#لأني_أحببت/ 18
#قصة_حب
... ناديه@
...
كل هالأحداث الـذكرتها صارت بدايه التسعينات وره ما صارت الحرب والانتفاضة بالجنوب ...
عائلة سلطان وحدة من آلاف العوائل اللي تهجرت وتسّفرت بحجة التبعية والمعارضة واللي انقتل واللي مصيرة مجهول واللي بالسجون وكان محد يتجرأ يدور لو يسأل عنهم لأسباب سياسية وحزبية
...
حياتي فارغه صارت وماعندي رغبه بكلشي
تركت دراستي بعد ماداومت انگطع واهسي من المدرسة
وبقيت بالبيت من المطبخ للغرفه
تسليت ويه شيرين" وزين"
اللي ملى البيت بصراخه وصار قطعة مني مثل ما شيرين ربت على أيدي زين همين ربى بحضني ومينام بس عندي
حتى ضيّ حسنت اسلوبها وياي علمود اهتم بزين واتفرغله
وبدت تقضي شغل البيت بدالي وتخلي عندي لأن يبجي عدها مايرتاح بحضنها يتعبها كلش
وميسكت الا يشوف نور يهدأ ..
مرت السنين واني حبيسه جدران البيت وماريد أطلع لأي مكان
كلشي يذكرني بسلطان"
كل مكان كل شارع وخاصه رأس الشارع اللي جنت أشوفه هناك وبيننا همسات وغمزات ولمسات ..
مدرستي والمطعم والمنتجع ومدينه الألعاب والحديقة الكبيرة والشلال حتى التلفزيون والاغاني تركتها وماعدت اسمع أي أغنيه
لأنها تذكرني بسلطان"
التليفون من يدگ أنزّ وافزّ
يتخيلي يطلع سلطان" على الخط ويگلي حبيبتي ناديه اني هنا تعالي مشتاقلج ..!
بقيت اتابع شيرين ودراستها وكانت شاطرة وذكية وعلاماتها عالية
فرحتي بنجاحها أكبر من فرحتي بنجاحي
زين كبر وضيّ حملت بعد مرة وكانت تتدلل وتتميع وتتعزز على نور اللي متخبل عليها أضعاف بعد ماصارت أم لأطفالة
نور" كان ضايج مني لأن تركت دراستي لكن اني كتله ماريد اكمل ماعندي رغبه واريد ابقى بالبيت أداري ابنك واهتم بي هو وشيرين
احترم رغبتي وماكان مخليني محتاجه شي حتى تقاعد بابا كان يستلمه هو وينطي اللي يكلي ضمي وبديت اجمع فلوس بدولابي
بخلال هالفترة تزوجت ضمياء رحت لعرسها زوجها ببغداد ساكن وكانت فرحانه بشكل
ولا كأنما هاي ضمياء اللي كانت عاشقة سعد وتلعب لعب بحضنة !
اني مااكدر اسوي مثلها سلطان" حبيبي وملكني بحبه وكنت مخلصة إله
ان كان عايش ولا ميت محد يلمسني ويبوسني ولا يحلالي حضن غيرة
بعدها استمرت حياتي بكل برود ايام واسابيع وشهور كبرت وماعدت اهتم بنفسي ولا الي واهس بشي
اجوي لبيتنا خطابه اكثر من مرة وخطبوني وكان رفضي رفض قاطع بدون نقاش ولاتفكير
حتى نور عرض عليه الفكره من كم شخص اجوي وخطبوني منه وهم رفضت
مرت السنين وشيرين صارت بالاول متوسط وعمري صار 21 سنه
ونور وضيّ صار عدهم زين" اربع سنوات وياسمين" سنتين
بديت اخاف على شيرين لأن بلغت وصارت حلوة وطلبت من نور يخليني اطلع كل يوم اوصلها للمتوسطة اللي هيه مدرستي القديمه قريبه علينه مسافه
من طلعت شفت الشارع والأماكن تجدد حزني
كلشي ذكرني بسلطان" ..
غصة ببلعومي موتتني
كأنما كلشي صار البارحة
بعد 6 سنوات من الفراق واللوعة والحرمان والذكريات وحبه وغرامه بعده حار ومشتعل بداخلي
بحيث لحد الآن گلبي ينغزني ويوجعني عليه
وصلت شيرين لباب المدرسه ورجعت لنفس المكان اللي كان سلطان ينتظرني من صدمته هنا وبقى يحجي وياي وانطاني الملازم والاسئلة كعدت بالكاع بعد رجليّه متشيلني
بقيت العب بالتراب واتخيل طوله وجسمه اخذت نفس قوي تعبت
اريد انسى ..
اذا ابقى هيج اموت ..
كل يوم اوكف كبال المرايه واشوف شكلي شلون كبرت وذبلت ياترى سلطان هسه اذا عايش شلون شكله صاير؟!
تعرف على وحدة غيري !
..
بمرور الأيام انفتحت دورات للخياطه والتطريز بنفس مدرسه شيرين عكس الدوام استأذنت من نور اسجل بيها واتسلى اقضي وقت الفراغ من ترجع شيرين للبيت ارجع ادوام بيها كم ساعة
اشتريت قماش ولوازم بسيطه بالبداية بعدين كنت مجمعه فلوس من تقاعد بابا واللي ينطيني نور واشتريت مكينه خياطه وفرغت مجال بالغرفه الفوگ حتى اتسلى وابدي اشتغل بيها براحتي
ضيّ كانت مشغولة على طول بأطفالها مااعترضت طريقي ولاسببتلي مشاكل وخاصه زين وياسمين متعلقين بيه ومن يروح نور للدوام يجون يمي بالغرفة ينامون ويلعبون
..
مرت الايام وتعلمت أطرز گلابيات وعبايات جبب ودشاديش وآخذهم لصاحبة مشغل خياطه بالسوگ اسمها (ام همام")
كانت تتعجب وتنبهر لشغلي وشجعتني هواي وسوتلي دعاية بالسوگ ووعدتني تشغلني وياهة بمشغلها اللي يبيع للمحلات جملة بعد ماتخلص الدورة التدريبية اللي كانت مدتها ست شهور
مرت الايام وحسيت بعد اكو مجال الي بالدنيا وأمل تجدد عندي احاول اعيش بشكل طبيعي واحس بطعم الحياة بعد ماحبست نفسي خمس سنين مضت بالذكريات والحزن
شفتها فرصه اتعرف على ناس جدد واسوي شي مميز ومفيد
بديت اشتغل بدلات واطرزهم لشيرين وياسمين فرحت ضيّ بشغلي حتى كانت تنطيني فلوس وسوتلي دعاية كدام صديقاتها واهلها والجيران
وبعد مالحگ على الشغل لدرجه شغلت اخت ضيّ الصغيرة وياي تعاونني وشيرين وقت فراغها تصعد يمي وابقى بليل لوقت متأخر اكمل الشغل والخياط العندي ولو متعب كان وظهري يظل يوجعني من التعب بس أحسن من الفراغ والصفنات والأفكار السلبية اللي دمرت نفسيتي
الحمد لله اجتني هالشغلة نعمة من الله
هم انسى شوقي وعذاب فراگ سلطان"
وهم كونت علاقات وجمعت فلوس هواي واشتريت ذهب وضميته بصندوگ وصارت عندي ملابس حلوة بالدولاب
وشغلي على الأكثر المرغوب عند الزباين بوكتها الگلابيات والزي الهندي للعرايس
تعاملت ويه خياطات قديمات اطرزلهم واخذ عمولة على كل قطعة وادزهن الهم همة يخيطون الباقي
سنه كامله استمريت بهذا الشغل صعدت اموري وصرت مشهورة بالمنطقة
وحدة من الخياطات اسمها
( أم نرجس) كلما تجي تحجيلي عن اخوها إياد عمره بالثلاثين وتكول ماعنده حظ بالزواج
كلما نخطبله متصير قسمته
وظلت تلمحلي أنها تريد تخطبني ألي
... اني كنت رافضه الفكرة نهائياََ
لكن من يسألوني عن السبب مااعرف شرد عليهم
اني عايشه هيج مرتاحه شلي بالزواج وكلشي متوفر عندي شسوي بالزوج
مااعتبره شي اساسي بالحياة
بس المجتمع للأسف مايرحم ويجبر البنيه توافق على الزواج والارتباط غصب واني تهربت من اكثر من قسمة وأكثر من وحده تفتح الموضوع وياي ..
ماادري لشوكت ابقى اتهرب وارفض
وياترى الناس راح تتركني اعيش وحدي بلا ما تحجي وتنم وراي ..!!
يتبع ....
#قصه_ناديه@18
