#لأني_أحببت / 8
قصة_حب
. .. ناديه@
..
سمعت باب الشارع انطبكت حيل آمنت
طلعت روحها ان شاء اللة من طلعت من البيت
بقيت كاعده بالكاع وحاضنه شيرين وارجف من الخوف أول مرة يصير وياي هالموقف
عمري ماتجادلت ويه أي واحد
دائما أقدم تنازلات وانسحب
بس هالمرة استفزتني شلون هددتني الملعونه واني كنت اريد فرصه افضحها كدام نور هسه هيه تهددني وتريد تفضحني !
وبقى كلامها كله ببالي
معقوله سلطان وضمياء متفقين عليه !
شلون عرفت !
ببالي ظل يودي ويجيب واحتاريت شلون اتصرف
شيرين بقت تنشغ حبيبتي اخترعت وخافت نهبطت
وتحلفت بنور كالتلي ناديه إذا انتي متگولين اني اگول
هدأتها وكتلها لا هالمرة لازم افضحها لضيّ واسولف لنور أدري بي ماراح ينصفني بس لازم احجيله مابيها مجال بعد أسكت
واللي يصير يصير
وگفت شفت نفسي بالمرايه شلون كطعت شعري ومزكت هدومي هالسافلة المجنونة
ولو اني ما قصرت هم ملختها وضربتها ..
طلعت من الغرفه تأكدت ماكو صوت الها ركضت للتلفون خابرت على نور للمطار رد واحد كلي مموجود بس يرجع اكله يخابركم
كتله ضروري يخابر فدوة
بقيت بيومها كلش خايفه شيرين كالت نقفل الباب حتى لاترجع شفتها فكرة قفلناهة من جوة وباب المطبخ هم قفلناهة وبقينه منتظرين نفكر شنسوي .. ثاني يوم ما اتصل نور
وصيت شيرين تنتظر يم التلفون خاف يخابر نور واني اروح اجيب خبز وجبن اي شئ ناكل كتلنه الجوع وكتلها تقفل الباب وراي ولاتفتحها لأي واحد
طلعت اكو محل شويه مسافه أشتريت منه صمون مال معمل جاهز مسلفن
لأن فرن المخبز بعيد وخفت اتأخر على شيرين وأشتريت بيض وجبن وبسكت دا أحاسب الولد حسيت بحرارة وراي ونفس قوي وريحه عطر مو غريبه عليه وصوت سلطان گله للولد شكد حسابك !
غمضت عيوني وحسيت الغراض ح توكع من الرجفه لزم العلاكه من ايدي واشرلي اطلع كدامه هزيت برأسي وطلعت
بقيت اتنفس بسرعة برة المحل بالشارع
.. اجه وراي
شلونك ابو ندى اخذت العلاكه منه وحجيت بعصبية
سلطان وتاليها وياك انتة شتريد ؟ !
ضحك ..
على كيفك خرعتني بصوتك الاخشن من صوت أبوي وبعده يضحك
اشرتله باصبعي وبعدني غضبانة وعصبية
إذا صوتي هيج ميعجبك لعد شكو لازگلي وملاحگني متشوفلك وحده مايعه مثلك وتخلصني
شفته ضاج وبعيونه صارت نظرة حزن وتفشل
هز برأسه ..
آسف ناديه اعتذر واوعدج ما اضايقج بعد هاليوم دار وجهه وراح
خليت أيدي على حلكي هاي شسويت أني سوده ببوجهي تندمت على كلامي الفضّ وياه
ردت الحگه بس تذكرت شيرين وحدها وجوعانه
شگد غبيه إني
رجعت بالطريق ألوم بنفسي تندمت يعني الولد منتظرني شوكت اطلع من البيت
وصار شهم ودفع الحساب المفروض أشكره
يربي دخيلك ..
هذا الألم اللي دا يصير بيه والمواقف اللي انحط بيها بس
#لأنني_أحببت "
ومو من حقي أحب وأعشق !
الحزن ملى اعماقي ورجعت خايبة ومتفشلة دگيت الباب تأخرت شيرين يربي بس لا بيها شيء
دگيت هواي
صيحت شيرين .. شيرين ...
فتحت الباب وتبجي وعيونها مورمه
دخلت بسرعه وقفلت الباب
حضنتها شبيج حبيبتي أهدي يعمري بقيت أبوس بيها هدأت شويه بس بقت تنشغ
اخذتها للمطبخ كليت بيض وحضرت الاكل وحطيته على الطاوله
ماقبلت تاكل !
فهميني شيرين شصاير !
ناديه خابر نور وبقه يحجي وعصبي وما اقتنع بكلامي طلعت ضيّ سابقتنة وحاجية غير حجي ومفهمتة غير شي
لطمت على خدي يربي شلون هسه منين الگاهه دخيلك
قنعتها تآكل ومن يجي نور أحاول اقنعه
الله يعلم شنو حاجيه هاي الملعونه عليه لـنور
كملنه الأكل ورتبت البيت شكد حلو من وحدنا بلا هالمزعجة ضيّ
ماادري شوكت يرجع نور
فكرت اخابر سلطان اعتذر منه على تصرفي السخيف
ترددت
رفعت السماعه ودگيت الرقم وسديته
ورجعت كررت العمليه خمس مرات
شلون سالفه هاي !
كمت دا اروح دگ التلفون شيرين ركضت ناديه ردي بلكي نور
خفت رفعت السماعه كلي وتاليها وياج تريديني لو لا !
...
من سمعت صوته ردت روحي وفرحت
اشرت لشيرين تروح تلعب كتلها هاي صديقتي روحي
راحت للغرفه
كعدت وحضنته للتلفون
كتله ..
آسفه سلطان أعتذر
آااه منج ناديه عذبتيني هواي وتاليها وياج؟!
ضحكت
انته شتقصد بلة كل شويه وتاليها وتاليها ؟
اني اكلج تدرين اني كاعد يم التلفون خمس مرات يدگ ويفصل وماكو غيرج صدكيني ماعدي صاحبه تتصل عليه غيرج
لابله !
مصدگتك !!
مو مهم اصدگ هسه أني دا أمر بضروف صعبه ما اكدر لا اشوفك ولا اخابرك
وهسة خابرت حتى أعتذر عن تصرفي السخيف وياك الصبح
ماشي مسامحج بس بشرط
يوو سلطان رجعت تتشرط !
لعد ما اسامحج
سلطان فدوة لخاطر الله حيرتني
انتي اللي محيرتني ومتعبتني وداعتج وداعت حبنه
صارلي من يوم اللي تلاگينه بمدينه الألعاب واللي صار بيننا بدولاب الهوة والبوسات مخبلتني مانام الليل وفكري تايه بيج ومحتار
شاغلتني ومشتاقلج كلش ناديه
بقه يحجي كلام يذوب وكل كلمه يكولها ياويلي وسواد ليلي من هالحب والغرام
ذوبني وبقيت أسمع ورحت لعالم ثاني وخيالي شنو هالسلطان اللي سيطر عليه ..
دقايق واندكت الباب بقوة تكسرت ...
...
يتبع..
قصه ناديه@ 8
