عيشة سعيدة

4

#عيشة_سعيدة4
Shahd Alsalman

كمت افكر شسوي حتى اجيبلة فلوس لان كل يوم يمر يضغط علية اكثر مجنت ادري هو هيج طماع وقبيح وبلا غيرة ولا شرف بس الظاهر الشرب نهى دماغة وكلبة انغسل من الرحمة
و فد يوم جنت دا اقرة دخل علية مثل الوحش جر شعري
- لج اموتج واخلص منج لج انت بلوة طلعتيلي وما بيج لا نفع ولا دفع لا خليتني اخذ فلوس زواجج ولا جبتي شي اني نصبة كدامج
- شسوي ما اعرف منين اجيب ومحد يشغلني بهالعمر
- من باجر تنزلين للشارع تكدين
دفعتة عني بكل قوتي
- تخبلت انت شنو اكدي
- حجاية ما اسمع والا قسم بالله ابيعج كل يوم لواحد ولا عبالج ما اسويها بس عاندي وشوفي
ركع باب الغرفة وطلع

يا ربي اني شسوي هسة اكول لعمتي بس شراح سويلي وهي بغربة زين خالتي معقولة تدري وساكتة اني بت اختها شون تكدر هيج
وحتى لو كتلها هي ضعيفة ومتكدر علي
يا ربي ساعدني شون امد ايدي للناس والله انذليت من بعد اهلي جنت عزيزة وهسة حصير مكدية بقيت ابجي لحد منمت كعدت ثاني يوم اروح للمدرسة فتحت الثلاجة طلعت مي دا اشرب حتى اطلع لان هو هذا ريوكي جان محسيت الا واحد سحبني من ايدي جرني
-حضري نفسج اليوم
- بس اصبرلي الكة شغل والله صعبة اني مثل بنتك
- انجبي انت مثلها شجابج عليها بلا اهل صايعة
- كافي التريدة اسوي كافي عاد
- عفية هسة انت حبابة
رحت للدوام وبالي مو يم الدرس ابد
كلت بنفسي اكدر اسوي اللي يريدة وبنفس الوقت اكمل دراستي واسد حلكة
عندي عباية ماما وشيلة بيبي السودة واتلثم وهاهية امري لله وهو رب العالمين يعرف اني مجبورة ما اريد هالشي بس شسوي مو بيدي.
صار وكت الرجعة للبيت انتظرتهم ينامون واخذت عباتي وطلعت للشارع بمجرد ما شافوني هيج عباية ومتلثمة كلها مدت ايدها وانطت واني بس ابجي عزت علية نفسي كلش وتمنيت الموت بساعتها شفت الفلوس صارو هواية رجعت وحتى الحك قبل لا يكعدون من النوم وشفتة كاعد بالهول شمرتهن بوجهة وطبيت للغرفة اشهك وابجي وادعي الله ياخذني على هالذلة الحسيتها
بقيت على هالحال كل يوم ومرات بين يوم ويوم وطبعا كام يذبني بمناطق مختلفة والمشكلة الوضع الامني جان كلش صعب ويخوف خطف وقتل واغتصاب كل شي نسمع ونشوف واكثر من مرة تعرضت للتحرش و لحكوني ولد واكيد هم ضعاف نفوس مثل رجل خالتي ..

بيوم من الايام اخذنا بدرس الاسلامية الحديث اليحجي عن التسول وشون ينزل ماي الوجه يوم الحساب وشون الله محرم الجنة عنة
لكيت نفسي رافعة ايدي ودا اسال الست
- ست اذا جان المتسول مجبور وما بيدة شي او ما يكدر يشتغل او مضطر على هالشي هم الله يكرهة وميدخلة الجنة ؟
استغربت من سؤالي وكالت
- اولا يا ماما الله ميكره احد كلنا عبادة وهو يعرف كلنا نغلط ومو معصومين بس العاصي يكدر يتوب
ثانيا شنو اليجبر انسان يمد ايدة وهو يكدر يشتغل والله منطي الصحة والعافية المفروض يستغل هالشي ويجد ويجتهد مو يمد ايدة وينصب ع الناس ويستغل عطفهم
- يعني محروم من الجنة اللي مغصوب على هالشي
- رب العالمين هو اليقرر يحرمة او يدخلة والله اعلم بالنيات بس التوبة موجودة ويكدر واحد يفكر انه يتوب ويشتغل حتى لو يخدم بالبيوت او يشتغل بالحدايق او يبيع كلينس اقلها بتعبة ما مستغل احد .
طكت الدمعة بعيني ودنجت راسي لان احس بالذنب واحس بعذاب الضمير وما اريد الله يعاقبني على شي خارج عن ارادتي
كملنا الدرس مكدرت اطلع من الصف مخنوكة بالبجي كلها طلعت فرصة بقيت ابجي وبشهكة ومدنجة راسي ع الرحلة حسيت بأيد على ظهري فزيت باوعت لكيتها ست نهلة حظنتها واستمريت بالبجي وهي تمسح على راسي وتسالني ليش سالت هالسؤال وليش دا ابجي هيج مكدرت اجاوبها بس كتلها مشتاقة لاهلي حسيت هي افتهمت انه ما اريد احجي شي
كالتلي تكدرين تجين علية ورة الدوام لان هي جانت جوارينا بالمنطقة فكتلها اي اجي ست
انطتني كلينس وشربتني مي وكالت يلة كملي دروسج واقري فاتحة لاهلج
بعد المدرسة و من دا اطلع حتى اكدي اتذكرت ست نهلة تريدني حطيت العباية والشيلة بعلاكة حتى من اخلص منها اطلع للشارع وصلت لبيتها فتحتلي الباب وكالت تعاي فوتي ما عندي احد
فتت البيت حلو كلة قران وايات ومريح كلش وهي ست نهلة انسانة راقية جدا
- شتشربين
- ولا شي استحيت منها
- لحظة
وراحت جابت عصير وبتيفور وكيك وقدمت خجلت منها كلش
- لا تستحين اني مثل ماما
ابتسمتلها
- ليش دتطلعين للشارع وتمدين ايدج ؟
صدمني سؤالها شون عرفت وشوكت شافتني
ردت الكاع تنشك و تبلعني بساعتها معرفت شرد عليها ارتبكت كلش
- لا شنو هالحجي
ردت اكوم واطلع حسيت بدوخة رجعت كعدت كامت علية
- اسم الله عليج شبيج شهودة
- ما بية ست دخت شوية واريد اروح تاخرت وكمت مرة ثانية
جرت العلاكة مني فرغتها كدامي
- وهاي شسوين بيهن؟
متحملت هالاحراج صحت بيها
-معليج مني لا تتدخلين ما وعيت شلون دا احجي وبعصبية دا اريد المهن وكعت بالكاع حسيت كل شي يفتر بية بس اسمع صوتها بعيد وحيل دايخة انتبهت لما شميت ريحة وحسيت بالمي وضرباتها على وجهي رجعت لوعيي
- ست عفية خليني اروح
- اهدي شوية واسمعيني اني حاسة انت ممرتاحة يم خالتج وعرفت اكو احد منهم ضاغط عليج خليني اساعدج وكوليلي منو واودي ورة الشمس والله عدنا ناس وواصلين هواية بس كليلي
- اني اللي اريد اسوي هيج محتاجة فلوس
حاولت اقنعها انه ماكو اللي ببالها بس اعرف بيها ما اقتنعت
اخاف اكللها لا تصير مشاكل واني كوة كاعدة عدهم بس اريد اكمل دراستي اذا طردوني وين اروح وشون اكدر اكمل
- ماشي لا تحجين هسة وراح نعرف اول وتالي بس هسة لازم نحل هالمشكلة
- شون احلها
- تعالي كل جمعة هنا يمي وساعديني بالتنظيف دشوفين البيت شكبرة وما عندي ثقة باي وحدة تشتغل وياية الوكت يخوف والشارع مو امان وانت الج من هالشغل فلوس وبنفس الوقت اامن عليج مطالعة بشارع ويصيرلج شي لا سمح الله وهمين تخلصين من ذلة مدة الايد اسمعي مني اني مثل امج واحبج وانت بنية حبابة وذكية لا تاخذين الموضوع بحساسية ولا حتى هي صدقة او منية او فضل هذا تعبج وتاخذين عنة فلوس كأنما لكيتي شغل واذا معجبج بيتي اكدر ادزج لبيوت صديقاتي وهمين امان لا تخافين شكلتي ؟
- اي هاهية ست موافقة
وافقت بسرعة لان ما عندي غير هالحل وهمين ارتاح من ذلة وتعب الشارع والحرشة الاسمعها كل يوم
حجيت ويا زوج خالتي انه بعد ما اطلع كل يوم ولكيت شغل وراح انطي منة فلوس واذا يريد كلها ياخذها كلي طبج مرض المهم اكو فلوس اي شغل الجان بس يا ويلج اذا متنطيني كتلة ماشي
استمريت كل جمعة وبالاعياد ومن تحتاجني او تصيرلهم مناسبة اروحلها لست نهلة وهي متقصر ومحسستني انه اني خدامة او شي جانت هي تساعدني وتشتغل وياية اصلا لحد ما عبرت الخامس ورحت للسادس كامت متقبل اشتغل علمود اكعد اقرة للبكالوريا تخليني اجي يمها وتدرسني او يجون صديقاتها مدرسات من غير مدرسة ويقروني واساسا اني شاطرة وما اعرف شون اردلها هالمعروف كل يوم ادعيلها بالذرية لان متصير عدها خلفة وساعدتني هواية وحمتني احسن من بيت خالتي ومن دمي ولحمي عود هم
بالفترة الدخلت بيها سادس ولقبل نص السنة تقريبا ست نهلة صارت حامل الحمدلله ونجحت عملية الانابيب واخيرا وجنت ما اخليها منا لهنا تكوم خالتي وزوجها ميدرون عني بشي بس مودة تعرف وين اروح وين اجي داريتها هواية لحد مصارت بالشهر الخامس كالو لازم تدخل مستشفى حتى تكون تحت رعاية الاطباء لان هي حامل بتوأم وراحت ست نهلة ورجعت لحياتي ووعدتني تدزلي الفلوس دائما حتى اكمل هالمرحلة واني اعتبرتهم دين ومثل ما وعدت نفذت الله يذكرها بالخير هسة صارو اثنين ولد وبعدهم اجتها بنوتة وسمتها على اسمي وسافرو من العراق زوجها تهدد ومكدرو يبقون اكثر مراح انساها على كد وكفاتها وياية
مرات الغريب يصير احن عليك من اقرب الناس الك ويسندك ويقويك بوقت ضعفك والله مينسى احد ويعرف بية مالي احد غيرة فيسخرلي الناس الطيبة ..