#لأني_أحببت /32 والأخير
القسم الأخير من قصة_حب ناديه@
...
.....
بيك روحي تعيش يا اغلى حــــــبيب💗
والمحبه وياك مفروضة فـــــــــرض*
وحبك بگلبي مرض جداً خطيـــــــر💗
يادوة اليشفيني من هذا المـــرض*
فيلم صوت سوالفك كل ساعة يعيد💗
وصار ويه البال تلقائي العـــــــرض*
شلون عنك ابتعد وانته سمـــــاي 💗
ووين امشي وانته بكل خطوه ارض*
ما يهمني غير نظراتك عيـــــــــون 💗
وغيرك من الناس ما عندي غـــرض*
آااهآااات ..💘💘
يلحبك مفروض عليه من الله فـــرض 💗
***
آخر حدث حصل بحياتي بـالماضي التعيس ..
تحضرت دا أطلع من المستشفى بعد ما تحسنت حالتي بعد العملية بأيام والطبيب طمنني وتعافيت الحمد لله
وخلصت فترة المعاينة والنقاهة والتحاليل أثبتت نجاح العملية 100%
نور الدين راح يكمل إجراءات الخروج ويحاسب المستشفى وهـالروتين
استغليت الفرصة طلبت من الممرضة تأخذني لغرفة اللي تبرعلي بـالكلى
واللي هو ... 👇
"سلطاني" حبيبي"
رتبت نفسي بسرعة ورحت للطابق اللي بي جناح خاص للأطباء فوگ بالمستشفى
دخلت كوه مشيت من الشوگ والخوف لايكون بي شي ومحد خبرني
كان نايم مثل الملاك ..
صدره عريان ومغطي باقي جسمه بشرشف ابيض والاجهزة الصوندات والمغذي بعدهي مشكلة بي
كعدت يمه ماحس بيه .. اقتربت ... أخذت نفس وتجرأت المس شفايفه بأصبعي
اقتربت أكثر وبديت اشم بـلحيته وشواربه ..
يالله ....
شكثر طيبه ريحت انفاسه
وشكثر مشتاقتله ..
شويه وحس بيه ابتسم ..
وخرت عنه وفرحت كلش
گلبي بده يرف يرف ...
سلطان" ...
حمد لله على السلامه حبيبي
ناديه !
شلونها صحتج هسه !
اني بخير حبيبي أهم شي انته هسه شلونك !
هز برأسه وبلع ريگه
دمعت عيوني .. سودة عليه سلطان ليش هيج سويت ..؟
لزمت زنده ورجعت اقتربت منه
ناديه تتدني فدوه لايدخل أحد ويشوفج هيج
سلطان خليهم يشوفوني انته ضحيت وخاطرت لأجلي خلي الناس كلها تعرف منو إنته ومنو أني بالنسبة الك حبيبي
_ناديه كعديني شوي
حضنته وتجيته كنت قريبه منه لدرجه عيوننه بقت تتعاتب وتمنيت ابوسه
يالله ... شكد مشتاقتله
_ ناديه تدرين بعد ماخابرتني زوجة اخوج كنت متوجه للمطار حجتلي الـصار وياج أنجنيت عفت الرحلة ورجعت وبدون تفكير أجيت للمستشفى
ملحگت اشوفج
حجيت ويه دكتورج واتفقت وياه اني اللي اتبرعلج بالكلى
رحت بسرعة سويت فحوصات شاملة حتى تطلع النتائج متشابهه وياج و اتصلت بأستاذي اللي هو أكبر جراح بإيران يسوي عمليات كبيره بكل الدول إجه بسرعة مخصوص لخاطري وياه مساعدينة بطيارتهم خاصة لهنا
وهو اللي سوة العملية وحجزلي هذا الجناح الخاص ورجع لطهران وهنا كلهم اعتنوا بيه بشكل خاص
بس لازم بعد كم يوم يجي يرجع يكشف عليه وارجع وياه لطهران
تحسر ... آه ..
سلامتك من الـ آه حبيبي
غمض عيونه ..ناديه
أني عانيت معاناة بفراگج
كل خوفي جان انج تزوجتي ونسيتيني
قتلوا والدي وعمي ومانعرف وين خذوا جثثهم حتى قبور ماعدهم وأني جنت أعيش ويه عائلتي رعب وخوف وقلق بسبب تهديدات الحزب بذاك الوقت وماگدرت احجيلج خفت عليج
سودة عليه سلطان من هذا طلبت مني نتزوج بالسر !!
ناديه تمنيت نتزوج ونطلع للخارج سويه
بس ...
اني آسفة سلطان .. آسفه حبيبي ياريت بلغتني وحجيتلي بوقتها
ناديه مگدرت .. وتدرين تحملت مسؤولية والدتي واخواتي وبنات عمي وحدي
كلش انقهرت من كلامك أسفة سلطان سامحني
انتي مالج ذنب ناديه بس اني رجعت وعلمودج ومستعد اتحمل كلشي لخاطرج
..
بقت عيونه على شفافي ورتبك ورجع لوره
..
كافي ناديه روحي هسه لاتصير مشكله ويشوفوج هنا يمي ماريد تجيج أذيه من وراي
سلطان حبيبي ..
راح أروح بس اسمعني ارجوك ..
اكو شئ لازم تعرفه ..
أخذت نفس وبدة جسمي كله يرجف ..
ياربي ليش هيج الكلام وياك صعب ؟
بقه يعاين بعيوني بحزن ..
سلطان ..
بعد ماانت رحت انتظرتك خمس سنوات ماارتبطت بأي أحد تتدمرت وتعذبت
صدمة صارت بيه
تركت الدراسه واشتغلت اخيط واطرز اتسلى حتى انساك احاول انساك سلطان
واعتمدت على نفسي لحد ما انجبرت اتزوج من واحد أسمه إياد
رفع رأسه وكال شنووو !!
خليت ايدي على شفايفه ..
خليني اكمل كلامي فدوه اروحلك ..
زواجي منه كان بس ساعات وهربت منه لأنه مريض نفسي وتتطلكت بالمحكمة بعد شهر معاناة وقضية ومحامي وكانت صدمة قوية الي وكرهت كل رجال بالدنيا ومارتبطت بأحد
بعد كم سنه رحت سفرة للحبانية والتقيت بـراغب
شاب مثالي وطالع من تجربه طلاق وارتبطت بي جانت صداقة وبعدين خطوبة
شفته دنگ وضاج ..
سلطان ..
راغب خطيبي مو زوجي
..
علاقتي براغب علاقه عاديه ماصار شي بيننا كان صديق أكثر من ما كان حبيب وانهيت علاقتي بي قبل العملية بدقايق تعرف ليش ؟؟
لان ماكو بگلبي مكان لـلحب
انته أخذت گلبي وروحي وياك من رحت ومن رجعت رجعتلي روحي وكلشي رجع من ذكريات وغرام وحب
و رجعتني لحبك وعشقك ومستحيل أصير لغيرك ..
هذي شفايفي ماباست غير شفايفك
حبيبي ...
صدگني من عرفت انك رجعت نسيت كلشي وركضت لحضنك
بس تمنيت تكون عندي صحة مو مريضه وماعندي فشل كلوي وكنت يائسة من الحياة بوقت اللي اجيتك لذلك ماحجيتلك عن التفاصيل
كان صدگني أني اللي اطلب منك نتزوج بالسر هالمرة
أبتسم وعيونه لمعت وردتله روحه من سمع كلامي ورجع اقترب مني راد يكول شي بس دخل نور الدين
كلي ناديه !
شتسوين هنا ؟
كنت كاعده بالسرير بصف سلطان كمت طفرت ووگفت
أجه حضنني وباسني اني هم حضنته
بقى يحجي ويه سلطان" ..
حمد لله على السلامه دكتور سلطان" لوتدري شلون فرحان وفخور بيك لأن كنت السبب بنجاة اختي الغاليه ناديه اني مديونلك بحياتي
سلطان كال ..
أخ نور الدين اذا هيج لازم توفي الدين بأسرع وقت
عندي بس طلب واحد منك
نور كله انته تأمر تفضل اطلب وأتمنى
أريد اتزوج ناديه" ..
نور صفن ببوجهي مستغرب أشرلي بحواجبه شنو !!
اني لزمت صدري وفرحت
گلبي راح يطلع من حلگي من الخبر هزيت برأسي وصحت بصوت عالي ايي أني موافقة
بقوا يضحكون عليه
وبهالاثناء هاي دخلت شيرين وضيّ سمعن الكلام وظلن يهلهلن وفرحن
..
واخيراََ تحققت أمنيتي ياربي وتزوجت حبيبي عشگ صباي وغرامي وريحة الحب الأول ..
#لأني_أحببت 💘
...
...أني "ناديه" سلام .... عراقيه مواليد
1976 ديالى /العراق
كنت ساكنه السليمانية وحالياََ مقيمة بـطهران /إيران
متزوجة من طبيب جراح باطنية صدرية
"سلطان عبد الرحيم"
حب حياتي وعشگ سنين الدراسة وصار عندي منه ثلاث اولاد ذكور يشبهونه بالضبط وحامل بـبنوته بالشهر السابع
شيرين اختي الحبيبه وقطعه من روحي كملت دراسه الطب بجامعة طهران واستقرت معاي بنفس البيت
وحاليا مخطوبه من دكتور عراقي كان زميلها بالجامعة اللي هو (صلاح ")
وحالياً مقيمين ويانه بطهران
أما نور الدين" وضيّ" اتصل بيهم كل يوم بالإنترنت وبالمناسبات نروح نزورهم
زين" وياسمين" كبروا وصاروا بالثانويه
وحاليا نزورهم ويزورونه بعد انفتاح العراق الدائم للسفر ...
أما راغب" عرفت بعدين أنه سافر لتركيا بعقد عمل ويه الشركة اللي يشتغل بيها بعد وفاه والدته ووالده الله يرحمهم
واستقر هناك وماعاد رجع للعراق
حبيبي سلطان" أجمل واطيب زوج وعوضني عن كل اللي فقدته بحياتي بالماضي وسنين غيابه
قصة حبنا بدت سنه تقريبا
من كان عمري 14 سنه بالثالث متوسط
تعرفت عليه مقابل مدرستي وهو كان سابقني بسنه واحده عمره 15 سنه ....
فرقتنه الضروف وبقينه على الوعد والعهد وجمعتنه المشاعر الصادقه والحب المقدس
حاليا اثمرت العلاقه لأن حبنه صادق وقوي وسلطان كان وفيّ وياي تركني غصب عنه بسبب ظروف العراق ورجعليّ بعد اكثر من 12 سنه وملكني بحبه وتضحياته وعطاءه علمودي
واستمر زواجنا
وحبنا كل يوم يتجدد ...
💗لأني_أحببت 💗
النهايه /
الأحداث من الواقع مع لمسات من قلمي وخيالي ..
شكرا جزيلا لكل من تابع القصه وعاش الاحداث بحلوها ومرها .. وتعلق بالابطال والشخصيات
تمت كتابة الرواية في شهر أغسطس /آب ٢٠١٧ ميلادية
..
حقوق النشر للكاتبة بعد النقل والنسخ غير مرخص حذف أسم الكاتبه
انتظروني بقصه جديدة #ملكه_العاشقة ✍️
😘😘
