Patuloy na iniinda ang sakit ng katotohanang hinding hindi makakamtan
Patuloy na binabaliwala ang pusong isinisigaw ang apat na letra ng pangalan
Apat na letra na sanay katumbas ng pagibig
Ngunit may mga bagay na kailangan ng wakasan
May mga pagasang kailangan ng itigil
Mayroon pala talagang pinagtatagpo lamang ngunit hindi para sa isa't isa
Mayroon pala talagang hindi nakatadhana kahit gaano pa kalalim ang koneksyon
Mayroon pala talagang hindi pa nahahawakan ay kumakawala na
Mayroon pala talagang kailangang hayaan upang maging masaya
Kailangang palayain kahit hindi naging sa iyo
Kailangang hayaang maging masaya kahit hindi ikaw ang dahilan
Mga bagay na kailangang gawin upang matutong tanggapin
Tanggapin na wala naman talagang istorya ng kayo
Isang kwento na may noong unang panahon ngunit masaklap na pagtatapos
Dahil sa kwento ng pagibig ay hindi naman talaga palaging masaya
Hindi ka palaging panalo
Pero yung kwentong nabuo ay sapat na upang maging masaya
Masaya sa alaala ng minsan
Minsan ay naranasan ang isang uri ng pagibig
Minsan ay may magpapaniwala sayo na totoo ang mga nailathala ukol sa pagibig
At magpapaniwala muli sayo
Na hanggang sa "ako" at "ikaw" lamang
At isasampal sa harapan mo
Na ang salitang "tayo"
Ay hindi nakalaan sa inyo.
-Micky :)
