#لأني_أحببت/ 21
#قصة_حب
... ناديه@
...
ماصدگت طلع الصبح وفتحت عيوني شفت نفسي بـبيت بابا واللي أحبهم كلهم محاوطيني
اتفقنه نور يروح للمحكمه يشتكي على إياد ويرفع دعوة عليه
المشكله حتى اوراقي ومستمسكاتي بقت بجنطتي عنده بغرفته
وضيّ خلت شيرين واولادها عد أهلها وقفلنه البيت وطلعنه للمستشفى سويت فحص والدكتورة اللي كشفت عليه حجيتلها كلشي تعاطفت وياي وتكفلت بكتابة تقارير طبية خاصة بالموضوع تكشفه وتنفعني بالقضية اللي راح ارفعها على هذا الشاذ والمريض النفسي
اخذت علاج وادوية
للظهر رجعنا لبيتنا وضيّ على أساس تخابر شيرين تجيب زين وياسمين وترجع
شفت بالباب هذا المجنون إياد موگف سيارته ويكسر بيها ويصرخ ... نااااديه ..
متت من الرعب ضيّ هم خافت
كالت امشي ناديه نروح نرجع لأهلي قبل لايشوفنه ويسوي مشكلة بس هو انتبه علينه
التفت و شافنه
عيونه دم صايرة من الغضب إجه يركض جرني وسحلني وضربني بالشارع وضيّ بقت تصرّخ واني اغمى عليه بالكاع وكعت
ظل يغلط ويفشر ويسب ويلعن
التمت الجهال وكم واحد من الجيران انتبهت عليهم صحيت وجنت ادفّع بي اريده يعوفني
كتله لو تموت ماارجعلك ياحيوان عوفني وأصرخ وابجي سحلني لسيارته
دفعتة حيل ..
كتلك ماارجع ولك وبيننا محاكم
ششنو لج هه تخبلتي ليلة واحدة ودخلتي المحاكم بيننا لعد لو سنه شتسوين !
بعده لازمني من زندي بكل قوته
بقيت ادفع بي واصيح آااي هدني وخرّ عني
ضيّ بعدها تصرخ وتنادي لحگوا علينه ياعالم ياناس وطلبت من الجيران يساعدونه
إجه كم واحد التموا وبقوا يحجون وياه عوفها متستحي تتهجم على مرة بالشارع ! عافني وظل يتجادل وياهم هربت وركض للبيت دخلنا ضيّ قفلت الباب
مصدگت اخلص منه متت رعب ختلت بغرفتي وتلفلفت وبقيت ارجف اتخيله يطلعلي من الحايط ويهجم عليه
اسمعه بعده صوته يصرخ ويضرب بالباب ضيّ اجتني تملخ بخدودها ولج ناديه اسمعه يكول ماروح منا اذا متتطلعين
..
گوه احجي وكل شويه أجر نفس
ضيّ فدوة خابري ابوج لو الشرطه الله يخليج وابجي
ياربي وين صار نور وأنشغ
وجسمي كله أنشلّ
ركضت ضيّ خابرت أهلها
وره شويه اجت لج لحكي ناديه اسمع صراخ زلم بالشارع !
ركضت وياهه لبرة جان نشوف نور وابو ضيّ والجيران كلها تتماطل وتتعارك ويه هالسافل إياد
شفت نور خشمه بي دم لطمت وصيحت
لعنة الله عليك إياد .. غضب الله عليك ياحيوان
شافني اشرلي بأصبعه بغضب بسيطه ناديه اني اعلمج ياشريفه يابنت الإشراف تفل عليه كدام الناس وراح بسيارته دخلنّه نور وابو ضيّ كله امشي عمي لمركز الشرطة نشتكي عليه
ماقبل نور
ضيّ بقت تبجي وتعاينلي بحقد كأنما تحاسبني لأنني السبب بكل هالمشاكل والطلايب
الحمد لله شيرين والجهال مموجودين وما شافوا اللي صار ..
نور كال كلفت محامي وهو يتصرف بس هذا المجنون يكدر كلشي يسوي ويتهمج بأي تهمة بما أنج كاسرة قفل الباب
بقيت محتارة والوم بنفسي على اللي جرة وصار
ياريتني بقيت عانس وماورطت نفسي واهلي بهالورطة
....
بقيت هالمده كلها تقريبا شهر كامل ما طلعت من البيت بعدني مصدومة وممرتاحة
أدعّي عليه ليل نهار
الله يفضحه وينتقم منه الحقير
الله يعلم على كم بنيه مسوي هالجريمه وكم وحده كانت ضحيته بهالمكان الغريب الساكن بي
الف الحمد لله والشكر اللي خلصت منه هربت ونجيت ..
بعدها تخلصت من كل الشغل اللي عندي
اتصلت بأم همام ودزيته الها وماعدت اشتغل ولا استقبل احد بالبيت وحتى أم نرجس إجت هنتها وطردتها ساعه السوده اللي شفتها وآمنت بيها كلة منها ورطتني وخدعتني
..
القضية بقت جارية بالمحكمة والتقارير عند المحامي كل اللي كدر يسوي طلكني ببلاش منه بدون لامؤخر ولا ذهب ولانفقة الحمد لله فلوسي بقت عد شيرين ماخذتها وياي وذهبي القديم
حتى ملابسي رجعتلي من عنده متمزكه ومشككه على أساس ينتقم مني هذا المريض بس مستمسكاتي كدر المحامي يجيبها وسجل تعهد منه بعدم التعرض بعد ماشوّه سمعتي كدام كل الناس وطلّع عني اشاعات بأنني مو بنت طلعت مو شريفة وأنني سىرقتة وهربت ..
بقيت كدام الناس مطلقة ومجردة من كل حقوقي بس ... لأنني_إمرأة بمجتمع الإسلام اللي مينصف حق كل وحدة تشتري حريتها وشرفها من المرضى المجانين وظلّام وعبيد الدنيا ...
مرت الشهور والسنين وشيرين كبرت ونجحت من الثالث متوسط وعلى أساس تسجل بالاعدادية
وزين صار بالمدرسة صف أول ابتدائي
واني احاول اتناسى الماضي واتأقلم ويه الوضع
كنت اشتغل شغل خفيف بس لمشغل ام همام مااكدر بعد مثل قبل تعبت وصحتي ماتساعدني يوم عن يوم اذبل ويزداد عندي الألم والمرض والصدمة بقت نقطة سودة بحياتي زواجي الفاشل سببلي رهبة من التعامل ويه الآخرين وخاصة الذكور ..
جمّعت فلوس فوگ العندي وتقاعد بابا كلت يفيدن مااعرف الدنيا شضامتلي ..
بالعطلة الصيفية نور أخذ إجازة وسافر ويه ضيّ لدهوك والموصل سياحة يصيف هناك رحلة ونزهة يغيرون جو يبقون أسبوع لو أكثر ماحددوا
اخذوا بس ياسمين وياهم
واني قررت اروح ويه أم همام كان عندي اتصال مستمر بيها بالتلفون
وعرضت عليه اني هم أروح أغير جو وأتونس سفرات عوائل وفرصة أطلع من جو الكآبة والعزلة
كانت عدهم منشأة كبيرة رحلة جماعية للعوائل للحبانية والرزازة وبعدين جولة يفترون ويرجعون لبغداد
عمري مازرت بغداد بس أسمع بيها أشوفها بالتلفزيون
كانت جنة وحلم كل عراقي يتمشى بشوراعها
تركت خبر لنور وكتلهم اعتني بزين لاتخافون عليه وحضرت جنطنة و ملابس لزين وشيرين
وكانت كلش فرحانة لأنها أول مرة تسافر وتطلع من السليمانية
سجلت بالرحلة حجزت ودفعت فلوس واتفقنه تطلع السيارة من مقابيل المدرسة الابتدائية اللي يمنه بوقت الفجر
زين عمره سبع سنوات وكان كلش محبوب ولسان عسل وحرّك وسوالفه تخبل ونسنّه بالطريق
شيرين هم كانت كلش حلوة وبقمة انوثتها وشبابها عمرها 16 سنة
واني عمري 24 سنه وأحس بنفسي عجوز بالخمسين تعبانة نفسياََ وجسدياََ وماعدي رغبة بأي شي
وبعد آخر حدث مرّ عليه كرهت كل رجال على وجه الأرض وماعندي تفكير غير بس بسعادة شيرين
الله شكد اتمنى تتعرف على شاب يستاهلها ويحبها ويداريها ويحبها من صدگ
كنت من اشوف كل واحد يعاين عليها بنظرة إعجاب اتذكر نفسي من كنت بعمرها واللي صار ويه سلطان "
...
يتبع ...
#قصه_ناديه @21
