#لأني_أحببت/ 25
#قصة_حب
... ناديه@
...
شگد صعب إحساس الخيانة ..
يمكن الموت اهون وأرحم منه ..
تذكرت ضمياء من خانها سعد كالتلي ناديه لو ميت ولا خاينني ..
بعد الصدمة اللي ما اعرف شكد صار رقمها من الصدمات اللي تعرضت الها بحياتي البائسة بقيت معتكفة بغرفتي مااريد اشوف أحد ولا اتكلم بالموضوع
محد عرف شنو سبب عزلتي وزعلي من راغب !
أكثر من مرة إجة للبيت ورفضت اشوفة گتلهم ماريد أسمع بإسمه ولا اعرف شي عنه
حتى زين توسللي اطلع وأتغده لو اتعشه وياهم لأن عمو راغب موجود ويريد يشوفني رفضت وماتنازلت وقفلت باب غرفتي
اصلاََ ماريد أعاين ببوجهه ولا اريد أسمع اعتذاره بعد اللي شفتة بعيني بذاك اليوم
شيرين كانت تجيبلي اكل للغرفة وهيه الوحيدة اللي عرفت بالسالفة وتعاطفت وياي
وحست بيه وبألمي
نور طلب مني توضيح رفضت كتله سوء تفاهم وبس احصل فرصة الغي الخطوبة ماريدة بعد ..
مارست حياتي بشكل طبيعي رحت المشغل وعندي مراجعه للطبيب لازم اتابع العلاج
اروح بتكسي وارجع طول هالفترة ماالتقيت براغب
من يجي للبيت ارفض أشوفه نهائياََ ..
بعد اسبوع كعدت متأخرة من النوم وطلعت من غرفتي شيرين بالدوام اشتميت ريحة طيبة ضيّ دا تطبخ كتلها شنو هذا شطابخة اليوم دجاج ومحاشي
ناديه اليوم راغب معزوم عدنه ويه أبو وامه
كملي وتعالي ساعديني فدوة
شنو !!
وجهالج وين !
برة د يلعبهم راغب طوبة بالحديقة
ضيّ اني داخله للحمام وبعدها راجعة لغرفتي افتهمتي !
لحكتني ولج ناديه حرام عليج خبلتينه كلنا مجاي نعرف شتردين .. نصت صوتها ..
لج الولد شاريج وميت عليج بعد شتريدين يعني ؟
ضيّ روحي للأكل لا يحترك
عفتها ورحت سبحت وبدلت ومكياج وعطر مااعرف يمكن اريد أبين له اني ممهتمة إله ومتهمني خيانته ..
طلعت برة للشارع شافني لحكني وصاحني
نااااديه ...
فتحت الباب وطلعت لزم ايدي ناديه لحظه جريت أيدي
نعم .. شعدك !
بروح ابوج انطيني فرصه
دخلي البيت نتفاهم عيب منا ناس
لابالله !!
وانته والعيب شنو ؟
شتعرف عن العيب !
دخيلج ناديه والله د تعذبيني هيج
عفته ورحت بقه ملاحكني بالشارع
راغب روح لاتلحكني
درت وجهي دا اكولك روح ارجع
اسمعيني ناديه عندي كلام بس خليني اكوله وبعدها سوي اللي يعجبج ممكن ترجعين وياي ..
ارجوج ...
اففف منك شتريد تگول يعني ماراح يغير النظرة اللي كونتها عنك ..
رجعت دخلت للبيت زين وياسمين بقوا يهوسون هييي رجع عمو راغب
دخلنه للصاله بعدنه واكفين
ضيّ بقت تعاين علينه من المطبخ
كتله تفضل احجي بسرعة شعدك؟!
ناديه صارلنه أكثر من 3 سنوات مخطوبين واني حبيتج وتمنيت تكونين زوجتي وأم لاطفالي
يمكن قصرت وياج بفلوس وذهب ومطاعم وسفرات واعترف بهالشي لأن ماعندي وانتي جزاج الله خير
كنتي قنوعه ومامتبطرة نهائياََ ولا متتطلبة
بس أني رجال .. دا تفهمين شنو يعني أني رجال ؟
صرخ ببوجهي ننززني
شنو اللي يريده الرجال من خطيبته وزوجته بالمستقبل كوليلي !؟
محتاج محبة وحنان ورومانسية ومشاعر وسوالف عشگ
مااگدر ناديه تفهميني وأنتي بهالبرود والهدوء
من حقي احجي حقي لو لا ؟!
قاطعت كلامه وعفته ودخلت للغرفة جبت الحلقة
لأن كنت نازعتها من اصبعي فتحت كفه وحطيتها بي
وخنزرت عليه
اعتذر منك ياحضرة الرجال اني مافيدك ولا عندي اللي تريدة جنابك
غمض عيونه وصم أيده
تركته ورحت بس تألمت ..
حسيت بغصة ورغبة اصرخ ..
طلعت بسرعه أجرت تكسي مااعرف وين اريد اروح
كتله للسايق لأي مكان بس حرك فتحت الجامه واتنفست بقوة
محتاجه هوة نظيف اختنگت
بس .. بس يادنيا خلصيني كافي ...
لا عندي حظ بالعلاقات ولا بالزواج ولا بالحياة ولاحتى صحتي تساعدني
تعده ابو التكسي على مكان منتجع قريب الجبل تذكرت سلطان" كان يجيبني لهنا الله ...
شكد حلوة ايامك يـسلطان" حبيبي"
شكد شفت ضيم وعذاب بعدك
كتله لابو التكسي نزلني هنا حاسبته ونزلت
ايباااه ...
حلو المكان والهوه بارد ومنعش بقيت ساعات واگفة نسيت نفسي ذكريات تنعاد ببالي تحسسني بشوق وحرقه بصدري ..
تمنيت ابقى بعد
بس جعت وبردت واني طالعة من الصبح بلا آكل
رحت اشتريت لفة وعصير وبقيت للغروب حبيت اشوف المنظر من الجبال شلون راح يكون صدگ حلو ومريح للنفسية
تمنيت عندي كاميرا واصور هالمنظر
بعدها رجعت لكيت البيت هوسه صاير وشيرين تبجي ركضت حضنتني وتبوس بيه
نور زمخ بيه
ناديه وين كنتي !؟
راغب كان موجود وياهم بس من شافني استأذن وراح طلع
وزين وياسمين مبين عليهم باجيين خطية ومنهبطين عليه
انحرجت من الموقف وخجلت ماعرفت شحجي
كتلهم ... آسفه ..
عن أذنكم اريد ارتاح وابقى وحدي
دخلت لغرفتي ولحكتني شيرين
ناديه ليش هيج تسوين هبطتينه كلنه تخبلنه عليج
متنه من الخوف ورجعت تبجي
أسفه حبيبتي ارجوج لاتبجين كنت محتاجه ابقى وحدي
نور دخل و يصرخ عليه
اسمعي ناديه كتلج من البداية اذا متريدين راغب عوفي ولاتخلين الولد معلگ بلا زواج صارله سنين ومنا ورايح اشتريلج موبايل خاص وين ماترحين بجنطتج
تتصلين وتخلين عدنه خبر بمكانج افتهمتي ؟
هزيت برأسي أي ومارديت حسيت بيهم صدگ خافوا عليه لأن تأخرت وحقهم من يحاسبوني وإني غلطت بتأخيري بس ماحسيت بنفسي ولا انتبهت للوقت
تمددت شيرين نزعتني الحذاء وساعدتني بتبديل ملابسي وأجت حضنتني
دخلت ضيّ
ناديه تدرين شصار وراج !
ماريد اعرف ضيّ اسكتي فدوه طلعي خليني ارتاح
شيرين كالت ناديه اني اكره كل الزلم كل رجال قذر وميستحق الإرتباط
ابتسمت لا شيرين لاتكوّنين هالفكرة السلبية يمكن حضج احسن من حضي وتلكين الرجال المناسب
اذا رجال صدگ اريده يصير مثل نور الدين شوفي شلون يعشق ضيّ ومدللها
ضيّ كالت ... لا عيني نور الدين رجال من صدگ لأن أني ممقصرة وياه وممخليته محتاج يعاين على غيري
كمت من مكاني شنو تقصدين ضيّ ؟
هزت بيدها واشرت عليه
دشوفي حالج مريضه وعايشه على الدكاترة والأدوية موزين من رجال مثل راغب ملزم بيج وباقي عليج ؟
شيرين كامت وصاحت بيها ضيّ شنو هالكلام عيب عليج شهالحجي !!
سدت الباب وراحت
وكأنما صفعتني صفعة نبهتّني وصحتّني من غفلة ..
صدگ اني قضيت فترة خطوبتي كلها من راغب بعيده وتعبانه وانشغلت عنه بمرضي وبمراجعه الدكاترة
بقيت ليلتها قلقه مكدرت أنام ..
شيرين بقت تخفف عني وتواسيني ..اصلاََ شيرين الوحيدة اللي اعتبرها مصدر سعادة وحب بحياتي ..
ومرت الأيام ..
امتحنت شيرين وطلعت معدل عالي وفرحت بيها فرحة العمر سجلت على كلية الطب بالسليمانية واني بقيت على حالي نسبة التلف عندي زادت وصارت عالية
وحده من كلاتي لازمها استئصال والثانيه تعبانة والعلاج مجرد خساير ومافاد بشي
رغم تقدم الطب ودخلت اجهزة وعلاج بالليزر بس كان غالي ومامضمون والعلاج اللي دا أخذه مجرد مسكنات ومهدئات
..
نور آخذ اجازة وعلى أساس يأخذني لمدينة الطب ببغداد بلكي هناك احصل نتيجه أو أحد يتبرعلي بالكلية مالته وتنتهي معاناتي ..
جاب لكل وحده مننا جهاز موبايل جديد وشريحة وكارت رصيد علمننه عليه وشلون ندخل الرصيد والارقام كلش حلو وفد شئ جديد وأنتشر بشكل واسع
بقينه طول الليل اني وشيرين نلعب لعبه الحية اللي تاكل وتتطول نتسابق منو تخسر قبل تاكل ضربة زينة بالمخدة
شكد حلوه الحياة وبسيطة ياريت لو تكمل بصحتي وعافيتي مااعرف بأي وقت تتوقف الكلى عن العمل وافارق حياتي لذلك احاول اقضي أطول فترة ممكنة ويه شيرين حتى أشبع منها
...
ثاني يوم اتفقنه اني ونور الصبح نطلع لبغداد
... يتبع ...
#قصه_ناديه@25
