#لأني_أحببت /17
#قصة_حب
... ناديه@
....
***
تعال لخاطر الله وخليني ارتاح*
من زمان ما شافتك" عيني*
ولك هم تشتاقلي بالغربه مرات*
لو ناسي الذي بينك وبيني*
لو تدري الدمع ما فارگ العين ولا گلبي بغيابك ملّ ونيني*
مشتاگ إني إلك ... وداعتك مشتاگ إني إلك *
ولك گلبي محتام هاي الأرض ما توسع حنيني *
يا همي وعذابي وحرگت الروح *
گضيت ويه الحزن أجمل سنيني *
هم عود إني أشوفك بعد وأگعد وياك ؟*
وكـ أبوس تراب جدمك لو بس تجيني*
***
...
أسوأ ايام حياتي مرت عليه بعد فراگ سلطان" ..
عايشه بقلق وتوتر وخوف وألم الذكريات الحلوة
ضيّ ولدت بالمستشفى ونور أخذ اجازة من الدوام والفرحه كانت ما واسعة الكل وشيرين هم فرحانه بالولد الجديد سماه نور ... (زين)"
ضيّ بقت ببيت اهلها بعد الولاده فترة
واضطريت اروح اساعدها واخذلها مسواگ واغراض اني ونور وشيرين
بداخلي غصة وحيرة وقلق وماحاسه بأي فرحة
رغم ما المفروض افرح لفرحة نور وكوني صرت عمة والطفل زين دبدوب وابيض يجنن
ضمياء كانت نظراتها حزينه وتتهرب مني
حسيت بيها تعرف شي استغليت انشغال نور وشيرين ببيتهم واخذتها لبيتنه بحجه ابدل ملابسي
وصلنه لبيتنه دخلتها كوه ماقبلت تدخل وحصرتها هناك وجبرتها تعترف وتحجي
ضمياء احجيلي أي شي دخليج كلشي تعرفي عن سلطان"
ارتبكت وتوترت
ناديه شبيج ماكو شي بدلي بسرعة حتى نرجع
ضمياء فدوة اني صديقتج وبيننا سنين عشرة عمر وزاد وملح وسالفة وضحكة وتقريبا إحنا أهل ولاتنسين انتي السبب .. انتي اللي عرفتيني بي ..
ششنو !
اني شكوو !
اني كتلج عشگي ؟
وبعدين من شوكت انتي عشگتي لسلطان !
ضمياء لاتعاتبيني ولاتلوميني مو بيدي صار كلشي بسرعة بدون تخطيط
لا إرادياََ
لج ضمياء دا موت بكل ليلة الف موتة ...
ارحميني
شفتها تحسرت ونقهرت عليه وكعدت بالصالة
كعدت يمها
انطيني رقم سعد هسه اخابره وافتهم منه
ماشي ناديه اني حـ دگ الرقم وانتي حاجي يفهمج احسن مني
حسيت بيها تعرف شي بس متقبل تگول
اتصلت بي وحجيت وياه كتله سعد أني ناديه واريد اعرف وين سلطان !
حجالي عنه وياريت ماحجالي
ياريتني بقيت غافلة ومحتارة وماعرفت الحقيقة
ضمياء كانت مقهورة عليه وهدأتني
لزمتني الرجفة بعظامي
مااكدر أبجي ولا اصرخ ولا أتحرك من مكاني
ضمياء كالت ناديه إذا رجع نور وشافج هيج شلون شيگول اكيد يشك بيج
كومي هسة غسلي وجهج وأهدي
لطمت على وجهي
صرخت بضمياء بلا وعيّ
انتي تدرين ؟
ارتبكت وتلعثمت بالكلام
بقيت الطم واملخ بنفسي
وضمياء لازمة ايديه وكلما تحضنني ادفعها واصرخ
بقيت اهمس سلطان حبيبي
سلطان حبيبي وينك ...
واغمى عليه ما ادري شصار بيه ماحسيت غير ضمياء ترش ميّ ببوجهي وتكلي عزة العزاج ناديه كومي لاتسوين هيج بروحج تخبلتي يمعوده شمسوي بيج سلطان وهيج تسوين لج حجيلي شعدج وياه وشصار بينكم؟!
سحلتني گوة ودتني لغرفتي وراحت خابرت اهلها كالت الهم احنا باقين هنا نرتاح للعصر ونجيكم
رجعت جابتلي مي
بعدني ارجف
لزمت ايدها .. لج ضمياء گليلي فدوة سلطان ميت
لو عدل ؟
اذا ميت وديني لقبرة اتمرغل بترابة وأودعه
واذا عدل اروح ادور عليه !
ولج ناديه الحكومه سفرّتهم وين تتدورين عليه لاتصيرين مجنونه وتتدمرين حياتج وحياة اهلج وانوب انتوا هم تبتلون وتجيكم تايهه و تتسفرون
انسيه وعيشي حياتج انسي ناديه
ولج ضمياء مااكدر انساه شلون أنساه رجعت املخ بنفسي واصرخ
ضمياء خلت مخده على وجهي ولج اسكتي ناديه فضحتينه
خنكت نفسي بالمخده وصرخت وصرخت وصرخت لحد ما بعد مااكدر اتنفس
ضمياء بقت تبجي وحضنتني
ناديه شوفيني كدامج لعبت لعب ويه سعد
لمجرد ما عرفته يخونني عفته وماشتري بفلس هسه وبس اتعرف على غيرة لو تجيني قسمه زواج اعيش حياتي
ضمياء ياريته خانني
ياريت كشفت خيانته ولا مصيره المجهول هذا
شلون تسّفر ؟
واهله وين ؟!
ناديه كل اللي سمعته أن والده وعمه انقتلوا لأسباب مجهولة واهله كلم تسفروا لإيران بحجة انهم حزب معارض للبعث
سلطان عمره 16 سنه لو كان بالغ كان يمكن انقتل وياهم
سديت حلگها .. اششش ... لاتگوليها اسكتي حبابة ..
اسكتي ... كافي ماريد اسمع ولا اعرف اي شي روحي طلعي وعوفيني وحدي ..
روحي رجعي كليلهم ناديه تعبانه ونامت
ناديه ما اعوفج انتي بحالة هستيرية لا تروحين تنتحرين لو تسوين شي بنفسج مو بوعيج هسة
لاتخافين عليه ضمياء ..
مااسوي شي بروحي
تلفلفت بشرشف وحضنت المخده وغمضت عيوني اريد ارتاح
راسي حـ ينفجر ..
ماريد أفكر بأي شي ..
ماادري شصار بعدين من التشويش اللي ببالي ..
مرت الايام ..
نور مشغول بالطفل وبضيّ
بس شيرين خطيه حست بيه شي
مااكدر اكوم من السرير
صخنت وبطني توجعني جوعانه وماكلت شي
لليل رجع نور شافني كومني جسمي راخي مابيه اتحرك مااكدر
شالني وصعدني بتكسي وشيرين بقت تبجي كلها روحي لبيت اهل ضيّ لاتطلعين إلا نرجع
دخلوني بالطوارئ ومااعرف شصار ماحاسه بأي شيء
بس اشوف الدنيا بيضه
واصوات هوايه ممفهومة
بقيت كم يوم بالمستشفى على أساس عندي حصوة بالكلى ومرض( تايفوئيد)
صار بيه لأن حرارتي كلش مرتفعه مانزلت حتى بالأبر والحقن
شدولي مغذي وكانونه وعلاج وتحاليل وناظور
...
طلعت من المستشفى بعد فترة بقيت بسريري ماتحركت بس دموعي تجري وحدها
شيرين كاسرة خاطري وماعندي احد غيرها ولا تسوة ادمر نفسي وصحتي علمود حب اختفى وصار مصيرة مجهول ...!
احاول اكون قويه علمودها هيه وبس ...
...يتبع ...
#قصه_ناديه@17
