#لأني_أحببت/ 24
#قصة_حب
... ناديه@
....
قفل غرفة التصوير وطلب من الولد يقفل المحل
طلعنه نتمشى ببطء ونسولف ..
...
ناديه تدرين من سألتج مرتبطة لو لا سكتي وحيرتيني ثاني يوم رحت لأم همام سألتها وحجتلي كلشي عنج
صدكيني تأثرت وعجبتيني
تمنيت لو عرفتج من زمان ..
بصراحة راغب أني هم سألت أم همام عنك وعرفت عنك كلشي وحبيت اتعرف عليك أكثر .. بس ..
ضحك ..
يعني متعادلين !!
يعني .... تقريباََ ..
جرني من أيدي أمشي ناديه اكو واحد يسوي شاميه بس تشتمين ريحتها تشبعين
على كيفك يمعود شاميه شنو !
شبيج أول مرة تسمعين بهالاسم
تعالي تعالي ...
وكفنه اشترالي كيس اللي وكيس اله
صدگ ريحتها تشهي وحاره ومالحه
ظل يغرف بيده وياكل بشهيه ضحكني
رحنا لرصيف دا نتمشى الظاهر حتى بايسكل ماعده وكملنه كلامنه وخلص كيسه وحضنني وبده ياكل وياي من الكيس مالتي شكد بسيط ولطيف
ورة شويه وكفت
شبيج ناديه امشي بس لا تعبتي !
لا راغب بس ..
بس شنو يمعوده امشي جرني
لحظة الحذاء ... انكطعت
كلي بسيطه .. كعد بالكاع وطلع مقراضه من جيبه وكطع السير مال الحذاء وجر رجلي لبسني
شكد خجلت من تصرفه
كوم يمعود عيب هيج كاعد جوة رجليه بالشارع !
كام شبيج غير دا اساعدج !
وشلون امشي هسه تك وتك !
هم بسيطه رجع كعد خله رجلي الثانيه بحضنه ونزعّني الحذاء الما مكطوع وكطع السير وشمرة ورجع لبسني واني املخ بخدودي من الفشلة ..
كوم الله يخليك فضحتنة والناس تعاين علينه شتكول !
شبيج ناديه شعلينه بالناس شمسوين وكام وهسة شلوني سويتلج الحذاء شحاطه ويضحك
اوووف .... اصلا انته عبقري
دمشي بابا رجعني للبيت تأخرت
...
بعدها بقيت محتاره بأمره واتذكر سوالفه
بداخلي اكول بالله هذا شنو غداني شاميه وصنعلي من الحذاء شحاطه شلون اعيش وياه !
رجعني المسافه كلها اللي رحتها بسيارة مشي ..
بعدين دليته ببيتنه ووعدته اخباره ونتواصل ..
رجعت هلكانه ومتردده شلون اتصرف هسة
اكمل وياه واتعرض لمفآجات بحياتي لو ابقى هيج بدون ارتباط
مرت الايام وعلاقتي براغب جدا سطحية واحاول قدر الإمكان ما أخلي يتقرب مني لو أتعلق بي خفت من تجاربي الماضية والفاشلة وخفت أحبه ويعوفني مثل سلطان
ليش هو بعد سلطان ظل بگلبي مكان أحب أحد !
صارت علاقتنة علنية كدام العالم وكل مايفاتحني بموضوع الزواج اتحجج واطلب منه مده اتعرف عليه أكثر
زرته ببيته كم مرة تعرفت على والدته ووالده وحبوني وشفتهم شلون من أهل الخير جداََ بسيطين وطيبين
وكم مره اخذت زين وياي راغب كان يحبه كلش وتعلق بي
وهو هم زارنه ببيتنا وتعرف على نور وفاتحه بموضوع خطوبه وزواج بس اني رفضت واجلت الموضوع لحد ما بعد مابيها مجال صرت مجبورة اوافق ماعدي عذر يخليني ارفض لو أأجل ..
تقريباََ سنه على تعارفنه تجهزنه نشتري حلقه بس خطوبه ونسوي حفله صغيرة ببيتنه ماطلبت منه شيء عرفت ضروفه صعبه وقدرتها
واني كنت متوفر كلشي عندي من ذهب وملابس وغراض
وبقيت مستمرة بشغلي ويه ام همام رغم التعب وصارت عندي فلوسي الخاصه ونور ممقصر وياي لا اني ولاشيرين
حددنه اليوم لبسنه حلقات وجاب والدته ووالده لبيتنه تعشوا يمنه كان فرحان وملهوف وعيونه تلمع من السعادة
والكل فرحانلي بس أني لا
أحس بشي ناقصني وقلق وكأنما مجبورة على هالشي
تقبلت الموضوع لأن ماعدي حل بديل ولاعدي خيار ثاني رغم ما الكل جان يباركلي ويتفائلي ويتمنالي حياة جديده وحلوة بس ماعرف شنو النقص اللي دا أحسه
رگصنه واخذنه صور بأعتبار هو المصور
مرت أيام على خطوبتنه مالمسني راغب ولاطلب مني يبوسني يمكن خاف لا اتضايق لو أرفضة وما اتقبلة
كنت احسه خجول ويخاف من يحضنني لو يلزم أيدي
مرات نطلع بليل وزين متعلق براغب لمجرد مايسمع بأسمه يركض ويتعلق بركبته ويحضنه
بعد مـرور كم يوم بديت أعاني من تدهور بصحتي بسبب كلاتي
بالبداية ألم خفيف بظهري تجاهلته
صارت عندي مشاكل صحية خاصة
راجعت بالمستشفى وأخذت علاج بس ما شفت فرق يمكن مامكتوبلي افرح لو اتهنى وراغب كان رجل مميز ومابي عيب وأي بنيه تحلم بشاب مثله رغم فقره بس ماكان عيب بالنسبة اللي ..
الكل بده يهتم بيه
حتى شغلي قللت احتمال من كعدت التطريز والمكينه تأثر وتسبب الوجع
ونور اخذني لدكتور اختصاص واتضح عندي تعب بالكلى وبديت بعلاج وكان هذا أحد الاسباب اللي خلاني أجلت الزواج لحد ما أتحسن
راغب ماكان معارض بالعكس يخاف عليه وياخذني مرات بنفسه للمستشفى للعلاج والأدوية والمسكنات
مرت شهور على هالحال بين شغلي على الخفيف بالتطريز وعائلتي ومراجعتي للمستشفى ولدكتوري الاختصاص ماتحسنت وكنت أداري الألم اللي ماينحمل مرات ابقى اصرخ واتوجع واذا اشتد عليه اتمنى الموت والخلاص
...
شيرين وصلت للسادس علمي وزين بصف الرابع الابتدائي وياسمين تسجلت بالمدرسة صف أول ابتدائي
صارت أحداث السقوط بعد 2003 وكننا خايفين والاوضاع جدا متوترة
شيرين كانت متأملة تتطلع معدل عالي وتروح كليه الطب او الصيدلة
راغب انشغل عني هالفترة بسبب إهتمامه بأهله والوضع كله مركب ويخوف وخاصه والدته مريضه
وتحتاج ادويه واهتمام خاص
بمرور الأيام اتحسنت الأوضاع وباعتبار السليمانية مدينه سياحيه انفتحت على العالم وبدت تجي زوار وسيّاح ودخلت شركات إتصالات وحاسبات وموبايل وراغب عاف محل التصوير
و اشتغل بشركه اتصالات وتحسنت احواله ...
مرت الشهور ...
بيوم تأخر عليه راغب استغربت
انتبهت له مرت عليه أيام ميتصل ولا يسأل عني
ظل بالي يمه كلت لازم اني اروحله للبيت اسأل عنه واتطمن على والدته خاف بيها شئ اخذتلها كعك بعلاكه ورحت لكيت باب البيت مفتوح !
دخلت ماكو أحد
ما اندل غرفه راغب بس بقيت واكفه بالصاله وبيدي علاكه الكعك انفتحت باب طلعت بنية غريبة اول مره اشوفها تعدل بـملابسها شافتني فزت اخترعت وركضت لباب الشارع طلعت بسرعة
تفاجأت !
بدون تفكير صحت بصوت خاله ام راغب !!
طلع راغب من نفس الغرفة اللي طلعت منها البنية !
انصدمت لمنظرة بالشورت طاحت العلاكة من أيدي بالكاع ووگع الكعك تتطشر صفن ببوجهي وارتبك
طلعت ركض بقة يصيح وراي نااااديه ...
يتبع ...
#قصه_ناديه@24
