#لأني_أحببت/ 11
#قصة_حب
. ... ناديه@
...
بليل طلعنا كلنه نور ماعنده سيارة اجرنا تكسي ورحنه مطعم سياحي يجنن بابا كان يجيبنه من كننا صغار
نور أشترانه آيس كريم "متشكلة بالشعرية والشيرة الحمرة وبعدها أخذ شيرين يم الشلال بقينا اني وضيّ كل شويه تنطيني تعليمات
وشلون أتصرف من يجون الخطابه وكلام سخيف ومصيرج تتزوجين وتصيرين عروس وتكونين عائلة وووو ..
أني بالي مو يمها أصلا عيني على المناظر والجو شكد حلو
كل مكان بي ذكريات من الماضي وذكريات بابا
تعشينه كملنه وورة العشه رحنا لمدينة الألعاب
اوووف يربي شكد بيها ذكريات حلوة من آخر مرة رحت والتقيت بحبيبي سلطان"
وحصرني بدولاب الهوة وباسني وحضنني وخلاني عشقته وتعلقت بي غمضت عيوني
يالله ..
تمنيت أشوفه بعد مرة
نور كان مشغول ويه شيرين وضيّ
واني اتمشى وراهم لمحت من بعيد الولد اللي كان ويه سلطان من صعد ويانه بدولاب الهوة ماادري شصار بيه خفت مااعرف گلت خاف يفضحني لو يجي يحاجيني نور صعّد شيرين بالسيارات المتحركة وصعد ويه ضيّ اني أتسحبت ورحت جهة الولد كان واكف يم محلات العصاير والمثلجات وكفت بصفه وسويت نفسي أريد اشتري سلمت عليه عرفني أبتسم ..
كتله بهمس اني صديقه سلطان
كال أعرف اهلاََ وسهلاََ ياهلا
فدوة اني ويه اهلي هسة ماريد مشاكل
هز برأسه أي بس ..
شنو بس ؟
سلطان هنا .. يعني يدري بيج أنتي هنا ؟
لزمت قلبي حـ يوگف
درت وجهي كتله بهمس الله يخليك لاتگله
گلي ماشي ماشي لاتخافين شبيج اهدأي
عفته ورجعت لمكاني ركض وأملخ بخدودي يربي شجابه سلطان هنا !
على أساس ماعنده صاحبات وعايش على حبي وحدي ويا منو جاي لـهنا !
وإذا شافني هيج شكلي مخليه مكياج ومبدله
كنت لابسه ثوب ربع ردن سماءي وبي ورد ملون ومخليه كحل ومكياج خفيف وشعري حالته على متني ومنزله الگذله يعني مغيره بشكلي عن قبل وصايره مختلفه عن آخر مرة شافني ....
بقيت أرجف من راسي لرجلية
رجعت لكيتهم بعدهم نور اشرلي اصعد
ابتسمت وكتله لا لا ماريد
تظاهرت بالتعب والنعاس حتى نرجع
خفت كلش لايشوفني سلطان
شيرين كالت ماااا .. الا اريد أصعد كل الألعاب وتتوسل بنور
ضيّ كالت أني اروح للمغاسل كتلهم راح انتظرتكم بالحديقه
رحت وگلبي ينبض يمكن ألف نبضة بالثانية من القلق
كعدت بكراسي اكو رفعت راسي شفت سلطان من بعيد !
يربي دنكت وسويت نفسي دا أعدل حذاءي
اجت ضيّ تنافت كالت تعبت بعد ما اكدر خلي نور يرجعنه وينه
هاا ... ماادري
هاي شبيج لونج مخطوف !
هااا مدريني ممااادري معدتي توجعني
هاا يالا لعد اروح اصيحه لنور
عافتني وراحت كمت وراهه اعتقد سلطان شافني !
مشيت سريع وصلت يمها أمشي
بقه يراقبني من بعيد
كلت هالمجنون اكيد حـ يجي بصفي ويسوي كارثه
نور وشيرين أجوي وطلعنه سوة وحاولت بگد ما اگدر ما اباوع لجهة سلطان
اجرنا تكسي وصعدنه من سديت باب السياره آمنت ..
يربي دخيلك الحمد والشكر الك إلهي ادري بسلطان عاشقني ويحبني بس أعرفه جريئ ومجنون الله ستر جان سوالي مشكله هسة وفضحني
لزمت صدري وفتحت الجامه
بقيت أتنفس حيل وصورته لسلطان حبيبي ببالي كان لابس قميص ازرگ فاتح وبنطرون كابوي يجنن شكله وملامحة وطوله يـربي شكد مشتاقتله ..
تجيت على الكشن وبقيت سارحه وأفكر بي مانتبهت لـكلام شيرين وضيّ ونور اللي كانوا فرحانين ومتونسين من النزهة وطول الطريق يتناقشون ويتمازحون بينهم
من وصلنه تعبنه كلش نور كلي شلونها النزهة هَـالليله !
هاا .. ايي .. حلوة نور حبيبي اشكرك أهم شي شيرين تونست باسني وصعد لغرفته بقيت صاحيه وافكر بسلطان مكدرت انام مثل كل ليله مرت عليه بفراگه
الصبح عرفت من ضيّ الخطابه اليوم العصر يجون وطلبت مني اسبح وابدل واخلي مكياج كنت خايفه
دعيت ربي يصير شئ اللي يغير سالفه الزواج هذا ماريد اتزوج وماريد احد غير سلطان حبيبي
اتمنى هو يجي يخطبني الليلة
ياربي .....
...حسرات هواي تحسرت
واحس الدنيا ضاقت عليه
شيرين مكانت فرحانه ابد كل شويه تكلي راح تعوفيني ناديه وتريد تبجي
أتمنى لو بيدي ماعوف بيت بابا وماعوفها لشيرين نهائيا
فكرت أهرب من البيت بس خفت من يكول سلطان يتحملني ويطلع وفيّ
ويجوز ضيّ تسويلي فضيحه ..
للعصر نور جاب صندوگ عصير وكيك وضيّ علمتني بس يكعدون ورة عشر دقايق أروح للمطبخ أجيب العصير وأقدمه الهم واحد واحد أبدي بالناس الكبار
كنت متوترة وخايفه وضيّ تخابر كل شويه وتبسبس وتضحك
نور لبس قاط أسود وطلع يجنن كأنما هو العريس وشيرين بقت بالغرفة ماقبلت تطلع منها
اني كملت لبس نفنوف شيفون اصفر قصير جابته ضيّ وطوگ اصفر وفتحت شعري واني طويله و جسمي مخصر تغير شكلي وطلعت مختلفه عن قبل شكد تمنيت يشوفني سلطان بهـاللبس والاناقه والستايل الجديد يمكن جان بعد مايسميني أبو ندى
الله" شكد مشتاقه لسوالفه وشقاه وزعله لو حضنه وانفاسه ياويلي على حبه وغرامه ...
اندكت الباب نور فتحها واستقبلهم اثنين نسوان ورجال كبير بالعمر وولد شاب شكله مقبول لابس قميص رصاصي فاتح وبنطرون اسود دخلوا اني بالمطبخ كنت بس شفتهم كلهم وركزت بشكل الولد انتظرت يكعدون واروح اقدم العصير
مكدرت اطلع بقيت بمكاني وادعو ربي يصير أي شي ويطلعون وما اعجبهم
ربع ساعة واجت ضيّ تتدفع بيه
جريت ايدها كتلها ابوس ايدج ماريد اتزوج دبريها الله يوفقج
خزرتني وبقت تعضّ بشفافها وتكلي سود الله وجهج مو وكتج العالم هنا لاتفشلينه وتحرجينه والله اخلي نور يذبحج اذا ماطلعتي ..
سلمت امري لله واخذت نفس وشلت الصينية وطلعت للصاله ...
...يتبع ...
#قصه_ناديه@11
