#لأني_أحببت / 5
#قصة_حب
.. ناديه@
...
من كثر ماحبيت ألفت انتباهه للولد سلطان" وتأثرت بكلامها لضمياء دخلت بعد المحاضرات على السريع للمغاسل بالمدرسة وغسلت وجهي وبللت ايدي ومسحت شعري ورخيت القراصه وشديت الحزام ضب على جسمي ورفعت ردان القميص طبكتها وطلعت
جمعت الاوراق بالجنطه وحضنتها ومشيت ببطء شفت ضمياء راحت ويه سعد صاحبها وبقت تعاين عليه الملعونه شلون تتصرف بهيج جراءة واني الخوف سوة رجفه بعظامي ونعگد لساني ..
تلفتت يمنه يسرة ماهو الولد وصلت للمكان اللي انصدمت بي البارحه
وكفت طلعت ورقه كلت اكتب رقم تلفوني واكتب اسمي ترددت
خفت توكع بيد ابن حرام لو يصير شئ عكس
رجعت القلم والورقه بالجنطه شلت راسي نزيت !
شفته !
ابتسملي فديته كأنما ملاك نازل من السمة
تنحنح وگلي "مساء الخير"
عضيت شفه وابتسمت
اشرلي بيده حركات الصم البكم كلي انتي خرسه !
صدگ ضحكني
رفع حواجبه مستغرب
ياويلي يجنن بس اني صدگ خبله اللي نسيت نفسي وضحكت هيج وبصوتي الخشن خرعته للولد بس شفته الحمد لله بعده باقي ما راح
بعده صافن ببوجهي يمكن انصدم لو تفاجأ !
تنحنحت ..
اخذت نفس قوي وتشجعت اتكلم ..
كتله أسفه سلطان" اني ناديه" واشكرك على اهتمامك وعلى الملازم والاسئله
محجيت وياك لأن خجلت من صوتي مبحوح وماعندي تجربه سابقه مع الشباب
انتبهت الولد عينه على حلكي وبس خلصت كلام ابتسم اكثر
توتر ماادري شنو بباله
كلي بعد التلعثم والتلكؤ
لا .. لا ماكو داعي تشكريني ناديه" اسمج كلش حلو وانتي بعد أحلى
واني بصراحة معجب بيج هواي وميهمني .....
صصوتج ...
اقصد ممكن .... اني .... أحب نتواصل وانتي براحتج بعد
اقترب مني وهمس
ممكن نلتقي بمكان خاص
شميت ريحته تجنن
رجعت خطوة لورة خفت مدري توترت وهزيت برأسي أي ..
اشرتله أخابرك
غمزلي واشرلي على ورقه وقلم
فتحت جنطتي وكتبت رقمه وكانت نظراته بلهفه زايده أكثر من قبل
حبيت كلشي بي واللي شدّني اله أكثر أنة ما اهتم لخشونه صوتي ولا استهزء بيه مثل ضمياء وانما بقيت بنظرة أنثى جميلة وحلوة
والاحلى طلب مني يلتقي وياي بمكان لوحدنه
تركته ورجعت للبيت وانتظرت وقت مناسب اكدر اخابره حفظت الرقم
نور الدين كالعاده ياخذها لضيّ ويطلعون يتنزهون وشيرين تنام من وقت بليل
خابرته تأخر يالله رد استغربت
سلمت عرفني وبقينه تقريباََ اكثر من ساعه نتعرف ونسولف وعرفت عنه كلشي
وحيد لأهله وحالتهم الماديه زينه ميسورة
لأن والده طبيب بالمستشفى ووالدته دكتوره بالجامعه وعمه مسؤول كبير بالمحافظة
وهو يطمح يدخل كلية الطب ويكمل مسيرتهم
وو ... وماعنده صديقات بس ماصدكته
وحجيتله مختصر قليل من حياتي
اتفقنه نتلاكه باجر بمكان ويعزمني رفضت لأن شيرين شلون اعوفها توسللي ماقنعت وعدته بعد الامتحانات ادبرها
مرت الايام والتهيت عن ضيّ وتجاهلتها لأن مااعرف شلون افضحها واشوف علاقتها بنور كلش طبيعه بالعكس اشوفهم منسجمين وعشاق ماكو مثلهم وبمجرد ما يروح نور للدوام ترجع لسوالفها وتطلع بأي وقت براحتها وتخابر ومتهتم لوجودنه اني وشيرين ..
..
بقيت اشوفه لسلطان كل يوم من بعيد يوكفلي يم شارعنه لو مرات يم المدرسة وبيننا سلام ونظرات ومرات يصافحني ويلزم ايدي برقه وكلامه كلش حلو ورقيق وبالبيت اخابره كل يوم
يظل يتشاقه وياي ويكلي شلونك ابو ندى بمزح ما ازعل منه بالعكس أحس نفسي كنت تايهه قبله ومن تعرفت عليه لگيت نصي الثاني عنده
أكثر شي يفهمني ويواسيني ويخفف عني
والاكثر يشجعني للدراسه
مرات يحرجني يكلي شلابسه لو شدا تسوين أتهرب من الجواب واغير الموضوع يبقى يشتم ويكلي عبالي هسه دا احجي ويه صاحبي وتاليها وياج !
مااعرف احجي سوالف المياعه والدلع ومن يضوج ويزعل اعوفه وحده يرضى ميكدر يطوّل بالزعل بس يبين عليه من يزعل يظل يتحسر ويتنهد وينخطف لونه وبعدها يتراضى وحده ...
وبقينه على الحال ....
استفاديت هواي من الاسئله والملازم وكنت دائماََ اشكره حتى ركزت بيهم لأن من عنده وبيهم أحلى ذكريات منه ..
لحد ماخلصت الامتحانات وكانت جداََ صعبه بسبب الحر والجهد والسهر وخوفي من الأسئلة وتفكيري مشوش بسوالف سلطان اللي مجنني وخلاني عشقته وولهانه بحبه وغرامه اصلاََ ما اكدر انام بسببه اتذكر كل تفاصيل لقاءاتنا لحظه بلحظه واسمع أغاني واغمض
اتخيل نفسي وياه لو من أسمع اغنيه (جورج وسوف '''الهوى سلطان على القلوب الهوى سلطان ''')
ياويلي صدگ سلطان بكل شئ وملكني وحبيته حب صادق وبريئ بس كنت خايفه من العواقب ومن نتيجة هالعلاقة وخاصة اني اعرف نفسي من أحب ماعندي حظ وماتنصفني الدنيا وتمشي وياي عكس ..واخسر اللي احبه لاسامح الله لعنة الشيطان وبديت اهتم بشكلي وبشعري والبس تراجي من شيرين وخليت گذله نزلتها على وجهي حتى اكون ملفته للنظر واعجبه لسلطان"
...
ورة ما خلصت الإمتحانات صعدت لغرفة نور الدين وطلبت منه احجي وياه
بموضوع وأكيد ضيّ متخليني انفرد بي بقت حاضنته لنور وتسوي حركات حتى تبقى وتسمع كلامي وياه
كتله نور حبيبي أريد أخذ شيرين ونطلع تضوج
لأن عطله وشيرين خطيه ما طلعت انتظرتني علما أكمل إمتحانات
واني وعدتها ..
كلي اخاف عليج متتطلعين وحدج ماممكن ومستحيل
اني اخذكم وقت ما افرغ
كان يعاين على ضيّ من يتكلم معاي
ضجت ماكدرت ارد
كتله ماشي حبيبي اني انتظرك ونزلت من غرفته كلش ضايجه
شلون هسه التقي بسلطان وعدته نطلع سوة وشيرين خطية وعدتها
هسة هاي ضمياء مو دا تطلع وتواعد ليش اني هيج مااكدر اتحرك الا بأذن وطلب ..
بقيت متردده اخابره لسلطان خفت يسمعني نور لو ضيّ واني كتله لاتخابر انته الا اني أخابرك
من راح نور للدوام رحت لضيّ كتلها ليش مخليتي نور يأخذنه ونطلع !
ضحكت وهزت بيدها
وإني شنو من يجي اخوج عاتبي
كنت واكفه اجت يمي دفعتني وراحت لفوگ ..
.. مجبورة اتحمل ومااعرف شلون اخلص منها لو شلون اتعامل وياهه ..
مرت الايام وبقيت ميته قهر لاطّلعنّا نور ولا اني اللي خابرت سلطان ولا گدرت اطلع وحدي
قضيناها تلفزيون وبالحديقه ومرات بالسطح نصعد العصريات ننرش السطح ونلعب اضطر ألعب ويه شيرين بكل الألعاب حتى لاتضوج وتحس بفراغ
لحد بيوم العصر يمكن بعد اسبوع من نهايه الامتحانات
اجت ضمياء للسطح تركض وتنافت
ولج ناديه وينج !
يعني ويني مدا تشوفين بعينج مگضيتها ألعب ويه شيرين لاطلعه ولاونسه
شاورتني بهمس امشي وياي معليج بضيّ
شنو وين !!
امشي بدلي ملابسج وامشي
نزلت بدلت ملابسي وملابس شيرين وضيّ تعاين صفح علينه كالت باستهزاء مو تتأخرن
طلعنا وضمياء عاصرة أيدي وتجرّ بيه مستعجلة
سيارة واكفه براس الشارع صعدنه واني كلش خايفه
انتبهت السايق سعد !
كعدت يمه ضمياء واني وشيرين ورة
بقت تغمزلي وحضنت سعد من متنه وفرحانه
خفت من تصرفها الجريئ هذا
وين ح تأخذني هذي؟!
تندمت لأن اخذت شيرين وياي
مشت السياره مسافه وكفت ونزلوا منها ضمياء وسعد ...
...يتبع..
#قصه_ناديه@ 5
