#لأني_أحببت/ 30
#قصة_حب
.. ناديه@
...
هلت دموع العين عند الوداع*
وبللت بدموعها شوگ وحنين"
يا حسافه وقتنا والعمر ضاع*
نجتمع يومين والفرگه سنين"
***
بعد يومين على لقائي بـسلطان" تغير كلشي بحياتي
تعبت نفسياََ وجسدياََ
قضيتها سهر وحسرات وألم وببالي أواجه الكل بالحقيقة بس ....
آااه ياربي ... ماعندي الجرأة الكافية ولا عندي قابلية أتحمل الخسارة
راغب" المسكين صار له أكثر من ثلاث سنوات منتظرني ومتأمل بيه ...
زاد المرض عليه وفقدت شهيتي للأكل ودائماََ سارحه بخيالي واتعامل ويه الكل ببرود والدنيا طالعه من عيني
مااكدر احجي ولا اكدر اعترف بعلاقتي بسلطان"
راغب صار يتضايق مني ويتذمر من اهمالي إله
كل مرة يخابرني لو يشوفني يكللي أني راح أسافر لتركيا ويه الشركة بعقد عمل واعوفج
لأن يأس مني وزواج ماكو
سلطان" صار دازلي أكثر من ثلاثين رسالة مسج بالموبايل كل رسالة اقراها دموعي تبقى تصب وگلبي ينعصر الف عصره من الألم والقهر
كلي برسايلة ..
"خليني اساعدج وافحصج من جديد"
"جيبيلي اوراقج وفحوصاتج اراجعها .."
ومره كلي سوي جواز سفر وخليني اعالجج بإيران لاتبقين على علاجج هذا ميفيد هنا"
لو رسالة يعاتبني بيها على سنينة اللي ضحى بيها بالغربة وهو بدون زواج
كان بأعتقاده اني تزوجت وعفته
مايدري باللي صار بيه بعده والعذاب اللي عشته بفراگه
...
رساله ورة رساله مارديت عليهن
مااعرف شرد شكتب
شگول وشلون احجيله التفاصيل
آخر شئ كلي ردي بأي كلمه حتى اعرف انتي دا تقرين رسائلي لو لا !
رديت ودموعي تصب بكلمتين بس "احبك سلطان"
يمكن دمرته وعذبته أكثر بهالرساله
بس هو هذا اللي دا أحس بي حبي لسلطان" وبس ..
شيرين وضيّ كل مرة يسألنيّ عن سبب اهمالي لراغب وتأجيل الزواج وحاسات بية شي مو طبيعي
وحتى نورالدين مثلهن
كتلهم أني مريضة دا اموت ماريده يرتبط بوحده مصيرها تموت وهو مايستحقني شنو ذنبه يرتبط بيه ويضيع مستقبله علمودي
اليوم الثالث انتظرت الكل يطلع للدوام وركضت لضيّ بالمطبخ
جريتها من ثوبها تفاجأت مني
احجي ضيّ
زين إبن نور ولا إبن حبيبج دريد ؟؟
ششنوو !!
دفعتني وارتبكت
شدا تكولين ناديه !
بعد كل هالسنين شذكرج !
كنت لازمه خاصرتي واحس بألم يگطع بظهري
اخذت نفس قوي
ضيّ كلشي ماريد منج بس الحقيقة اصلاً طول ها لسنين مانسيت اللي صار وماحصلت فرصه اواجهج بيها وطول هالمده شاكة بيج تخونين نور احجيلي اللي صار سولفيلي ضيّ واوعدج أسدة ّ الموضوع نهائياََ
اقتربت مني وصارت عصبية
اسمعي ناديه من يرجع زين من المدرسه ناخذه اني وياج وننروح نسوي تحليل الحمض النووي وتتاكدين انه إبن نور الدين
ويكون بعلمج دريد فد واحد نذل تعرفت عليه صدفة بالسوگ وبعدين عرفته على حقيقته
كان يتسلى وياي واستغلني بوقت جنت حاسة بفراغ بسبب سفر نور المستمر وبعده عني
ومن إجه لهنا آخر مرة وصادفتي أنتي بالباب وتعاركتب وياه جنت متعراكة وياه وطاردته ونهيت علاقتي بي وبعد الهوسه اللي سويتيها وفضحتيني كدام نور ماشفته ولا التقيت بي أبد وظليت وراها طول هالسنين الفاتت مخلصه لنور زوجي وحبيبي وابو اولادي "زين وياسمين"
ارتاحيتي هسه !!
صرخت من ألم ظهري وكعدت بالكاع ابجي بصوت عالي وأوننّ
ركضت ضيّ لزمتني
أمشي ناديه تعالي اخذج لغرفتج ترتاحين وتاخذين العلاج
لزمت ايدها وكوه حجيت
سامحيني ضيّ انا أسفة ..
يمكن تستغربين ليش سألتج هسة بعد كل هالسنين
ضحكت بسخريه من نفسي واعترفت الها بمختصر عن سلطان"
شلون ضمياء اختها عرفتني عليه وشنو اللي صار بيننا ماكلت كلشي على قدر افهمها بعلاقتي بي
بس حسيت بالعبء خف عليه تعبت وأني سنين ضامة هـالاسرار ..
يمكن لأن حسيت بيها راح تفهمني هيه أكثر من غيرها
لأنها خانت نور ومرت بتجربة حب بس أني اختلف عنها
اني ماخنت راغب وتجربتي ويه سلطان تجربة حب طاهرة وشريفة وصادقة لهذا رب العالمين رجع جمع بيننا بعد أكثر من 12 سنة
بقت ضيّ تبجي وأنصدمت من كلامي وتأثرت لدرجة أنها حضنتني وهدأتني وحسيت بيها حنّت عليه وتأثرت ونقهرت حيل
.. أحتاجيت هواي لحضنها وطلبت منها تساعدني وتتدبرلي حلّ أي طريقة اخلص بيها من هالعذاب
سوتلي شوربه وكلتني بيدها وبلعت الادوية ونمت للعصر لكيت رساله من سلطان بالموبايل "أني راجع لإيران اتمنى تتصلين بيه لهناك وتخليني أتابع حالتج الصحية"
وكاتبلي رقم جديد حفظته بالجهاز
لفيت جسمي بمشمر صوف وطلعت بالحديقه دكيت رقم سلطان
رد وصوته مخنوگ كلش
سلطان" اتمنى أشوفك قبل الـ ...
أني هم اريد اشوفج ناديه بس ..
بس شنو سلطان ؟
ماريد اسويلج مشاكل
تحسر ...
صحتج شلونها ؟
سلطان لاتروح فدوه ابقى
ناديه مو سلطان اللي يآخذ مرة من حضن زوجها ..
خليني بس اساعدج باللي اكدر عليه واتابع صحتج ..
سلطان" ...اني ما ..
سمعت صوت نور قريب مني .. سديت الإتصال قبل لا احجيله كلشي
تمنيت اشوفه واحضنه واسولفلة اللي جرى واللي صار قبل ... يمكن قبل ما اموت ..
وتمنيت اكوله اني ممتزوجة ولاحبيت غيره ولا راح أحب احد ومااكدر ارتبط بأي شخص ..
**
بغيابك حبيبي إشلون أصبّر الرّوح *
يا حال إليظل على حالي من تروح*
جرحك بالگلب داويته بس ما طاب*
وبطاري السّفر زيدت گلبي إجروح*
ما أنساك لو سافرت عشر إسنين*
وشوكت ما تردّ باب الگلب مفتوح *
كلتلّك هذا ما مسموح
النّفس أنت الأشمّه ولو تروح شلون
شلون تريد أعيش إنّي بلياك جسد بلايه روح /*
....
طلبت من نور يأخذني للدكتور دا أحس بألم وماتحمل بعد وممرتاحه غيرت ملابسي بصعوبة وطلعنه
أخذني للعيادة
سويت سونار وتحاليل جديدة
الدكتور كال هاي الكلى التالفه لازم نستأصلها اذا بقت يومين تسوي تسمم بالجسم
حولني للطوارئ بالمستشفى وسجلي على عمليه مستعجله وتحضرت على أساس أسوي العملية وكنت خايفة ومرعوبة ...
خايفه أموت لومتنجح العمليه وأخسر اللي حبيتهم وافارقهم للأبد ...
...
يتبع ..
#قصه_ناديه@30
