#لأني_أحببت 14
#قصه_ناديه@
...
سلطان كان يمر بظروف كلش صعبه ماعرفتها بوقتها
ماكان يحجيلي
واني هم مالح عليه من اشوفه مهموم لو حزين اخفف عنه واشغله عن مشاكله اللي ماعرفتها شنو
وهو ميرضى يسولفلي عنها بس يكول عندي ضروف صعبه ومايتطرق الها ...
عرض سلطان عليه نتزوج بالسر !!
فاجأني ...!!
بل صدمني !
زعلت منه وكمت من مكاني حتى غده متغديت عفته وطلعت من المطعم
لحكني ..
ناديه ... ناديه ...
لزم ايدي واخذ جنطتي مني
سلطان جيب الجنطه وخليني ارجع
خليني افهمج
ماريد ..
جريت الجنطه حيل وزمخت بي
خليني اروح ترة افضحك هنا واكول ماعرفه و يتحارش بيه
عاف الجنطه واشرلي روحي
بس عيونه كانت حزينه وراد يكول كلام لكن اني بسبب كرامتي وكبرياءي لو يمكن الصدمه بطلبه المجنون ماسمحتله وتركته ورجعت
صعدت بسياره الركاب ورجعت للبيت
طلعت البيض من الثلاجه سويت مخلمه لشيرين مالي خلك اطبخ وانسدت نفسي ومااشتهي كلشي
أخذت الاكل للغرفه شيرين نايمه خطيه أكيد انتظرتني وغفت
كعدت كبال المرايه على الكرسي وبقيت افكر بكلام سلطان
شنو اللي خلاه يطلب هالطلب !
سمعت التلفون دك كلت بلكي هو
حرك قلبي حرك
تندمت لان عفته وماخليته يوضحلي السالفه
رحت رديت كان نور ويريدني آخذ التلفون لفوك
اخذته وصعدت
ضيّ عدها ثلاجه وتلفزيون بغرفته الأميرة جناح كامل وتاكل وتنام
متحتاج تطبخ وتتعب ولاتنزل لجوه اصلا ..
اطيتها التلفون وطلعت بلا مااحجي وياهه
اصلا احتقرها واشمأز من اعاين ببوجهها
مر اليوم بصعوبة مثل كل يوم ممل بس هالمرة اثكل لان الحسبه اللي ببالي غير
ليش هيج سلطان يسوي !
بديت اخاف منه ومااعرف شنو نيته وياي
تقريبا ثلاث ايام مرت وماشفته لسلطان
متت من الشوق والفراق
فطر قلبي
نور رجع وكان مهتم بضي بشكل مضاعف عن قبل
الصبح اخذها للمستشفى يسوون فحص
طلبت من شيرين تساعدني بشغل المطبخ وعفتها ورحت للتلفون بعد ما اتحمل ثلاث ايام لاخابر ولا اجه واني هم ماانتظرته بالمطعم
يمكن هو انتظرني !
مااعرف ...
المهم هسه اخابره واتطمن
خابرت دك هواي وماكو رد !
ظل بالي عنده اكثر
دكيت اكثر من مرة
عفته ورحت ورة ساعة رجعت خابرت ردت بنيه غير ذاك الصوت اللي رد قبل من خابرت
مبين صوتها صغيرة
كتلها وينه سلطان
كالت مموجود منو انتي !
انطبك التلفون ببوجهي !
قلبي تفطر وتفشلت
ليش هيج يسوي سلطان اكيد موصيها
يعني لو اوافق على رغبته بيه وطلبه
الغريب لو يعوفني بقيت آكل باضافيري من التوتر
شيرين كالت ناديه ح اروح للحديقه اسكي الزرع
بقيت افتر بالصالة وتوترت
شلون هسه وين الكاه !
حتى ما اندل بيته
اشتاقيتله يربي
رجع نور العصر وبقى بغرفته فوك واني مثل المتيها الوّج
بليل اتسحبت ودكيت رقمه بالتلفون كلت مامعقوله سلطان يعاقبني هيج عقوبه لو يحبني صدك ميتاخر عني هالكد
رد صوته هو
كتله بهمس سلطان !
جر حسره ومارد
سلطان باجر ضروري اشوفك زين !
وسديت السماعه
بجيت وحسيت بشوق موتني طلعت للحديقه حسيت بنفسي مااكدر اتنفس بعد
ليش هيج سلطان حرام عليك
ليش الحب هيج صعب ومتعب
بقيت اتنفس بقوة سمعت حركه وراي
نور !
ناديه !
شتسوين هنا !
كنت ابجي وكاعده بالكاع مسحت دموعي وكمت
ماكو شئ بس مختنكه شويه دا اشتم هوه
كعد واشرلي كعدت يمه حضنني
ناديه !
شنو حبيبي !
ضيّ شبيها !
رفعت راسي من حضنه تظاهرت بالغباء
ولا اكيد حس بيها لأن نور ذكي وعنده تجارب هواي متعبر عليه الخيانه
شتقصد حبيبي !
اني سامعه نساة حمل ولعبان نفس وشغلات للحامل
جر حسره
لا ناديه مو هيج الشغله
بلعت ريكي وخفت من كلامه
نور انته شاك بيها !
همس بصوته ناديه احجيلي انتي اكيد تعرفين شئ
نور ماكو شئ صدكني درت وجهي خجلت اباوع ببوجهه
لزمني من خدودي
ناديه إذا عرفت شئ وطلعتي ضامه عليه
ارتبكت من كلامه وماعرفت أرد
كام وراد يدخل
صحت وراه ... نور
التفت
نور قبل كم يوم اجه الولد اللي خطبني دريد من رجعت من المدرسه تحارش بيه بالباب وفزعولي ولد الجيران
شنو !!
هزيت برأسي هذا كل اللي صار
ظل يصيح
انتي شدا تكولين !
ليش ماكلتي الصبح من جيت جان رحت كسرت الدنيا عليه وعلى اهله
نور الله يخليك متسوة خلي يولي اني رزلته وفشلته وبعد لا اجه ولاشفته
دخل للبيت لحكته وصعدت وراه
ظل يصيح على ضيّ
منين جبتي ذولي الناس !
انطيني عنوانهم
بقت ضيّ ترجف وتعاين ببوجهي
هدأته لنور وكتله حبيبي باجر نتصرف موزين عليك هيج تسوي وتصرخ
أهده ...
جبتله مي شرب وظل يتوعد دريد هذا
حسيت بنفسي انطيتها إنذار لضيّ حتى لا تفكر ترجع تخونه لنور
ثاني يوم رحت ملهوفه رتبت نفسي أكثر من كل يوم وتكحلت وبقيت أعد الساعات لشوفت حبيبي
ماادري نور شراح يسوي
مو ببالي غير اشوف سلطان واعاتبه على فراكه
بالمدرسة انطونه تحاضير وواجبات واني مستواي ضعيف ومانتبه للمحاضرات بالصف
تفكيري مشوش بالف سالفه
ماعندي صديقات مقربات كلش حتى ضمياء صارت بغير صف مو وياي بعد آخر مرة تعاركنه ماحجيت وياهة ومن تجينه للبيت تشوف اختها اتجنبها وماحاجيها
طلعت تعبانه سلطان مموجود هالمرة لازم احسمها وياه تعبت
تعبت نفسيتي ...
تمشيت بخطوات بطيئة جهه المطعم لكيته واكف
ياويلي ... قلبي بده ينبض بسرعه ورجليه ترجف
جماله وطوله واناقته ...
كلشي بي يشدني اله ويجنني عليه ..
سلطاني شكثر مشتاقتله ...
يتبع ...
#قصه_ناديه@ 14
