#لأني_أحببت/ 27
#قصة_حب
... ناديه@
...
بعد مايمر الانسان بلحظات مرض وتعب جسدي يكون بحاجه لقضاء أكثر وقت ممكن مع العائلة و مع الناس اللي يحبهم ويحبونه ..
رجعنه بليل للسليمانية وراغب وصلني وراح رجع لبيتهم
مرت الايام وفرحتي بشيرين متنوصف لأنها دوامت بكلية الطب وحققت حلمها وحلمي
تعب السنين
وثمرة جهود وتضحيات
شيرين وأخيراً راح تكون ("الـدكتورة شيرين") وتتخصص باللي يعجبها ويناسبها ..
اخذتها لارقى المحلات والمولات و اشتريتلها ملابس جديده وكل اللي تحتاجه وكل اللي وتشتهي وفرحت لفرحها وتشوقها للدوام
بديت اجهز لزواجي اللي تقرر موعدة بعد ما اكمل العلاج الشهر الجاي بلكي اشوف تحسن وأكمل حياتي ويه راغب"
كنت خايفه من موضوع الزواج كلش ومترددة مااعرف إذا كان إحساسي بسبب صدمة زواجي الفاشل من إياد
ممعقوله راغب يكون مثله !
مستحيل ..
اصلا راغب رجل بكل معنى الكلمه وشهم وتحملني أكثر من ثلاث سنين وبيننا عشّرة حلوة وذكريات بزعل وصلح وعتاب وفرح وبساطة ..
وتقريباََ تحركت مشاعري شويه تجاهة
..
وعلى طاري أياد" عرفت من أم همام" أنه نقتل بالقصر الساكن بي
لگوا جثته معفنة بعد مدة طويلة من قتله
واتضح أنهم عصابه يجتمعون بهالمكان للعب القمار والدعارة وبعد فترة من البحث عنهم گدروا يلزمون كم واحد منهم
الحمد لله ربي اللي نجاني وخلصني منه هالوسخ بنفس اليوم جان هسه حالي من حاله أعوذ بالله
وحمدت ربي لان خلصت من هالكابوس والله سبحانه اخذلي حقي منه وعاقبه على أفعاله بالدنيا قبل الآخره
..
مرت الأيام ورجعنه لحياتنه الطبيعيه الكل مشغول والعام الدراسي هذا حافل ومختلف وأحس بنوع من التفائل
راغب اخذني وياه اختارينه غرفة اخشاب جديدة وبدّل القديمة العنده وبده يلحّظ ببيته واشترى أثاث جديد
تطورت اجهزة الموبايل اشترينه اجهزة جديدة وراغب تعود يتصل بيه اذا مو كل ساعة كل ساعتين ونبقى نسولف وندردش
اشتريت لشيرين جهاز حاسوب كمبيوتر تدرس بي وتنزّل بحوث وشغلات خاصه بدراستها واختصاصها
وكانت تحجيلي عن كلشي يصير وياهه بأدق التفاصيل واكو ولد شاب أسمر ملزگلها بنفس قسمها معجب بيها بالجامعةاسمه صلاح "
هيه تتذمر منه وضايجه ومعاجبها
بس كنت اتوقع راح يصير شئ بينهم بالمستقبل لأن كل علاقه حب تبدي بالتذمر وعدم المبالاة والمشاحنات وشيرين كلش حلوة و ذكية و مميزة والف من يتمناها
بعد كم يوم مرت
ضيّ اخذت جهالها وطلعت لأهلها تزور والدها مريض العصر وبقيت اني وشيرين نسوي كيك بالفرن وندردش بمواضيع وسوالف عن الجامعه ..
شيرين كالت ناديه تدرين .. أجانه أستاذ يجنن من إيران آية من الجمال والبنات ميتات خربانات عليه ويتمنن يرقمنه
ولج يرقمنه شنو !
هاي شبيج ناديه ينطنه رقمهن يعني ويسون علاقه وياه
هااا .. ايي عادي يمعوده شبعانيين الأساتذة بالطالبات الرخيصات
لا وداعتج ناديه كلش رزن هالاستاذ ومامهتم لأي طالبه وعيونه اويلي على عيونه
صفر تتدوخ تسطر سطر ..
ولا حواجبه ولحيته تجنن ..
والبنات صافنات ببوجهه ويذوبن ذوبان وأول ما يطلع من القاعه يبقن يغنن أغنية ... "الهوى سلطان" الهوى " سلطان" ...
... اثناء كلامها لشيرين لفتت انتباهي الأغنية والاسم !!
كلامها هذا أني رددته قبل أكثر من 12 سنه ..
دخلت الكيكه بالفرن ودا أسده
أيي وشسمه هذا ابو عيون الصفر والحواجب واللحية الحلوة
.. أسمه دكتور "سلطان" عبد الرحيم "
شهكت وطبكت باب الفرن على أيدي احتركت بالنار وصرخت ... آااي ...
ركضت شيرين إسم الله عليج ناديه حبيبتي تأذيتي !!
شبيج ناديه شصار بيج؟!
بقيت أرجف ها اا لااا ... لااا مابيه شي جيبيلي دوة حروق من الكاونتر
راحت شيرين تجيب علاج الحروق أني مامتألمة ولاحاسة بالحرق أحس گلبي انضرب بسيف أختنكت طلعت ركض للحديقة فتحت دكم قميصي وبقيت اتنفس حييل
إجت شيرين لفت أيدي ودخلتني
الجو بارد كان
كعدت على الكرسي وعيوني أنملت دموع مسحتهن خفت تنتبهلي شيرين
خافت عليه انهبطت وجابتلي عصير
أسفه ناديه اني السبب دوختج بالكلام
لا حبيبتي ما الج علاقه اني تعبت المفروض اتمدد بالسرير راقبي انتي الفرن واني رايحه لغرفتي
بس ماوصلت للغرفة لزمت راسي افتر ..
سلطان" سـسلطان" عبد الرحيم "... !!
ياربي ...
سلطان" عبد الرحيم" ... !
هذا أسمه اللي بالملازم والاسئلة
... نفسه هوه ... معقولة ... !!!
مستحيل ...
لزمت صدري گلبي احسه راح يطلع من مكانه
عصره بظهري أجتني متت من الألم زحفت زحف للسرير
دگ موبايلي بعيد على الشحن ماكدرت أوصل إله
صرخت من الألم و كوه أتنفس
إجت شيرين تركض أشرتلها على الموبايل كتلها هذا راغب ردي كليله اخذت علاج ونامت
ردت شيرين واخذته منها غلقته
تمددت وبقت شيرين خايفه
ناديه خليني اخذج للمستشفى
مابيه شي حبيبتي انتي كملي الفرن وتعالي يمي خلي باب الغرفه مفتوح
ماشي ناديه هسه بالعجل مااتاخر
بلحظة ..انعاد شريط ذكرياتي براسي ..
لمست شفايفي اللي محد باسهن غيره
لو كلامه وانفاسه وسوالفه ..
سلطاني حبيبي ..
يالله ...
اكثر من 12 سنه ياظالم ياقاسي
حضنت المخده وماحاسه بألم أيدي اللي تجوت وأحترقت وصارت حمره
بس حاسه بألم گلبي اللي تجوة الف جوية برحيل سلطان" وفراگه ..
شيرين جابتلي كيك بالماعون وجاي تجتّني وبدت توكلني ناديه خليني اخابر ضيّ ترجع واخذج للمستشفى فدوة قلقتيني عليج
مابيه شي حبيبتي شويه تعبت من وكفت بالمطبخ انتي كملي كلامج
كلامي عن شنو ؟!
شبيج عن الدكتور سلطان"
هااا .. لاهيج .. مو مهم
انتي ارتاحي هسه ناديه بعدين احجيلج
لا شيرين كملي شنو سالفته هذا متزوج عنده اقارب هنا وبديت آكل وسويت نفسي ممهتمه
ناديه بصراحه البنات جابن معلومات عنه احسن من المخابرات نفسها ..
بقت شيرين تحجيلي واني كل كلمه تنزل على گلبي مثل السيف وتقطع بي
سلطان" راجع قبل شهر دا يقدم محاضرات بالطب بالجامعة بنفس الجامعة اللي تدرس بيها شيرين !!
المحاضرة ساعه مو اكثر باليوم
وبعدها يروح
ومأجر شقه بفندق قريب على الجامعه
وأهله مقيمين بإيران من سنه الـ 91 متسفرين ويه التبعيه والمعارضين للحزب وبعد معلومه هم يريد يبيع أملاك اهله هنا ويحولها فلوس لهناك
وعرفت من شيرين المحاضرة باجر ساعه بالعشرة الصبح ..
بعد هالكلام اللي سمعته انمسحت ذاكرتي من كلشي وبقت بس ذكريات سلطان" ...
سلطان عشگ الصبا عشگ السنين وغرام المراهقة وهوى الروح والحب الأول ...
بقيت افكر شلون يربي شسوي هسة !
أروح اشوفه .. لااا ما أروح
شلون لعد شسوي ..؟!
لازم أروح والتقي بي واشوفه ...
لازم اروح واشوفه ... لازم ..
...
يتبع ...
#قصه_ناديه@27
